過去三十年，香港的男女比例持續下降，由八十年代的一比一點幾，至一○年每千名女性，只得九百四十九名男士。怕「嫁唔出」的港女想捷足先登搵筍盤，怕醜港男則想快人一步搵女朋友，令「極速約會」（speed dating）應運而生。派對上的男男女女藉此認識新朋友，希望一擊即中，找到終生伴侶。
「Perfect Matching」及「Speedmate」黃浩然、「Speed Dating FEVER」黃新發及「214 Dating」Tammy Chan，三位極速約會公司的老闆，各憑自己一套撒手鐧，在「相睇界」鬥個你死我活搵真銀。
Perfect Matching和Speedmate舉辦的除夕派對，參加者均高興得狂歡熱舞。
灣仔一幢商業大廈頂樓衣香鬢影，逾百名男女悉心打扮參與歡度除夕夜的「極速約會」派對。會場內分成十多組，每組男女人數相若，大部分人起初頗為拘謹。活動司儀Perfect Matching和Speedmate老闆黃浩然見狀，遂搞搞氣氛，要求男士起身介紹自己。
這時現場仍有些人「郁都唔郁」，黃浩然再要求男士「車輪轉」，走到其他組的女士面前自我介紹，之後更來個「大兜亂」環節，男男女女均可隨意尋找心儀對象。踏正凌晨零時，眾人一齊倒數兼欣賞煙花，營造浪漫氣氛。派對完結，各參加者交換聯絡方法後，陸續離場。
三十二歲的黃浩然，原本任職大學社會科學研究助理，幾個月前「處男下海」參加極速約會，可惜「食白果」收場，卻意外發現相睇是大商機，遂化「悲憤」為力量走出象牙塔，去年八月獨資十三萬元，購入Perfect Matching及Speedmate兩間公司，全職發展「相睇事業」。
不少專業人士人際網絡較窄，需要參加極速約會才能認識異性。
「兩間公司被收購前都有些錢賺，但正在走下坡。賣家透露以前搞的大型活動參加人數不多，好似除夕晚會，只有三十幾人，聖誕亦只有八十人，我認為有很大改善空間。」
極速約會行業競爭激烈，黃浩然的致勝之道卻很簡單，就是一味靠「平」。「例如除夕派對，包三杯飲品跟小食，個場又大又有老師帶舞，每人都只是收一百八十幾蚊。」
要鬥平搶客，一切由控制成本入手。為減省行政費用，黃浩然堅持「一腳踢」，例如只聘請一名兼職助理幫手打電話。至於舉辦極速約會最大的開支，莫過於場地租金和飲食費用，所以他選址非常謹慎。「以除夕晚會為例，要找容納百人的地方不易，最後經朋友揀了一個大型舞蹈室，一晚四個鐘租金約八千蚊，比酒店平一半以上！」酒水及小食方面，他亦走遍港九大小超市才「拍板」入貨。
黃浩然由學院助理搖身一變成為極速約會搞手，感受良多。
留言列表
