臨近台慶，無綫將會連推三部重頭劇為台慶造勢，分別係林峯孭飛嘅《摘星之旅》、陳豪、佘詩曼嘅《公主嫁到》以及黎耀祥、鄧萃雯嘅《巾幗梟雄之義海豪情》。
打頭陣嘅《摘星之旅》，係無綫同大陸SMG（上海文廣新聞集團）合作拍攝。07年香港回歸十周年時，無綫同央視曾合作拍《歲月風雲》，該劇以家族汽車製造業為背景，今次《摘》則以電器業為主線。內容一貫TVB劇集方程式：爭名、爭利、爭女。卡士方面，《摘》除林峯外，仲有黃宗澤、劉松仁及葉童。大陸女星趙子琪破天荒成為第一個內地女星擔任無綫劇集嘅女主角，算有少少新鮮感。
30集嘅《摘星之旅》，除趙子琪外，其他演員幾乎都係沿用番《歲月風雲》嘅班底。故事以大陸一個電器業巨子家族鬥爭再加四角戀為主。
林峯飾演嘅海星同阿媽何蕙心（呂有慧飾）合力經營一間家電廠，但勢利嘅阿叔海亮（劉松仁飾）卻欲進行惡性收購。後因得到阿嬸鄭明珠（葉童飾）及海美思（梁靖琪飾）兩母女為海星求情，海亮才答應暫緩收購計劃。其實海亮志不在家電廠，廠房嘅地皮先係佢最終目標。海亮更暗中安插一個叫方麗京（趙子琪）嘅商業女間諜到工廠竊取「情報」。最後，何蕙心為阻止海亮繼續對付海星，逼住向他揭露一件驚人秘密。
另方面，海星為要保存其父產業，搵到好朋友鍾林大（黃宗澤飾）入海氏，諗住兩兄弟並肩作戰對抗海亮。誰不知鍾林大根本就係一隻嗜血成性嘅餓狼，不單出賣海星，更利用海美思嘅感情進行奪產計劃。
最後，海星跟林大為愛情、為財產展開連場商戰廝殺。
林峯摘星有難度
有傳無綫將《摘星之旅》作為三套重頭劇之首，安排8月頭黃金時段播，有意造就林峯今年坐上視帝寶座。但《公主嫁到》有陳豪，而舊年憑柴九一角榮登視帝嘅黎耀祥更不容忽視。假若選舉真係公開、公平、公正嘅話， 林峯今次摘星有難度。
人物關係
《摘星之旅》雖然人物眾多，但內容以家族及商戰為主，所以角色關係不算太複雜。
播映日期：8月9日起周一至周五晚8:30pm翡翠及高清翡翠台
受到無綫力捧，紅到發紫嘅林峯，喺《摘》劇入面飾演電器業太子爺海星（中），本來同老死黃宗澤飾演嘅鍾林大（左）合作打天下，最後卻因女主角趙子琪（右）介入以致兄弟反目成仇。
黃宗澤狼子野心，為名利、權勢，不惜拋棄未婚妻宋汶霏飾演嘅祝耀群（圖），另娶梁靖琪飾演嘅海美恩。
林峯看穿黃宗澤只係利用梁靖琪而非真心愛佢，為力保同父異母之妹，不惜跟黃展開惡鬥。
奸到出汗嘅黃宗澤，不單奪產，最後連老謀深算嘅劉松仁（海亮）都死喺佢手上。
黃宗澤雖然無惡不作，唯對老竇林嘉華飾嘅鍾建成孝順有加。
劉松仁為要達到目的，安插趙子琪飾演嘅方麗京到工廠搗亂。
留言列表
