明星靚相大分享☆

Stephy自稱聖誕冇搵小方，連上月 26日艾粒騷都寧願單拖唔約對方睇，她說：「冇喎，我淨係約自己啲朋友食飯，我都冇送禮物畀佢啫！」拆檔有影捉！ 封面
被撇反轉豬肚　方力申狂打 Stephy毒針
2010年01月06日
鄧麗欣（ Stephy）自從踢走死敵傅穎（ Theresa），坐正金牌大風一姐後，即刻買樓買車請司機，係威係勢。
死敵敗走， Stephy皇太后上身，新碟新書樣樣多要求，最估唔到係竟嫌前男友方力申阻佢發達，向公司提出「拆檔」要求。
你無情，小方亦無義，即時向太子基（鄭中基）打毒針數臭 Stephy為人霸道，又孖埋其他同們兄妹齊齊玩杯葛，將 Stephy塑造成傅穎第二頓成金牌箭靶。
情人變仇人，問 Stephy新年有冇搵小方，佢竟說：「冇喎，我淨係約自己啲朋友食飯！」堅係轉晒口風喎！
成為金牌一姐， Stephy 09年尾推出新曲加精選碟《 Music Cafe》，公司出動貼滿佢靚樣海報嘅宣傳車，兜勻全港造勢，又搵埋緋聞男友方力申合唱〈七年〉，實行為 26歲 Stephy谷行 turbo。
表面情侶檔，但據知 Stephy自去年 4月 29歲小方狼溝 18歲 o靚模 Rainbow通天後，冇面 Stephy嫌小方花心死性不改，故兩人關係於去年中淡出，加上 Stephy見谷極唔及傅穎多宅男粉絲，認定小方搭沉船，遂主動要求「拆檔」。知情者說：「佢話成日情侶檔好悶，又話令佢冇咗電車男粉絲，所以同公司講唔想再同小方孖住喎！」

金牌音樂總監雷頌德訓示：「 Paco又轉埋部門，搞到我好似冇晒戰友，不過金牌大風唔係打風，只係改名啫，大家努力啦，唔好搞咁多無謂嘢！」
 
金牌 CEO陳輝虹暗寸：「 Stephy一向多意見，（拆檔）條路係佢自己揀，佢想點咪點囉，合作咁耐，都唔係件壞事啫，不過最終決定權都喺公司度！」

此情不再

06年小方同 Stephy孖住拍《獨家試愛》演情侶，二人當時仲係拍住拖激吻好自然，票房亦勁收 700萬，之後二人再接多兩套《十分愛》同《我的最愛》，票房都有 1,200萬，不過家陣拆夥，應該冇呢支歌仔唱囉喎！

小方同太子鄭中基好老死，除咗工作外又成日齊齊孖住夜蒲，小方打毒針，鄭中基梗係要同 CEO陳輝虹單兩聲，難怪 CEO講嘢咁有骨。

壓軸出
聖誕前傅穎同 Stephy前後腳出現名表活動，傅穎同師姐劉心悠壓軸出場搞到 Stephy好冇癮，問到傅穎有冇送聖誕禮物畀對方，佢話：「我 forward（轉寄）咗電子聖誕咭畀佢！」環保到呢！

防火牆
Theresa收 3萬，自己袋 0蚊，難怪大合照時 Stephy就搵表后胡敏珊同劉心悠做人牆，問 Stephy知唔知死敵有錢收，佢話：「人哋公司嘅事我唔知喎！」

詐聾閃
記者要求 Stephy（箭嘴）同 Theresa合照，不過二人詐聾， Stephy口就嗌咗句：「吓！」腳就唔停極速閃人。

0蚊接 job
Stephy在公在私決絕斬纜，被撇小方心生不忿，向老死金牌太子鄭中基打毒針。知情者續說：「佢同 Ronald講：『情侶檔有咩唔好先，講真大家都搵錢啫，家佢想點就點，咁大間公司佢話晒事咩，你估佢真係一姐呀！』加上小方又拉攏梁漢文同 Kary（吳雨霏）齊齊玩杯葛，咁 Kary又一直埋怨公司偏心 Stephy，容乜易企埋同一陣線，其實之前佢哋都係咁孤立 Theresa啦，家輪到 Stephy受番囉！」
除不滿小方拖累，原來 Stephy亦對金牌有不滿，早前佢應表界靚女胡敏珊邀請出席新店開幕，同場跟死敵 Theresa撞到正， Stephy當場打個突，知情者說：「 Christie（胡敏珊英文名）出 3萬請 Theresa同劉心悠出席， Stephy就冇錢收！仲要 Stephy唔知 Theresa都有份，一心諗住自己做主角，點知 Theresa陰招遲到變壓軸， Stephy淪為阿二，梗係火啦！」
上週三（上月 30日） Stephy向本刊承認：「個活動係冇收錢，公司同胡敏珊好 friend，佢送咗好多表畀我哋，所以冇所謂啦！」至於問到她新年有冇搵小方， Stephy則斬釘：「冇喎，聖誕新年我都好忙，我淨係約自己啲朋友食飯！」而金牌大風 CEO陳輝虹亦承認：「佢哋今年會分開做，佢（ Stephy）一向多意見，（拆檔）條路係佢自己揀，佢想點咪點囉！」高處不勝寒，金牌一姐，小心大風吹呀！

08年 Stephy以 bob頭中國衫唱〈中華冷面〉，結果俾網友批似紙紮公仔，唔知呢個 look係咪佢自己度呢？

鄧升呢
金牌冇大將， Stephy執到個金牌一姐，雖然出身屯門屋邨，不過做得一姐當然要用番啲靚嘢襯！踢走 Theresa連環買新樓換新車，好似好富貴。
住得豪　香港仔南灣御園高層 A座單位約 937平方呎　市值約 700萬
揸靚車　寶馬 130IA Hatch Back　約 40萬（圖為同款寶馬）

金牌三國志

太子基上位，原本得勢 Stephy碼住小方要風得風，合力發功迫走眼中釘 Theresa，不過死敵一走，小圈子竟然重新再鬥過， Stephy變新箭靶。金牌大風，真係吹到亂晒龍！
Rainbow搞散方力申
Stephy同方力申 03年開始傳緋聞，原本拍拖有 noise又多 job，不過方力申近年緋聞纏身，去年再衰多單偷食 o靚模 Rainbow，形象插晒水， Stephy梗係唔妥啦！關係起跌似過山車！
撻着期
03年 10月，有傳方力申同 Stephy同公司日久生情，男方更被拍得為女友碌咭找數， Stephy話：「以前覺得佢唔多說話，原來佢好健談、人品好，我哋好傾得埋。」
甜蜜期
拍拖緋聞傳出後， 2人密密拍住拖搵真銀合作， Stephy同方力申出席結婚騷時仲話：「我不時都有結婚衝動！」
冰封期
05年有傳方力申先後暗交 Theresa（傅穎）及與阿嬌（鍾欣桐）遊瑞士，兩女爭一男，戀情告急，最終方力申重投 Stephy懷抱，至 07年有傳方力申翻撻阿嬌， Stephy即時為方力申澄清：「佢都冇話係！」
出事期
去年初《美女廚房 2》搞美少女廚神爭霸戰，第 1集就有 17歲美少女廚神 Rainbow同方力申交換電話 SMS密密傾，方力申疑似飛擒大咬。 Rainbow仲話：「我對佢有 feel！」
割蓆期
09年，金牌「打大風」， Stephy踢走 Theresa後，有傳佢想再踢走 Kary獨大，方力申出席同 Stephy合唱歌〈七年〉首播會上明寸佢：「 Stephy教新人時好有一姐風範！」正式決裂。

撻着期

甜蜜期

冰封期

出事期

割蓆期

走得快

喺新公司好開心！真實對白

小方反目成仇將 Stephy變為公司新箭靶， Theresa話：「我家喺新公司（星皓）好開心，舊公司嘅事我唔清楚，亦唔想講。」對於有傳 Stephy做嘢霸道， Theresa話：「大家都係做嘢啫！」傅穎走得快，家陣咪食花生等睇戲囉！

單飛即仆

孖住上煞食，不過 Stephy同方力申單飛就唔多掂，才女出書錯字濕滯，拍戲單飛一樣冇運行，千萬票房靈藥都變毒藥。
口述當寫書？

升呢一姐 Stephy《陪着我走》被踢過百錯字，上月再出版甜品書《心甜 Stephy》（左），雖然字少圖多，不過有傳部分撰文係口述再由出版社代筆， Stephy口窒窒話：「吓，的確今次我唔敢再用電腦打字，全部用手寫交畀出版社。（係咪部分係口述？）唔……冇呀！」而負責製作的世界出版社營業部梁小姐則說：「 Stephy係用口交代咗好多嘢（咁係咪即係你哋筆錄呀）吓……咁……又唔係。」
採訪、撰文、攝影：娛樂組
部分圖片：《蘋果日報》