隔空鬧成龍六嬸羅莽當街攬仔摸女忽然1周 783期－明星靚相大分享☆

飲酒切記適可而止，酗酒的後果可大可小。靠打在娛樂圈混了四十年的羅莽師傅，向來沉迷杯中物，08年試過醉酒騷擾三名青年和襲擊救護員而被判罰款二千元。事後他亦知錯，坦言會減少夜蒲和戒酒。
言猶在耳，但羅莽故態復萌。上周一（19日）深夜十一點，記者發現他一支公揸住枝大啤在九龍城街頭遊蕩，其後更闖進一間泰國餐廳發酒癲，對住空氣自言自語，鬧老闆方逸華和成龍，後來更大庭廣眾向一名陌生女食客摸手摸腳，話要「跟佢返屋企」，最後還對只有一面之緣的中年漢又攬又錫，斷背九龍城，果然愈夜愈精彩。

曾因醉酒鬧事而差點留有案底的羅莽，上周一（19日）再度犯禁。晚上11點，他在九龍城城南道出沒，當時他已經滿身酒氣，拎住支大啤，漫無目的遊蕩，不久他走入一間泰國餐廳，搵了個靠牆位坐低。

埋怨劇本唔得
「啪」的一聲，羅莽用力將枝大啤放在枱上，飲多兩杯，他眼神開始游離，對住空氣手指指自言自語：「唉！劇本……唔啱我……你叫方逸華食×啦！劇本唔得……咪改囉！」當時有不少食客被他的怪行嚇窒，記者聽到一名店員細細聲講：「唉！佢又係咁！」看來羅莽不止一次在九龍城「橫行」。
客人開始陸續離去，此時羅莽更變本加厲，「方逸華你好嘢……唔使咁玩我，又話劇本唔得，又話嗰啲唔得！」他說時憤怒拍枱，指住個天口噏噏，似在申訴自己際遇坎坷。

鬧成龍讚洪金寶
此時有個原本坐在店外的中年四眼男拎住枝啤酒及一隻空杯，膽粗粗坐在羅莽身邊，劈頭第一句就話：「師傅，嘩！你一個人？我同你飲！」四眼男似想開解心事重重的羅莽：「兄弟，有問題唔使自己受晒，你聽我講，呢個社會係咁樣，你嫖賭飲蕩吹一定是但衰一瓣。」羅莽忽然清晰說句：「我唔係啲咁樣嘅人！」足足重複講了三次。
四眼男再插嘴讚羅莽：「你咁打得，已經叻過好多人，可以拍多啲武打片！」聽罷人家擦鞋，羅莽隨即生猛晒，好大聲講：「成龍含×啦！洪金寶就真係掂，向華盛好×醒目，佢身邊好多人幫佢，向華強就好×靚仔。」
此時羅莽捽一捽眼，托一托頭，繼續向四眼男慨歎自己懷才不遇：「唉……我死都唔甘心。」

對女食客毛手毛腳
羅莽愈飲愈放，還飲到色心起，出手緊握一名經過身邊的短髮女子手腕，出言調戲：「小姐，你好靚女呀！皮膚好滑，坐低同我飲杯酒先啦！」女子見羅莽猴擒，便立即護胸，嘗試甩開對方，可惜徒勞無功。羅續說：「你喺邊度返工呀？俾個電話我啦！」此時四眼男在旁插嘴：「佢係我個friend嚟o架！」但說罷竟離座到洗手間，而那位女子為求速逃現場，就對羅莽說：「我知你係邊個，你俾電話嚟，我將number save俾你啦！我想去廁所，去完先再同你飲。」當然那女子借尿遁後，就冇再理會羅莽。酒醉三分醒，羅莽見她遲遲未返，竟問四眼男：「個靚女喺邊？我想跟佢返屋企！」
羅莽沉靜一陣後，又再斷斷續續訴說自己經歷，重複多次說：「班死差佬！你哋唔係大晒！」相信他對08年在黃大仙醉酒騷擾青年而被捕一事仍耿耿於懷。說罷羅莽突然捉實四眼男雙手，嚇到對方問：「你係咪鍾意男仔？」羅莽堅定地回應：「我唔係同性戀！」
凌晨1時半，餐廳老闆嗌收舖，四眼男便主動帶羅莽到外面自己張枱再飲，當時羅莽已經隊咗六枝大啤。
記者即場問過餐廳老闆，她說：「佢（羅莽）多數都喺條街飲，唔會入嚟餐廳，今次咁樣都係第一次。我最怕啲人飲成咁，咪話收舖囉！」

猖狂摸靚女
當晚羅莽先在九龍城城南道一間泰國菜館打躉，其間他一邊隊啤酒，一邊捉實一位女食客隻手唔放，係都要向她攞電話，之後仲話想跟人佢返屋企。該女子驚到以手護胸。

醉酒鬧事有前科
近年鬱鬱不得志的羅莽，事業未見起色，加上與子女關係疏離，經常借酒澆愁，多次因飲大而鬧事，更曾被警方檢控罰款。

酒樓鬧事
去年8月23日，有讀者向報館報料，指羅莽在黃大仙一酒家大吵大鬧，記者發現他拿着酒杯指手畫腳，騷擾其他食客。酒樓部長指︰「佢成日係咁……醉咗會唱歌同耍功夫。」

醉酒鬧人
去年3月，有網友於親子王國爆料，指早前行經影音店時，見到藝人「羅X」一身酒氣，追住兩個男人破口大駡，之後入了快餐店對阿婆大聲講嘢，好得人驚咁話。文中以「羅X」、「自投羅網」作提示，人物呼之欲出。

強吻少年
08年3月，羅莽涉酒後街上強吻青年及毆傷救護員，警方將他五花大綁送院。事後他承認普通襲擊罪，而醉酒及行為不檢罪則獲控方撤銷起訴，判罰款2千元了事。

拒吹波仔
06年1月11日凌晨，羅莽在九龍城停車場駕車撞向石壆，警員發現他滿身酒氣。羅一度想驅車逃走，警員於是拉他出車廂兼4次要求他進行酒精測試，但羅拒絕而被捕。最後羅承認「在意外發生後沒有提供呼吸樣本」罪，被罰8千元。

過檔再胡鬧
凌晨三時，四眼男和他的朋友終於嗌走，羅莽突然主動熊抱四眼男，更忍唔住當街錫了對方塊面一啖，四眼男隨即走為上着。
當時街上水盡鵝飛，羅莽仍唔捨得走，走進另一間泰國餐廳內，不過今次齋坐唔飲，繼續口齒不清o依o依哦哦，講到中途終頂唔住伏低睡覺。接近四點半，他突然回魂，搭的士返回寓所黃大仙下邨，歷時五個鐘的大鬧九龍城終於完結。

羅莽失憶：冇咁嘅事
本周二（27日），記者在電視城問羅莽，他表示：「邊日呀？喺九龍城？唔記得喎！」再問他酒後大鬧方逸華和捉實靚女一事，他更堅定地說：「冇啲咁嘅事！」當晚他明顯酒後「斷片」。

同事讚羅莽
米雪：應該支持佢
「我好多時會同羅莽合作，佢好有禮貌，有時會讚我個扮相好靚。佢好有心機做戲，有時佢啲角色冇乜大發揮，但都盡量做到個角色最好。（覺唔覺佢因為懷才不遇唔開心？）係咁就更應該多啲支持佢！佢每次都好準時開工o架，淨係呢點就已經好難得啦！」

黎耀祥：每人都有壓力
「佢都好nice，亦冇見過佢醉酒。香港地每個人都有唔開心嘅地方。佢冇同我講過自己事業係咪唔如意，我連佢結過婚都唔知道呀！希望佢冇事啦！其實大家都有壓力，又好難講俾人知，聽見羅莽咁，我好難過呀！」

打星變大茄
羅莽（原名羅坤霖），今年56歲，18歲在電影公司做信差，得到張徹導演賞識，加盟邵氏武術訓練班，晉升為一級武師，演出近六十部電影，如《五毒》及《少林與武當》。功夫片曾令他蜚聲國際，07年他更到美國接受「國際武術影業終身成就獎」。
80年代，羅莽改行經商。89年將生意結束，加盟無綫，更轉走搞笑路線。95年憑《娛樂插班生》扮吳剛人氣急升，04年他更代替吳剛為《慈善星輝仁濟夜》演出，籌得130萬元。
不過羅其後星運平平，在電視劇多數做大茄，如《飛女正傳》及《談情說案》，間中為電影客串。昔日的武打明星如今淪為大茄，難怪他鬱鬱寡歡。

老婆逝世多年
羅莽當年醉酒鬧事被捕，其當時代表律師向法官求情時，指功夫片熱潮已過，羅莽因有感年紀漸大，懷才不遇有酗酒問題。最後法官判他罰款二千元，羅莽離開法庭時更表示深感後悔。事實上，自言精通螳螂拳等武術的羅莽，近年參演的角色為大茄居多，加上其太太89年因血癌逝世，與兩名子女關係疏離，無人傾訴之下，難怪羅莽終日鬱鬱不歡。
本周二（27日），記者到電視城問過正在拍攝新劇《女拳》的羅莽，他說：「我依家拍緊兩部電視劇，雖然我係部頭約，但TVB真係俾好多機會我。」記者向他提起飲醉酒而鬧方逸華一事，他激動地說：「冇啲咁嘅事，方小姐係我恩人嚟，我點會咁鬧佢，TVB係我娘家嚟o架！（係咪你飲咗酒唔記得？嗰日你仲對個女仔摸手摸腳喎！）冇啲咁嘅事，我唔答你呢啲問題！」之後隨即返入化妝間。本刊有相為證，希望羅莽經過今次事件，以後少飲為妙。
記者亦問過TVB外事部副總監曾醒明，他說：「公司俾好多機會羅莽，佢飲咗酒可能都唔知自己講乜。呢件事希望警惕佢唔好飲咁多酒，珍惜身體。」

口擘擘亂噏
上周二（20日）凌晨3時許，已飲到醉醺醺的羅莽，盲中中衝入一間本打算打烊的餐廳內，水都冇叫一杯，就坐埋一邊自言自語兼郁手郁腳，身旁的餐廳老闆都唔敢趕佢走。

眼神游離