是非之劇 《巾幗梟雄2》醞釀多時，早前終正式開鏡，即時惹來是非不斷。
無綫重頭劇《巾幗梟雄之義海豪情》日前正式開拍，怎知一波三折，先是《巾》劇編審張華標離巢投奔台灣一新電視台，然後再傳出女主角鄧萃雯忽然大跳草裙舞要求加薪，令《巾》嚴重超出預算，而要大大減少雯女戲份，但劇本已完成得七七八八，正進入尾聲階段，而且已正式投入拍攝，臨急改劇本，換來《巾》劇全組工作人員一頭煙！ 
日捱夜捱 開工初期，未見雯女蹤影，原來現在已日日開工。
去年無綫電視劇《巾幗梟雄》大收旺場，收視最高高達47點，成為全城一時熱話，《巾》劇之成功，連帶劇中不少台前幕後大豐收，除了令不少黑馬跑出，男女主角黎耀祥與鄧萃雯也水漲船高，登台剪綵拍廣告，收入源源不絕，而且二人去年更在台慶上勇奪男女視帝、視后，地位更是高人一等。 
眾望所歸 祥仔去年勇奪視帝，全城拍爛手掌，未知今次《巾幗2》能否再下一城。 
偷得浮生 雯女平時趁無需開工，便同朋友行街飲茶，認真識歎。 
指日可待 雯女同祥仔兩個好戲之人，於《巾幗2》再擦火花，觀眾真係望到頸都長。 
定過抬油 祥仔雖曾與雯女傳過緋聞，但睇見祥仔同老婆咁恩愛，都冇乜好驚。
而幕後重頭人馬兼無綫金牌編審張華標，亦被高薪挖角，赴台灣一間新開的電視台，任創作總監。張華標於無綫任職達30年，薪高厚職，多年來也培育出不少資深編劇、編審，今次離開，原來也扯走了不少無綫資深編劇及幕後工作人員。 
收視保證 金牌編審張華標，即將過檔，往台灣發展。
埋堆組班
一知情者透露：「華標一走，唔少人都想跟佢過檔，人哋出得起錢就唔在講喇，而且華標嘅創作能力又高，所以唔少編劇都想跟佢搵食。不過除咗編劇之外，台灣嗰邊間新電視台，都想有班自己嘅幕後製作人員，咁最好就梗係搵班合作開?喇，華標同製作部又熟，聽講有唔少人都已經辭咗職，年中都會陸續過檔。」
要求加薪
據稱，今次無綫的創作部及製作部有不少人有離職打算，無綫資源部見此次離職潮並不簡單，加上之前在經濟不景下又裁去了不少員工，公司惟恐短時間內嚴重流失人才，正致力向有意離職員工落嘴頭利誘，希望挽留員工，以免製作部及創作部忽然真空。
「無綫人工奀就眾所皆知嘅喇，今次公司雖然有話加番啲人工，挽留吓職員，但係佢哋出得幾多錢啫？台灣嗰邊，人工都輕易加兩、三倍，無綫點同人鬥呀？如果真係傾唔掂，隨時會鬧編劇荒、導演荒，唔夠人開工添呀！」
大改劇本
《巾幗2》的編審張華標，即將離巢，但原來《巾》劇劇本尚未完成，一組編劇正在趕工之際，早前更傳出女主角鄧萃雯大跳草裙舞，要求加薪一倍，令監製李添勝大為頭痛，並下令大幅減少雯女的戲份，以求不會超出預算，早前更有報道指，《巾幗2》開拍時，更不見雯女蹤影。一眾編劇正忙於為最後十集埋尾，怎知忽然傳來要大改劇本，令張華標與一眾編劇組大為頭痛。不過據知情人士稱，雯女要求加薪一事，純屬子虛烏有，「邊就冇咁嘅事，副導演編排工作表，梗係由頭排起先，嗰段戲冇雯女，咪冇佢囉，依家佢日日都開緊工呀。」
金牌編審
張華標於80年代已為無綫編審，至今已創作了39套電視劇，早期已有不少巨作，不過要數在07年的《溏心風暴》及續集《溏心風暴之家好月圓》最為人所共知，並成為了第一套打平韓劇《大長今》最高50點收視的香港電視劇，成為了張華標的戲寶。翌年，《巾幗梟雄》再創佳績，雖然並非，是年收視之冠，卻贏盡口碑。
部分作品
1983年 《射鵰英雄傳之鐵血丹心》
1983年 《射鵰英雄傳之東邪西毒》
1983年 《射鵰英雄傳之華山論劍》
1984年《五虎將》
1986年《聖劍天嬌》
1987年《杜心五》
1987年《天狼劫》
1988年《當代男兒》
1989年 《蓋世豪俠》 
1990年 《人在邊緣》
1992年 《巨人》 
1996年 《西遊記》 
1997年 《大鬧廣昌隆》
2001年 《封神榜》
2007年 《溏心風暴》 
2008年 《溏心風暴之家好月圓》
2009年 《巾幗梟雄》 
2010年 《鐵馬尋橋》
2010年 《巾幗梟雄之義海豪情》
《義海豪情》
故事與第一集並無任何關係，《巾幗2》的故事背景發生在1933年抗日時期，並且是橫跨兩個時代的劇集。而黎耀祥在劇中，不再做小人物角色，而是一名警察局內的刑偵隊長，與飾演黑社會龍頭女兒、大毒梟的鄧萃雯竟惺惺相惜，二人在抗日時期互相幫忙，亦互補長短，成為了抗日時期的重要人物。當中亦不乏雯女在黑社會家族中的明爭暗鬥。
留言列表
