遭男友冷落 Hea 后張舒雅醒覺復工忽然1周 783期 @ 明星靚相大分享☆

08年港姐冠軍張舒雅，當選後詐病推job，只顧和補習天王男友趙永康（David）拍拖，因而觸怒無綫將她掟入雪櫃，從此冠上Hea港姐「美譽」。
據知24歲的張舒雅，近日因被男友冷落，終於醒覺事業緊要，鐵定在8月新一屆港姐出爐後復工，對此張舒雅不得不認衰：「選港姐時思想確係唔成熟，之後我會好認真工作！」

Hea足兩年的張舒雅忽然發力，據知是因與補習天王男友趙永康（David）感情出現暗湧所致。知情人士說：「David早前俾人高薪挖角，過檔去新開嘅康橋教育做開荒牛，所以無時間陪女友，張舒雅覺得被冷落，先開始醒覺事業緊要。加上佢九十歲嘅爺爺早排過身，令佢思想成熟咗，唔想再浪費時間，所以叫爹哋幫佢策劃復出做model。」
據知張舒雅早已約滿無綫，現時由其身家過億、從事珠寶生意的父親張敬猷嘅旗下製作公司為她接job，還找來曾幫諸葛梓岐及官恩娜打入日本市場的王友良，為張舒雅進軍日本鋪路。張舒雅在model界雖屬新丁，但因有港姐銜頭，故復出身價已跟名模Mandy Lieu睇齊，一個騷收二萬蚊，其復出頭炮是下月底為澳門賽馬會任頒獎嘉賓，同場還有諸葛梓岐。
上周四下午（22日），記者發現準備復出的張舒雅，離開九龍塘過億大宅，乘的士到附近又一城會合王友良及一名女友人。之後張舒雅到名店為復出添置新裝，王友良不斷從旁俾意見，非常認真。

通知無綫復出
記者上前問張舒雅是否遭男友冷落才打算復出，她並冇否認：「我依家只想專心工作，感情事我一向都唔講。自從爺爺早排過身，第一次經歷親人不在，令我思想成熟咗。依家我諗清楚自己想走嘅方向，所以決定做model。（有無覺得自己之前唔啱？）選緊港姐時思想確係唔成熟，唔知自己想點，所以當選後請假係想俾自己冷靜下。其實之後我都有主動send email通知無綫我可以繼續履行工作，不過佢哋無再俾嘢我做啫。」
張舒雅又否認兩年來hea住度日，「呢兩年我有報讀理大時裝設計課程，根本唔係你哋所講無所事事。（復出有冇通知樂小姐？）無呀，都無佢電話，不過我有通知無綫外事部，之後我會好認真工作，唔想再俾人誤會。」對於張舒雅宣布復出，無綫外事部副總監曾醒明說：「希望佢好好把握機會，喺model界創出一番事業，希望佢珍惜自己擁有嘅一切，同埋要識得關心周圍嘅人。（無綫會唔會搵佢做嘢？）暫時都無呢個打算。」

我會好認真工作！（真實對白）
笑住承認復出轉戰model界的張舒雅，當被記者問她會否hea態復萌時，她即一臉嚴肅地唔認hea：「呢兩年我去咗讀書，無hea過。」

前年張舒雅只顧與補習天王男友David拍拖，有job唔做，搞到俾無綫雪藏，港姐前途斷送。