明星靚相大分享☆

你癲夠未呀！（真實對白）

Neway大細新抱陳法拉同諸葛梓岐，近日公然開拖互插，兩女隔空駁火足足一星期，被諸葛咬住唔放，法拉?到向身邊朋友訴苦，數爆對方：「佢係咪黐線 o架？搏宣傳都唔使咁吖！佢癲夠未呀？」
臨近新年搞到家嘈屋閉，但原來奶奶薛母已同法拉聯成同一陣線，除了名正言順批准法拉入門，亦對自封係未來薛家二少奶的諸葛梓岐所作所為極度不滿，更以四大罪狀（講大話、勾佬、大使、搞到兄弟反面）指控她，諸葛要入薛家門隨時脫腳。
法拉：佢癲夠未
因為諸葛梓岐向傳媒爆料，揭穿陳法拉同 Neway大少薛世恒已在美國秘密結婚，再狂踩法拉唔認奶奶，唔識得孝順父母、無家教，借勢抬高自己，終於辣着法拉反擊。「我咁多年係靠努力企得穩，佢（諸葛）靠乜嘢我就唔知！我唔會放料做新聞，我係一個尊重長輩、好傳統嘅人，父母家教好嚴。」
唔妥到出晒面，法拉同諸葛連環隔空駁火外，私底下法拉對於諸葛咬住唔放的行為亦忍無可忍。上星期四（二月四日），有人耳聞目擊正在拍攝劇集《公主嫁到》的陳法拉，未埋位傾電話時，向電話中人狂鬧諸葛洩憤，「有冇搞錯？佢（諸葛）係咪黐線 o架？要搏宣傳都唔使咁吖，講咁耐都仲唔肯收聲，佢癲夠未呀？」

成為薛家新抱後，法拉每日都拖住價值接近兩萬元 LV漆皮手拖喼開工，認真富貴。

法拉上了「老公」公司名下七人車接載離開，甚有闊太派頭。

要尊重老人家！（真實對白）

影結婚相

第二日（五日），返無綫開工的法拉似乎有備而來，突然主動走埋記者身邊問大家是否等她，問到她與諸葛的恩怨，她更一反常態，合作回應。
壹：你同諸葛梓岐關係如何？
陳：做嘢嘅時候見過一兩次囉。
壹：你知唔知係佢放料話你結咗婚？
陳：吓？我都唔想相信呢個事實，但係我最唔開心係俾人話我無家教，我屋企人都唔開心囉，因為佢哋知道自己個女係點，我自細家教就好嚴，一向我都好孝順父母同尊重長輩。
壹：咁你係咪同薛世恒結咗婚？
陳：（甜笑）唔……不過遲啲我哋都會影結婚相。

法拉與薛世恒由地下情到公開浮面，去年她更光明正大到 TVB西餐廳食飯見高層。

剝出名

《有營煮婦》中連環剝衫露 bra去廁所，意識大膽，引來極大回響，相信以後都冇機會再睇到法拉這類演出。

《師奶兵團》中，陳法拉在一場遊艇戲，自備幼帶比堅尼上陣，更讓同劇男演員推油，奠定新一代性感女神地位。（《忽然 1周》圖片）

積怨兩年

冰封三尺，非一日之寒。早在兩年前，諸葛同 Neway二少薛嘉麟拍拖開始，當時剛做 model的諸葛梓岐自稱是諸葛亮第六十三代後人，又經常將自己與同 Neway太子爺拍拖的陳法拉相提並論；為了做新聞，甚至在薛世恒祖母的喪禮上，放料叫傳媒影相，大搞與法拉爭寵新聞，令當時尚未全面曝光的薛陳戀曝光，陳法拉再無法否認拍拖事實。
與法拉爭寵新聞即時令諸葛人氣急升，她更是咬住唔放，只要稍有機會，便重施故技，甚至向公關公司獻計，邀請她與法拉一齊出席活動，兩個薛家新抱同場，必定搏到報紙頭條。
明知諸葛奸計，法拉亦唔笨，每次接 job前，必定問清楚與誰同場，當知道有諸葛就唔肯接，雖然如此，但過去兩年內，亦試過有兩次同場。
「上年四月法拉都試過同諸葛梓岐一齊做 Swarovski活動，嗰次因為諸葛係以模特兒身份出席，所以會方冇講到俾法拉知有佢同場，去到法拉先知出事，諸葛即刻借啲意行去法拉身邊搏影相；喺咁嘅情況下，佢哋唯有交戲扮 friend，但之後法拉就講到明，唔肯再同諸葛同場。
「直到今年一月，法拉見諸葛好似再冇利用自己做宣傳，加上個騷價好高，於是答應一齊出席活動，甚至唔介意俾司儀用薛家準新抱介紹佢哋出場。但係估唔到過咗幾日，諸葛就放料爆法拉秘密結婚，唔怪得法拉咁嬲。」知情人士說。

發火還擊

去年四月兩人曾同台出現，她們更做晒戲扮老友。

受新聞困擾，近日開工的法拉在片場無厘心機。

上週五（五日），陳法拉於電視城趕拍《公主嫁到》，有備而來回應與諸葛恩怨，更暗寸對方虛報年齡。

在劇集中穿過多次婚紗的法拉，自爆快將與薛世恒影結婚相，默認好事。

四大罪狀

除咗法拉發火之外，未來奶奶薛母對於兩位「新抱」開火，搞到家嘈屋閉，亦十分火滾，逐漸睇清楚諸葛真面目的薛母，今次更與法拉同一陣線。
「薛母最初唔係好夾到法拉，反而覺得諸葛份人有禮貌，識氹老人家，又經常送禮物，所以初期諸葛好得寵，到後來發現諸葛扮晒公主成日要薛嘉麟買嘢俾佢，變得好大使，之後又俾傳媒踢爆佢其實係大話妹一名，學歷、年齡、背景通通都係假，加上諸葛試過瞞住男友，靜雞雞同男友個老死 Max Wu來往，件事傳番去佢哋（薛家兩老）耳邊，先至扣晒分。」薛母身邊人說。
但最令薛母不滿，是諸葛為抬高自己男友，竟然放料指法拉男友薛世恒，因為使大裝修費而失寵，在公司無晒話事權無晒地位，反而她的男友薛嘉麟就坐正做集團主席，搞到兩兄弟唔妥。
「薛母就係嬲諸葛是非，搞到佢兩個仔反面，佢兩兄弟本來感情唔錯，但係自從 Ernie（薛嘉麟）同諸葛拍拖之後，成日聽個女朋友唆擺，兩兄弟爭話事，終於搞到面左左。以前成日一齊見面食飯，而家都少咗。」知情人士說。
由於諸葛公主面具越撕越破，即使薛母曾講過：「個仔鍾意，我管唔到！」短期內要如陳法拉般獲准入門，名正言順做薛家新抱，相信諸葛要努力洗底，痛改前非。

諸葛背住男友（左一），約會男友老死 Max Wu（右一），經常出入四季酒店。

薛媽媽不滿諸葛梓岐搞是非，相反，法拉對戀情一向作風低調，深得未來奶奶歡心，御准入門。（《 FACE》圖片）

日前陳法拉與諸葛梓岐於活動中碰頭，大會以「準薛家新抱」來形容二人，其間陳法拉表現抗拒，更表示不會向未來奶奶拜年，事後諸葛梓岐藉此事暗寸陳法拉冇家教。

向來愛搏出位的諸葛，在寫揮春時刻意＊低身，露出胸前兩團肉，成功搶大嫂鏡。

日日開火

陳法拉與諸葛梓岐分別跟 Neway兩太子拍拖，二人屢次傳不和，近日陳法拉被對方爆婚訊，隨即引來二人擺明車馬開火。
2/2　有報導指陳法拉跟薛世恒秘密於美國私訂婚約。諸葛梓岐出席活動時玩踢爆，更說：「係出面嘅人話我知。」
3/2　陳法拉不忿婚事被踢爆，直斥諸葛梓岐「放料做新聞」及「靠別人私事上位」。
4/2　諸葛梓岐隨即反擊，叫陳法拉不要「此地無銀」，「無論點都好，都祝佢哋幸福快樂，同埋尊重老人家、孝順父母。」暗指陳法拉冇家教，不懂尊重老人家。諸葛梓岐更強調如果結婚，唔會收收埋埋咁小家。
6/2　陳法拉出席電影宣傳公開強調：「唔想再回應。佢（薛世恒）唔係圈中人，自己有責任保護佢，總之新一年遠離是非，希望佢都可以，我講嘅佢係諸葛梓岐。」
7/2　諸葛梓岐再出招，帶同男友薛嘉麟開工，擺明向陳法拉示威。

大話精

出道不久的諸葛梓岐，即被人踢爆假扮諸葛後人、虛報學歷、年紀，又假扮上流社會，負面新聞一浪接一浪，公主變大話精，形象破產。

假學歷
諸葛梓岐曾表示在溫哥華 BCIT讀室內設計，但傳媒曾聯絡校方，發現諸葛並未有於該校修讀任何課程。

扮諸葛後人
諸葛梓岐自稱是諸葛亮 63代後人，又稱家中族譜有記載她名字，但卻被歷史學家駁斥：「一個家族族譜根本沒可能記載女性名字。」

虛報年齡
諸葛梓岐自稱 83年出生，卻被傳媒踢爆她在交友網的個人檔案中報稱是 81年，報細了兩歲。

攀上流社會
自稱跟男友薛嘉麟同是香港菁英會會員，但記者曾向會中幹事求證，對方指諸葛梓岐並非會員。

黐富豪上位
為了加入「百仁會」，諸葛梓岐密密約會恒基大少李家傑，但臨門一腳卻因背景被質疑而不獲批准入會。

（《蘋果日報》圖片）

（《忽然 1周》圖片）

10億身家

Neway兩位太子爺薛世恒及薛嘉麟，父親是上市公司中大印刷主席兼創辦人薛濟傑，業務涉印刷標籤、廣告物料及膠片等等。公司市值約七億六千萬。除了印刷生意，集團早年改名「中星集團」，積極拓展娛樂事務，開辦 Neway卡拉 OK及新時代藝員管理公司，旗下藝人包括 Hotcha、胡杏兒、王浩信等。去年，「中大印刷」主席薛濟傑宣布退休，由現年 32歲的長子薛世恒及 31歲次子薛嘉麟接棒打理家族生意。
此外，薛家亦積極投資房地產，更開立中大投資管理公司，持有總值超過三億物業，包括多個旺角鴻都大廈商鋪、市值二億五千萬；沙田皓郎山莊，市值 2,800萬；松柏花園，市值 1,870萬。

薛濟傑為中大印刷及 Neway娛樂的創辦人，去年宣布退休，讓位給兩位兒子薛世恒及薛嘉麟。（《蘋果日報》圖片）

Neway卡拉 OK的業績每況愈下，近年蝕多於賺。