《真情》內破壞安仔與Joan感情的羅生津，刁蠻任性、不擇手段、謊話連篇，即使只在一套劇集中出現，已令飾演者梁珮盈深入民心，你和我也忘不了她。

有人說，「戲如人生」，但梁珮盈卻恰好相反！退出幕前十多年，她既已轉型文職工作，又為一子之母，更親度育兒歷程，八個月教flash card，歲半教砌圖，兩歲教睇書，三歲教講故事。

如今四歲的兒子口齒伶俐，A至Z倒背如流，還每事問熱情如火，「我為咗佢，睇咗好多書學點樣湊仔，依家我每日都會用本簿記低佢嘅功過，由佢自己把口講出當日做咗啲咩嘢啱同錯嘅事，培養佢自我反省同肯承擔錯誤嘅性格，我淨係想佢做一個明白事理嘅小朋友咋！」梁珮盈眨眨大眼、揚起嘴嘴角說。

Tomson性格活潑又熱情，又喜擺甫士Chok出面，難怪成為家中萬千寵愛的小豆丁。

親自督導

對兒子沒有宏大的期望，也沒有緊隨潮流訂下一套名校攻略，梁珮盈只單純的想盡母親的責任，在工餘時間灌輸兒子知識，「我九八年選港姐之前教過半年幼稚園，一向都好鍾意小朋友，有咗囝囝之後，就用番以前教幼稚園嘅方法去教佢囉！不過講真，以前我唔鍾意睇書，但由懷孕開始，就不斷睇啲嬰兒書，又上網搵吓啲營養食譜，例如囝囝咳喎，有咩湯療好呢？食啲咩可以快高長大呢？」梁珮盈如數家珍地說。

她的兒子叫尹梓浩，英文名Tomson，今年四歲；丈夫Tommy，為娛樂雜誌的老總；○四年結婚，○七年產子，一切順應計劃進行。「生囝囝時，老爺年紀都大喇，加上老公嗰邊嘅四兄弟全部講明唔生，我諗都係時候要傳宗接代喇；不過，嗰陣佗咗五個月先敢同老爺奶奶講，驚有咩意外，老人家接受唔到吖嘛，結果係仔，收得工囉！」

梁珮盈育有一名四歲的兒子Tomson，在擔任文職工作的同時，仍每晚抽時間跟兒子說故事、談談天，妥善分配時間。

梁珮盈認為養育兒子是一項極艱巨的任務，絕對需要時間和精力，所以「一個夠晒數」了！「囝囝八個月嗰陣，我就成日抱佢入房，同佢講故事、唱兒歌，又同佢玩flash card，係咁拎住張卡讀個字畀佢聽；到佢九個月開始，仲未識講嘢o架，我就擺晒啲卡出嚟，叫佢抽個『apple』出嚟，佢真係拎到出嚟o架喎。到一歲幾喇，我開始同佢玩砌積木呀、砌圖呀，培養佢個專注力，佢每次完成一幅拼圖，都好有滿足感o架！到咗三歲，佢已經識將A至Z倒轉背默出嚟！我又鍾意同佢講完一個故事之後，叫佢講番一次畀我聽，一嚟佢對個故事嘅印象會深刻啲，二嚟亦提高咗佢嘅理解能力！」梁珮盈滿臉自信地說。