Geek友講場

見到尾燈先算贏　夜行單車 Light Painting

雖然成日話一代不如一代，但自從去年「反國教」到今年「七一遊行」，其實唔少香港新一代都幾陽光，得閒更會去遠足、行山、踩單車，唔一定只沉迷唱 K、 clubbing。講到踩單車更愈玩愈刁鑽，日頭有人玩 mountain bike，到咗夜晚，除入吐露港踩夜車外，更有人創新將 light painting夾埋踩夜車，變身「單車 light painting」。呢個新玩法，唔鬥快，只講技術，真正見到尾燈先算贏。

笛子魔童：「當年孫悟空都俾我用魔貫光殺炮射過！」 

實試地點：吐露港單車徑

今次記者入黑帶住 model去到近科學園嘅吐露港單車徑路段做實測，貪佢平路好踩，道路夠闊，有空間畀兩個人一齊 painting；而且微光環境更易見到彩虹效果。上面張「魔貫光殺炮」式嘅 pattern，前前後後影咗成個鐘，踩到身水身汗先完成，想知有乜秘訣，後面話你知！

頭 D尾燈

《 FACE》 Gadget版監修人 903 DJ Donald 

單車玩 light painting好靚呀！因為香港地方比較細，可以踩單車的地方有限，來來去去都是同樣地方好快會悶，假如可以找一些新點子去增加單車樂趣也不錯。看到這位哥仔示範也心郁郁呢！唔好講咁多，吐露港見，一齊用單車玩《阿基拉》同《頭文字 D》的尾燈啦！

發起人 Will Cho：「我想試星空 light painting」

講到喺香港玩單車 light painting，原來發起人 Will Cho本身係一位專門拍攝星空嘅攝影師，而為咗單車 light painting玩法，佢將會參與沙田新城市廣場「 NEW TOWN RIDER綠逐義行——主題騎行之旅」活動，並喺其中一個路段教大家影相同欣賞沙田夜空。

Q：點解諗到單車 light painting呢個玩法？
A：其實自己上網都有留意到外國玩 light painting已玩到出神入化，但香港似乎因空間、場地有限，所以最多都係寫吓字、畫吓圖案，於是兩個月前開始諗有乜新方法，可以喺香港容易做到之餘又夠新鮮感，於是就試玩單車 light painting。

Q：咁佢同傳統 light painting有乜大分別？
A：最大分別係要結合單車先做到，其實咁樣仲好玩，因為𠵱家好多人夜晚踩單車，可能需要嘅裝備都已經有齊，隨時隨地就玩得。不過當中都有少少技巧，我初初都試咗好多次先有理想效果，𠵱家當然更熟手啦！

Q：除咗單車之外，仲有冇乜嘢 light painting玩法想試？
A：單車之外，我當然想試吓配合銀河星空去影啦，平時影風景、夜景、星空、銀河就好多，影星星流動或者銀河嘅神秘美感都有。但從未試過將 light painting同星空結合，香港好似都未有人試過。

最初嘅示範作品，光線流暢之餘，甚至見到少少樣，絕對唔易，而且 Will仲話拍攝呢張相嘅時候仲落雨添！ 

Will Cho唔似一般 80後攝影師咁鍾意影靚女，反而比較專注星空夜攝，上網隨便都搵到唔少佢嘅作品。（攝於香港大東山） 

另一張測試作品，只留低光線，人影都唔見，唔算完美。

NEW TOWN RIDER綠逐義行—主題騎行之旅

日期： 8月 17至 10月 5日（指定星期六）
時間： 3:00pm至 8:00pm
名額：每團 20人
費用：於沙田新城市廣場作任何消費，再加$220報名費。
（費用包括雨衣、路線導賞服務、團體意外保險與及單車、安全頭盔、夜間騎乘配備、寄存物件儲物櫃租借。）
查詢：新城市廣場（ http://www.newtownplaza.com.hk ）

事前準備夠簡單

單車 light painting雖然係新玩意，但其實事前準備唔算太複雜。如果你本身已經有單車同數碼相機的話，只需要添置$100左右嘅工具，就即刻可以玩。

慢快門 DC

相機方面都有要求， Will：「傻瓜機、手機都好難做到，最好係有 B快門嘅數碼相機。至少都要可以調校快門速度嘅 DC先得。」而 Will嘅愛機就係 Sony無反 NEX-5N，佢支援 B快門同高感光，加埋內置閃光燈，已經夠用。

必備腳架

既然要慢快門、長時間曝光，腳架當然唔少得，一般國內款式定名牌炭纖腳都冇所謂，只係輕重有分別，價錢由$200-$4,000不等。

LED光度強

要玩單車 light painting，一般螢光棒、電筒仔全部唔夠光，阿 Will推薦呢種喺鴨寮街搵到嘅條狀 LED。「佢係一排 LED，可以貼實部單車。呢隻 LED仲有一個遙控做開關，可以變唔同顏色，但小心太光影響途人，最好玩 painting時先開！」售價：約$100

搵定平路

環境都要留意，好似呢度又窄又要上斜，搵單車高手黃金寶都未必做到理想效果！新手最好喺平坦單車徑試試先，但要留意交通情況。

激試夜車留光影

step 1
首先當然要裝番拍攝用嘅燈喺單車上，以今次示範嘅 LED燈為例，貼上去時見光愈多愈好，所以最好拉直佢。

step 2
單人拍攝可以 free style，而兩個人玩， Will都係第一次，所以事前同 model傾定行走路線，以免碰撞。至於點踩就冇一定方法，今次就試玩交錯轉彎方式。

step 3
相機只要設定好 B快門模式，即係用手動操控相機快門曝光時間，之後同一般影相方式一樣，對準單車行駛路線後按下快門拍攝，最後再放開快門就可以等睇相。如果相機冇 B快門，都可以用快門先決，並調到 20至 30秒時間就夠。

step 4
Will仲有一個心得，為防曝光時間太長，相片有過曝問題。佢偏愛喺鏡頭外加一塊減光濾鏡，令光影線條更突出，環境又唔會變得太光影響效果。

step 5
完成！喺 B快門模式設置閃光燈後，閃光燈會喺你隻手指放開快門一刻 flash。利用呢個方法，當 model經過鏡頭前即放開快門，咁就可以影到少少殘影留低。

模特兒 Una「比想像中困難」

「好得意呀！雖然踩咗 3個幾 4個鐘，但唔算好辛苦，不過要影得靚就真係好花時間，攝影師、踩車嘅人都好重要。比想像中困難好多，但見到張相效果好靚，辛苦都抵！」

Light painting手機 app

一般智能手機原生冇慢快門功能，影唔到 light painting，好在家陣勁多手機 app幫手。好似呢個《 Light Painting/Strokes Camera》就話專為影 light painting而設，雖然影單車 light painting都唔係好掂，但一般寫字、影夜晚公路等都幾有 feel，可以一試。

Light Painting/Strokes Camera
Android
售價：$15

溫故知新　港人最愛 light painting寫字

其實 light painting熱潮已喺香港 hit咗幾年，最傳統亦係最多人鍾意玩嘅影法，就係拎住支電筒喺相中寫字。由於呢種相包含住 light painting最基本嘅技巧，所以筆者請嚟香港其中一個最早玩呢種影法嘅達人 Alex（攝影入門網站 Fotobeginner.com創辦人）再次傳授心得，畀大家重溫一下。

逐隻字寫易夾位

就以 FACE字為例， Alex話無論一個人寫晒，或者 4個人每人各寫 1個字母都得，但要字距同高低都準的話，後者會易夾啲。若然只得 1個人， set好腳架分 4次影，每次只影 1個字母，事後再用 Photoshop key埋一齊，亦未嘗不可。

後簾閃燈

唔開閃燈的話，個人影出嚟就會好似呢張相咁變鬼影；若想好似大相咁人同字都咁清楚，就要用後簾同步閃燈（一般 Prosumer級 DC、無反、單反都有此功能），影完筆劃後再閃燈影人。

反轉寫字

寫字時最緊要係反轉寫，否則影出嚟成個字就會調轉。同埋例如寫 F字，寫完「 7」後上番去寫下面一劃時，記住要沿番直線畫上去，或者熄電筒斷筆，咁先唔會畫花個字。

收細光圈

影 light painting最方便係用 B快門任意曝光，光圈就愈細愈好，字體會更清晰，若想見多啲背景，則可推高 ISO至 800或以上。

Alex個網站 Fotobeginner.com亦有不定期舉辦 light painting課程，想影得專業啲的話，不妨留意住佢個網站幾時開班。

抽象 light painting　向世界高手偷師

不過近年全球 light painting風氣都有啲轉變，改為流行用光描繪不規則 pattern，多於寫字同畫啲實質圖案或公仔，影出嚟張相會似足抽象畫，美感十足，就算隔多幾年睇都唔會覺得 out。不過影呢類 light painting，唔只難度增加，更需要有唔同道具輔助。網上流傳住唔少外國高手作品，真係睇到嘆為觀止，所以筆者繼續請 Alex為大家分析啲相到底係點影，大家睇完都可以跟住試吓影，向神級作品之路出發！

香港阿 Will諗到用單車玩光影塗鴉已經夠特別，但原來加拿大 light painting大師 Patrick Rochon已經玩到落海，喺 wakeboard上掛上 LED燈嚟畫畫，再加埋凌空翻騰動作，畫面更加震撼！ Alex認為影呢輯相嘅技術同單車 light painting差唔多，唔算難影，亦相信係一 take過，用 Photoshop後期加工反而仲麻煩。

就算影得 wide啲， Alex話最難都只係個 wakeboard玩家要滑到靚嘅 path出嚟。至於彩色燈光，只需喺 wakeboard上裝上彩色 LED燈就得。
出處： http://www.patrickrochon.com 

光軌圍住單車爆出幼小光線，效果勁靚，但 Alex話原來唔難影，只需拎住支煙花繞住單車畫一個圈就得，最大問題只係香港唔畀放煙花。
出處： http://www.empowernetwork.com/mgonzzalez/blog/art-lighting 

呢幅相出自兩位美國攝影師嘅 Neon Luminance Project， Alex話佢哋應該係將高光度螢光棒掟入瀑布中任意飄流，影出嚟就捕捉到光源喺水中流動嘅美態。
出處： http://www.fromthelenz.com/luminance 

呢幅將光畫到似煙又係點整呢？ Alex話只要透過控制發光工具嘅光度、角度同影相曝光時間，就能令相中光軌出現明暗變化，睇落似煙咁有漸變，有需要時仲可以畫幾次添，畫之時震動多啲都會更加似煙。
出處： http://sourzu.deviantart.com 

英國攝影師 Atton Conrad更玩到用 light paintig嚟畫婚紗，不過 Alex話張相係 model同裙分開影，再 key埋一齊，因為 model雙手好 sharp，完全冇被光覆蓋，亦根本冇手自己畫裙。至於裙上 3條橫間，應該係預先用黑膠紙遮住部分光管，咁樣一畫出嚟就會有橫間。
出處： http://www.attonconrad.com 

撰文：熊俊彥、陳兆奇
攝影：葉偉豪、傅新發
模特兒： Una@Model One、 Renee@Starz People
鳴謝：香港單車專門店