李莉莉三級女星洗盡鉛華　李莉莉千萬買山種橙忽然1周 784期－明星靚相大分享☆

現時o靚模當道，但在80、90年代是三級女星天下，當時艷星如李莉莉、麥家琪等都紅極一時。
但隨住三級片沒落，近年艷星紛紛轉型或嫁人，洗盡鉛華。當中阿伯殺手李莉莉竟轉型務農，到江西買山種橙，令人意外。

80年代艷星雲集，李莉莉能夠在對手葉子楣、葉玉卿中突圍而出，除同樣狂晒事業線外，最關鍵是她騎呢舉動多多，永遠帶給人「驚喜」。她在96年下嫁商人麥競敏後息影，05年復出，為了宣傳自己，她更到迪士尼公園大玩「騷波拱橋」，可惜聲勢麻麻，之後又再銷聲匿跡。
原來李莉莉近年一直在內地居住，而且做了山寨女王，轉型務農。去年她在江西買下三個均有一千畝大（一畝為6,666平方呎）的山頭，今年初開始在其中兩個山頭種植新品種紅肉橙。

請60個工人
李莉莉說：「我睇準近年內地興食紅肉橙，因為種紅肉橙三年先有收成，所以一定要大量種先有錢賺。我估計三年之後每一百五十畝地就約有7萬斤橙收成（一斤約有兩個橙），跟住第四年收成會增至三倍，第五年更加去到近100萬斤，到時賣去內地批發市場，就算賣人民幣一蚊至個半一斤，毛利都好可觀。」三年後至有收成，呢段時間李莉莉靠咩維生？「呢段時間我種有機西瓜、苦瓜，個零月就有收成，收入都唔錯（賺到幾多？）總之維到生啦！咁上年底都有拍套內地片《引狼入室》！」個戲名咁似三級片！「唔係，係動作片。今時今日我仲點拍性感戲！」
究竟同男主角床上肉搏辛苦啲，還是揸鋤頭辛苦？李莉莉說：「梗係依家辛苦啲，雖然我請咗六十個農夫，但我都要監工，不過我好鍾意大自然，所以好有滿足感，務農會係我終生事業。」

至激檔案
今年40歲的李莉莉，89年獲選澳門小姐季軍後來港發展，以騎呢見稱。她曾在美的空調廣告高呼：「我要，我要呀！」和推出唱片《我要你每夜陪住我》，從此被冠以「阿伯殺手」稱號。她拍過的三級電影有《精裝情不自禁》、《性愛韋小寶之玩女大王》等。圖為她在95年推出的寫真集。

麥家琪甘當慈母
擁有35E的麥家琪，是E神始祖，由影全裸相至剃光頭拍三級片，都唔激唔做。不過自三年前誕下長子Johan後，即從此收埋胸口做慈母，更不理驕人身材走樣，樂做生仔機器，半個月前再誕下次子Enoch。
無意復出的麥家琪跟張栢芝一樣，就係未來兩年會繼續生。「生完第一個仔，我發覺原來好鍾意小朋友，所以好想生夠三個。我依家好享受做湊仔婆，為咗仔女我可以放低事業，斷晒社交生活，連打扮嘅心機都無，所以根本唔介意身材走樣。」因此她說由生育前110磅到依家130磅都無所謂。

三歲的大仔Johan性格精靈，經常o氹媽咪麥家琪開心。問家琪將來怎樣告訴兒子自己曾是三級艷星，她說：「我會同佢講，每個人都會做錯事，雖然回望過去，都覺得入錯行，但總算係一個經歷，呢個反而係我教導下一代嘅好題材，所以我奉勸班o靚模，真係唔好咁短視。」

至激檔案
今年35歲的麥家琪， 93年港姐出身，因擁有35E、24、34的魔鬼身材，出道不久便成影壇艷星，與同期的彭丹、關秀媚等爭艷鬥麗。02年，她盡地一煲剃光頭與吳彥祖拍三級片《偷窺無罪》（右圖），片中她全裸上陣，但堅持三點不露。

陳昭昭生產清潔用品
陳昭昭在TVB星運平平，02年她一露而成為性感女星，拍過《慾望之城》和《人頭豆腐湯》等。陳昭昭說：「你依家問我有冇後悔做艷星，我一啲都冇，我讀完藝訓班一直無所事事，直到黎民卓叫我行性感先有人識，但我好慶幸自己無露點。」
性感有限期，2004年昭昭事業下滑，又做人二奶，人生陷入谷底。「嗰段時間我患咗抑鬱症，瘦到得80幾磅，加上肺癆病心情就更差。點知我喺一次聚會見到施熙瑜，佢同我傳道，又叫我去食飯，我覺得唔使錢咪去吓囉。點知宗教解開咗我嘅問題，當時我已經做緊生意，公司嘅大老闆係我男朋友，但佢有老婆，而我係二奶。牧師叫我放手，因為呢樣嘢唔屬於我，但分手等於拆伙，失去經濟支柱，但我最後都決定分手同信主。」
自此昭昭便幫父親打理清潔用品公司，她到工廠大廈拍門搵生意，擴闊客路。近年她又和美國環保清潔用品公司合作，在中山設廠房生產清潔用品，更向百佳超級市場的自家品牌「佳之選」供應漂白水和洗衣粉，業務發展順利。做生意令昭昭在中港兩地廣結政經人脈，她曾任香港中華文化總會副監事長、中山社團聯會2009-10會長等，09年還應菲律賓格洛氏和平會邀請，出任中國區評審人，與名人趙曾學韞出席頒獎禮。「呢幾年我坦然咗，我唔再怕其他人嘅眼光，依家有人問以前嘅嘢，我會同佢講我係陳昭昭，依家已經轉咗行，請多多指教。」

至激檔案
今年35歲的陳昭昭，17歲被星探發掘當模特兒，97年入讀無綫11期藝員訓練中心。00年1月被有線選為成人節目《性在任你call》主持，其後更一脫求生，至激作為電影《人頭豆腐湯》，但仍能力保三點不露。

顏仟汶打理餐廳
拍過無數三級片的顏仟汶（仟仟），今時今日卸下濃妝麗服，甘心在有股份的西貢餐廳當「阿四」，無論埋數或是洗杯碟，她亦會一腳踢。
背着三級女星這個稱號，顏仟汶說當然有壓力，但為了生活沒辦法，「98年爸爸患食道癌，我每日朝10晚10咁照顧佢。當年細佬妹又細，我要養家，俾亞視炒魷係會好徬徨，咁啱又有人搵咪拍囉，為生活嘛。」不過，對於拍過三級片，她不會說後悔，「始終係自己嘅選擇，冇人迫。我本身冇乜鬥心，機會都係自己搵上門，到03年打後電影市道低沉，我就自然淡出。」
停拍三級片，她投資十多萬於西貢開飾物店，04年好友又邀請她到餐廳幫手，她說：「當年我嘅男友（現任丈夫）喺餐廳做經理，後嚟佢轉做文職，我咪嚟幫手囉，之後仲入埋股㖭。做餐廳要拋頭露面，但好彩我冇乜心理包袱，就算俾人眼望望，我都係嘢照做，依家熟客對我當然見怪不怪，好多仲做埋朋友。」
自詡不貪錢的仟仟，對於現狀尚算滿意，「08年我同男友結婚。我同佢拍拖時，係我最紅嘅時期，如果我係貪錢就唔揀佢啦。我最開心係老爺奶奶都好錫我，佢哋從來唔提我拍過嘅戲，仲叫我唔使理其他人點睇。」

至激檔案
今年40歲的顏仟汶，89年考入無綫專業製作訓練班，97年轉投亞視。00年因拍攝性感相被亞視炒魷，後恃細細粒擁D級的驕人身段，盡地一煲接拍三級片，其中《野性新人類II失憶性行為》及《聊齋誌異之孽慾孤鬼》更是三點盡露。

轉型務農
李莉莉豪花千萬買山種橙，問她錢從何來，她即懶神秘說：「早幾年喺深圳做地產投資有啲斬獲咁囉！賺咗幾多？唔……都係唔想透露。」她身後的柳橙樹，是山頭原有的。