黃智雯梁烈唯苦盡金來

黎明話過「坎坷過後有艇搭」,套用在上位新星黃智雯與梁烈唯身上可謂合晒合尺!黃智雯雖在單親家庭長大,但比一般人更愛家;梁烈唯那些年雖窮到燶,但如今卻身光頸靚。證明只要否極泰來,退一步更會海闊天空。

家很簡單,但要擁有一個快樂的家卻很難。自小學一年級開始,黃智雯(Mandy)因父母離異,開始活在單親家庭下的成長印記。既沒有父親堅壯的肩膊騎膊馬,也沒有又粗又拮的鬍子揉揉小面,但「那些年」的她卻比一般小孩更喜歡家的感覺,在遺憾中滲出絲絲的甜,全因有個好媽媽:「我諗大約20年前、自我小一開始爹哋媽咪就已經分開,我一直都係媽咪、家姐同婆婆湊大。我同佢哋關係好Close,所以大個之後都希望同婆婆一齊住,想同佢親近啲!」

大家族不愁寂寞

Mandy當時年紀小,只知父母分開,但她從不認為自己缺少甚麼,因為母兼父職,張開一雙幹慣粗活的手,為她遮風擋雨。從她的認知,父親可能只是生父而已:「爹哋同媽咪分開,真係冇乜唔開心,就算佢哋分開前,爹哋已經好少返屋企。講真,我同佢係有見面,但好少聯絡囉!只係間唔中食吓飯!佢哋分開未必唔係好事,呢啲係大人嘅選擇。」

幾乎從未感受父親的體溫,但給Mandy溫暖的又豈止他一人?Mandy說:「我成個家庭大大話話都有20人,所有成員都玩得好埋,令我感到好溫暖,亦唔覺得我比別人慘,反而開心過好多朋友!」

全靠母親的含辛茹苦,Mandy才成為如今亭亭玉立的「關二嫂」。在自己眼中,母親角色更似朋友:「雖然媽咪要開舖,一個女人賺錢孭起全頭家,搞到一個禮拜都見佢唔到幾次。不過,我哋多年嚟每日都傾幾次電話,佢又會八卦我有冇拍拖,有時驚我夜返,一定會要我打電話報平安。佢所做嘅一切,完全Cover到父愛!朋友聽完反而更加羨慕我。」

為事業棄四年情

全賴母親的支持,Mandy才能放膽向前衝,做自己最喜歡的演藝事業:「媽咪第一個就舉腳支持我入行,我知道唔可以淨係使佢嘅錢,所以我入演藝學院都係半工讀,走去教跳舞同教鋼琴。好幸運喺TVB有好多人錫我,Keep住有劇拍!」

Mandy看似順風順水,但有一件事令她至今仍耿耿於懷:「入行前曾經有一段四年嘅感情,當時大家已經Plan幾時結婚,可惜佢唔鍾意我入行,覺得我付出嘅都未必有正比嘅收穫,相處時間愈來愈少同價值觀唔同,感情開始變淡,最後去到無可挽救嘅地步,無奈下分手!」大抵分手未必是壞事,Mandy如今事業起飛,大可以聳聳肩對前男友說:「我冇入錯行!」

後記幸運兒

今次訪問是電話後補的,皆因當日Mandy要趕上機出埠,一邊跟小記做訪問,時間分秒流逝。Mandy最後趕到機場,聽見耳筒中的航空公司職員說:「經濟客位已爆滿,幫你Upgrade商務啦!」Mandy又一次遇上「否極泰來」這個熟悉的陌生人。

愛情與麵包同樣重要,但對梁烈唯來說,在拍拖十年的女友身上體驗到的是真愛勝萬金。初入行的唯唯,曾經歷一段狗臉歲月,月薪只得五千元,曾有好友結婚請飲,他焗扮返工失約:「我係好想去,但我真係冇錢做人情,唔通咁樣同人講?我冇錢用時就會喺女友儲五蚊銀嘅兜攞錢用,但當佢發覺個兜輕咗就會話:『你又攞我啲五蚊銀!』雖然知道佢冇心,但個心真係好酸!」最窮的日子除有女友相伴,愛犬亦曾扶他一把:「有一次冇晒錢,匿喺屋企好愁,隻狗突然扯開個墊褥,彈出三封利是!原來係我之前畀佢嘅利是,有三百蚊呀!夠我使幾日!」

怕成負累提分手

女友是藝人助手,有不錯的穩定收入,但唯唯眼見自己事業零起色,未能給女友最好的,故曾主動提出分手,希望女友轉投更好的懷抱:「我同女友講過如果有富二代追你,你可以跟佢,我唔會介意!因為我愛你、想你好!」這番話雖令女友感心痛,但她仍不離不棄,唯唯說:「女友當時話:『黐線啦!我覺得你得!你依家只係欠一個機會!』」幸好家人與女友的支持,加上契哥又介紹他做打碟DJ,最後終在08年憑《尖子攻略》首獲台慶頒獎禮提名,總算懷才「得」遇。

相愛十年,共度風雨,即使娛樂圈多誘惑也坐懷不亂,全因唯唯已認定女友為終生伴侶:「佢唔單止唔似『關二嫂』咁成日打我同鬧我,仲照顧我起居飲食,尤其係有時我同屋企人嘈交,佢都會做和事老調停,所以屋企人當佢係女一樣!」唯唯雖口若懸河,予人樂觀豁達,但卻有藝術家脾氣,試過約朋友吃飯,到餐廳門口時突然心情低落,打算失約掉頭走:「女友見我咁就會用激將法:『笑吓啦!你當食飯係演一場戲啦?』當時我心諗:『你覺得我唔得,我就做畀你睇!』食完飯之後,我就會問番佢頭先場戲值幾多分!佢令我變得更面面俱圓!」

險患躁鬱症「友」救

唯唯要感恩的還有黎耀祥、苗僑偉、黃日華及張智霖等這班經常予以鼓勵的好友,但同時亦令自己發現有躁鬱症:「我喺《缺宅男女》飾演有躁鬱症嘅『關二哥』,所以事前不斷睇相關資料,愈睇愈心寒,發現所講嘅徵狀我有齊晒!例如有時揸揸吓車會喊,瞓又瞓得唔好。後來有次三嫂(戚美珍)嚟探班,佢話見我有啲異常,好擔心我有呢個病,叫我做戲要識得收放自如。」一言驚醒,他即面對現實,埋位前主動跟人聊天,避免過分投入角色。

後記好奇男

看唯唯一副孩子臉,其實言談間可見他充滿睿智!當提到有指今年世界末日論,他卻另有看法,認為只是空間或事物的改變,並暢談環保對生活的重要性,滔滔不絕。其實對世界的好奇,即是對知識的追求,這亦是唯唯認為演員應有的態度。

專案組

黃智雯自爆因入行問題與男友意見分歧,最後為事業選擇分手。

黃智雯由演出「鵪鶉妹」而開始為人熟悉。

黃智雯指母親雖兼父職,但做足一百分。

 

 

stacylife 發表在 痞客邦 留言(0) 人氣()