胡敏珊博物屋曝光古董過百萬　－明星靚相大分享☆

鐘錶界美女、Charmonde老闆及主席胡敏珊，獨居於淺水灣道2,000呎三複式豪宅。很多朋友踏進她的香閨，除了感受到中西合璧巧妙設計外，更大讚她家似博物館！
她笑說：「我係儲物狂，去到外國見到啱嘅家居擺設就會買，我又好鍾意古董，成間屋嘅古董超過一百萬，搞到探我嘅朋友雙眼好唔得閒！」

胡敏珊03年獨資開設鐘錶公司「Charmonde」，代理多隻歐洲名錶，08年更自行設計手錶品牌Chouette，事業更上層樓。由於平日工作忙碌，所以她十分注重家居景觀，年多前便以每月13萬租住淺水灣道三層複式豪宅。她說：「平日做嘢好大壓力，放工返到屋企，希望有一個安樂窩令我完全放鬆。呢度每層樓高15呎，見晒淺水灣景觀，令人心曠神怡，啱晒我要求。其實我自己都有物業，但呢度景觀好靚，又只租不賣，所以惟有租喇！」
身為自創手錶品牌Chouette首席設計師的胡敏珊，家居布置沒有沿用該品牌的bling bling概念，反而相當簡約，「手錶我鍾意同其他品牌玩crossover，而我間屋嘅共通點亦係玩crossover，就係中西合璧。」

第一層大廳
胡敏珊近年鍾情淺水灣，愛新鮮感的她每隔兩年左右就會搬一次屋，但總離不開這個傳統豪宅區，她說：「呢度嘅無敵大海景，令我唔捨得離開呢區。」

胡敏珊三複式豪宅的第一層是客廳和飯廳。客廳天花掛的近萬元giant marble pendant吊燈，胡敏珊認為是極品，「無論日與夜睇都咁靚。」

英國古董電話
從英國搜羅的古董電話，至今仍睇得又用得。

英國古董相架
這個英國純銀古董相架除放上胡敏珊與米妮的合照，下面還有她與媽咪的溫馨合照。

峇里古鏡/中國古董木枱
飯廳的古董長鏡購於峇里，飯枱是古董木配新手工。胡敏珊說：「古木始終較實淨，另外要再搵師傅雕蓮花圖案（圓圖），比起買現成的中式餐枱會貴好多，但勝在有特色。」

古董有獨特美態
胡敏珊豪宅的客廳有西式梳化，飯廳則用上刻有蓮花圖案的中國古董飯枱及餐椅，雖然又中又西，但卻出奇地配合，「我本身接受能力好強，不時自製crossover。中西合璧同黑白配搭，我覺得係長青嘅選擇，幾時都咁啱睇。我又鍾意收藏古董擺設，身邊有啲朋友唔鍾意收藏古董，因為唔知前物主係乜嘢人，但我就冇所謂，只要覺得靚就買，古董可以流傳到今時今日，證明經得起時間考驗，一定有佢美麗獨特之處。」
胡敏珊經常出外公幹，家中很多古董擺設都是從外地搜羅，「我喺香港忙到連行街shopping時間都冇，邊有咁好閒情逸致去睇家品。但係去到外國心情好唔同，可以叫自己放慢步伐慢慢睇。我好多古董都係喺英國、泰國、中國同印尼買嘅，成屋古董都過百萬！」
胡敏珊現時沒有男友，一個人與傭人豪住2,000呎大屋，人氣始終不夠，因此胡敏珊養了一貓二狗，好為家居添生氣，「每次返屋企都有寵物歡迎你，嗰種感覺真係好warm！」

第二層主人房　中國古董櫃
二樓是胡敏珊的睡房，她本來想買古董牀，但一直找不到合心水的，結果有次逛香港的海怡工貿中心，給她遇上這張四柱大牀，她說：「張牀好有古典氣息，配埋我加咗銀箔嘅中國古董牀頭櫃，整體好配合。」

馬德里古董海報
胡敏珊在主人睡房掛了一張從馬德里帶回港的1967年版古董廣告海報，「印象中唔貴，約3萬蚊港幣。」

英國古董盾牌
胡敏珊在二樓樓梯掛了兩塊於英國購買的1866年古董盾牌，「雖然係百年古董，但計落唔貴，每塊只係5萬蚊港幣。」
閨房門口還放了由好友夏永康為她操刀的性感大相。

第三層佛堂
胡敏珊是虔誠的藏傳佛教徒，她於第三層特設佛堂念經。以羊角吊燈配珍藏佛像，大玩中西合璧。

廁所藏泰國雀籠
胡敏珊的品味佈滿全屋，連廁所亦不乏藝術氣息。她從泰國搜羅的古董雀籠配枯枝，別出心裁。

胡敏珊養了老虎狗Puku（左）及西摩狗千千（右），還有一隻英國短毛貓囝囝，組成溫馨四口之家。