屋邨酒樓擺壽宴 48歲商天娥婚前減極唔瘦忽然1周 783期 @ 明星靚相大分享☆

今年10月3日，商天娥將披上嫁衣，與拍拖5年的燈飾商人男友李偉誠(Patrick)拉埋天窗。唔想做「肥美」新娘的她，早在5月初搵營養師制定「減肥修腰」餐，聲言要由150磅減到135磅出席婚禮。
距離婚宴尚有兩個月，上周六(24日)撞啱娥姐48歲生辰，只見她兩餐都在酒樓食肥膩嘢，下午茶時候還買了個蛋糕返家嘆，難怪她雙下巴及肥美身材依舊，睇嚟佢要減磅，真係要再努力啲。

7月24日3:00pm　素顏師奶look
下午3時，娥姐與未婚夫從愛巢出來，到酒樓嘆茶。娥姐一身街坊裝兼踢拖，再加埋個雙下巴，與屋邨師奶無異。
口講不想當「肥美」新娘，要以「流線身形」着婚紗的商天娥，雖然婚期逼近，但記者發現她修身近3個月，但最多只是減了四、五磅而已，距離目標還有一段距離。好彩準夫婿李偉誠講過「鍾意佢有肉，唔使太瘦！」，就算娥姐中了「不瘦降」都冇有怕！
上周六（24日），適逢娥姐48歲生日，她與未婚夫未有如去年般到酒店撐枱腳，反而一日兩餐都幫襯屋邨酒樓，由朝食到晚。當日娥姐不用為《石塘咀如花與大舊勝》舞台劇排戲。下午3時許，素顏的娥姐一身睡衣裝束，與Patrick（李偉誠）由愛巢出來，到柴灣福囍酒樓嘆下午茶。

8:00pm晒兩卡鑽戒
三點在屋邨酒樓下午茶，晚上娥姐又在同一酒樓擺壽宴，執番靚個look，娥姐的星味出番晒嚟！
當晚娥姐化了妝，換了靚衫，手上戴住隻約兩卡的鑽石戒指到酒樓食壽宴。適逢前天23日，傳媒影到她與男友在銅鑼灣辦嫁妝及睇首飾。

壽宴大魚大肉
Patrick為娥姐揀了該酒家的壽宴套餐，菜單有蝦、有斑，仲有雞絲翅等，每圍包埋酒水都係$2,588，相當抵食。不過卡路里一睇就知唔少，難怪娥姐減極都唔達標啦！

菜單
當紅乳豬全體
白灼河蝦
花枝生瑚蚌
香芒海鮮卷
花膠雞絲翅
清蒸大海斑
蠔皇鮮鮑片
鴻運脆皮雞
瑤柱蛋白炒飯
長壽伊麵
生果拼盤及糖水

06年125磅
當年娥姐為貴族纖形做代言人，減到得番125磅，做番個索女。

08年165磅
娥姐拍《師奶股神》時，刻意增肥至165磅，肚腩凸凸，肥師奶形象深入民心。

狂擦8碟點心
拍拖5年，兩人甚有老夫老妻feel，步出寓所後，他們並肩而行，在大街大巷，娥姐貼心為Patrick捽眼屎，然後便孖住到停車場取車。兩人到酒樓時，娥姐的家人原來已一早霸定位等兩人，枱上放有娥姐最愛的蝦蛟、燒賣、粉果同鳳爪……等等高卡路里的點心，差不多有八、九碟。唔偏食的娥姐就碟碟都啱，只見她與家人邊食邊傾，胃口大開，嘆足個多小時才攞車返回鰂魚涌愛巢。
他們步行返家前，娥姐突然在大廈門前向男友撒嬌，Patrick才醒覺買漏嘢，即時補鑊，陪娥姐到附近的Teresa Festival餅店，買了個一磅的生日蛋糕返家切餅。

埋單五千
晚上八時許，Patrick先取車載娥姐家人到柴灣環翠邨的福囍酒家，才折返接娥姐。這趟娥姐終於換過件靚衫化了個淡妝，更戴了隻近兩卡鑽石戒指晒幸福。Patrick知娥姐孝順，愛錫家人，因此今年生日選擇與女方家人一起度過。
當晚娥姐在酒樓訂了房間擺了兩圍壽宴，每圍2,588連加一，埋單5,200元有找。當日所見，娥姐心情靚爆，就算行開行埋講電話都不時笑到甜絲絲。有個咁細心的男友，難怪娥姐心廣體胖！記者致電她，但其手電轉駁到留言信箱，至截稿前仍未回覆。

今年7月145磅

從背面看，娥姐的巨躉似乎是縮了，不過離減肥成功仲有段距離。