2012年game界隱憂多,連任天堂都話30年來首度虧損400億,實在有必要靠上週舉行嘅洛杉磯E3遊戲展沖喜吓。索尼同微軟雖然唔出新機,但各有殺手級新搞作發表,再加上老任次世代新機Wii U晒馬,睇到都想即買。資訊發達,以上種種可能你已在網頁睇晒,今期《FACE》即時搵齊香港遊戲達人、加埋旺角場game迷街訪,客觀拆局,包你上網睇唔到!

《FACE》Gadget版監修人903 DJ Donald
E3最開心係見到Kinect出體感《龍珠》,一圓我兒時夢想。另外Wii U都有驚喜,隻喪屍game《Zombie U》出機首選。

歐美副廠給力
資深機迷Ayllmer就覺得三大主機廠雖然落力,但冇新驚喜。反而副廠夠落力。「Wii U未有售價,之前網上瘋傳嘅XBox新機亦唔見影。好彩有唔少新game睇,EA、Ubisoft都好給力,後者除《刺客信條3》外仲有幾款全新作品,好過日本廠淨出續集。」

資深機迷Ayllmer
Ayllmer覺得今年E3麻麻,最想知Wii U 幾錢。

女機迷撐Wii U
E3今年冇新機,硬件焦點落喺上年公布嘅Wii U身上。Model LuLu就讚個手掣好可愛,而女機迷Koyuki見到首發有孖寶,未睇真點玩都嗒糖。「屋企淨係有Wii,隻紅色盒《孖寶兄弟》玩到𠵱家都仲未厭。女仔好長情,Wii U有新孖寶、Wii Fit呢啲招牌菜,我會繼續支持。」

Sony、Microsoft出奇招
Sony同Microsoft唔使出商業間諜都知任記大搞作,兩廠各以不同方針應對,Mandy欣賞Sony :「佢今年專心講game,示範《The Last of Us》最多掌聲就知有支持。」SK就鍾意XBox:「新大作有《Halo4》,新搞作有個smart glass,唔使開發新機都賺到新鮮感。」

最大卡士遊戲展
E3全名Electronic Entertainment Expo電子消費展,每年於美國洛杉磯舉行,被譽為業內最有影響力嘅展覽,歷代新主機譬如PS3、XBox360、3DS等都於E3首度亮相人前。今年明顯見日本廠震後未上力,但氣氛一樣熱鬧。譬如話喺劇院搞發布會、國際巨星做嘉賓,卡士之大,東京遊戲展都比不上。一齊睇睇場內花絮感受呢場最強game騷盛況。

孖寶護航 Wii U首發冇得輸
Wii U上年E3發表時乜detail都冇,惹嚟唔少質疑聲音。今年嚴陣以待,大晒自家護航作,掌聲當堂返晒嚟。孖寶落實首發,「茂叔」上台試玩就係必然,更開心係佢拎住全新發布嘅黑色版本Wii U,試玩鬼佬鍾情、久休復出嘅種子小精靈《Pikmin》,掌聲不輸鬍鬚仔。老任新機最忌就係第三廠十卜不力,但Wii U已搵到EA、Ubisoft、Bandai Namco等大廠全力支持,似乎頭威冇得輸,係期望任天堂唔好太慢工出細貨,keep住持久力,咪好似Wii咁幾個月先得一隻大作。

大埔Lulu唱好 人氣model Lulu
「個手掣有屏幕我覺得好新奇,睇片見到佢仲可以夾埋Wii舊手掣同Balance Board一齊玩,咁多組合應該會有更多體感玩法,幫到我做運動。」

DJ科林睇淡 新城DJ科林
「我覺得咁大塊板,又要GamePad、電視兩邊望,反而冇咗Wii以前嗰種不要諗、只要郁嘅『直感』體驗,玩落似多咗個芒嘅普通遊戲機。有《孖寶》喺度一定好賣,係驚好似Wii咁得頭威,好快冇game出。」

黑版Wii U解密
除咗公布型仔黑版外,今次E3亦確定了幾個Wii U重要情報。首先由上年只對應一塊Wii U Pad,改為視遊戲而定可同時對應兩塊,方便對戰。另外亦肯定具備1080P高清解像度,移植PS3、XBox360遊戲絕冇問題。預定今年內發售,最嬲係仲未公布售價!

Wii U Spec.
廠商:任天堂記憶:對應SD、USB儲存裝置輸出:AV端子(576i)/色差線、HDMI(最高對應1080P)對空控掣器:Wii U GamePad、Wii U Pro Controller、Wii Remote、Nunchuk、Wii Balance Board 推出日期:2012年尾售價:待定

神作回歸 Pikmin3 發售日期:首發
Pikmin乃GameCube時期名作,曾於Wii復刻卻未見熱潮。跟首作相隔8年,宮本茂親自出馬講解 Wii U版《Pikmin 3》。玩法同以前一樣,控制太空人Olimar指揮Pikmin大軍探索星球,暫時見唔到有對應Wii U GamePad 嘅特別玩法。暫時GamePad只用作顯示地圖,未算用盡「子母芒」特點,來個「FF幻想」,如果電視係客觀視點,Wii U可以見到Pikmin對眼睇緊乜,都已經好有趣!

五人孖寶 New Super Mario Bros U 發售日期:首發
新一集孖寶,4打時似舊作,4人拿舊Wii手掣玩,但就可以加入第5個用Wii U Pad 嘅玩家。雖然唔可以控制角色,但就可篤芒打暈敵人同製造道具幫手。當然2P時你都可以1個角色+1支Wii U合作。其他新元素包括滑翔飛行飛鼠裝,依顏色轉換特殊能力嘅BB版Yoshi首次出場。迷你Yoshi按顏色換能力,比如藍色可以噴泡泡,借力跳泡泡浮空,有少少抄《泡泡龍》。

迷你雜錦 Nintendoland 發售日期:首發
用嚟示範Wii U功能嘅迷你遊戲雜錦作。最多支援2個GamePad同3組WiiRemote,強調「不對稱遊玩體驗」,即係1P同2P能力唔同,玩法唔同。即係點?例如《鬼捉人》遊戲,扮人嘅玩家只能在電視上睇到人類位置,而扮鬼嘅就可以喺Wii U Pad子芒睇晒人同鬼。好似呢隻game咁,拎Pad 嘅玩家射箭,睇電視拎WiiRemote 嘅玩家就用劍,單人、合作已有唔同玩法,交換手掣又可當新game操多次。

最佳示範 Zombie U 發售日期:2012年內
都話第3廠今年給力,Ubisoft為Wii U度身訂做嘅喪屍求生遊戲《Zombie U》,換上Wii U Pad帶來前所未有緊張感。例如用紅外線掃描器搵道具時要用Pad對住電視scan,但可能你望緊Pad 嘅時候,電視屏幕會有怪物突然撲出嚟咬你,兩個屏幕互動為遊戲提供前所未有嘅驚嚇體驗。玩法需要不停咁電視、GamePad兩邊望,出奇地啱玩恐怖game。

其餘Wii U遊戲陣容

XBox SmartGlass 智能手機打Wii U
Microsoft自從推出Kinect開始,積極開發新科技配件,其實仲好過不斷換主機平台,今年E3「咪記」力推跨平台連動apps「SmartGlass」,呢個Glass唔係解眼鏡,而係形容緊市面上智能手機、Tablet機嘅屏幕,透過軟件連接,即可成為XBox 360的子屏幕!冇錯,微軟又再偷任天堂橋!而且個子芒拎出街都可以連動,不失為一招奇着。

《Halo4》示範邊打邊睇武器資料
11月推出嘅《Halo4》係XBox 360重頭作,當然對應SmartGlass功能。宣傳片中,拎到新武器時即可以手機或tablet,用子芒查看武器詳情。記者睇完就擔心,以後打360又要睇電視,又要拎手掣,仲要多個tablet子芒,都唔知顧得邊樣。但試玩同樣有吸引之處,比如可以將game資料經由app拎出街睇,甚至設計到某啲小遊戲,係要連動手機拎出街玩,再將成果轉移返落大機主game。SmartGlass預計今年內玩到,仲講明唔只Windows Phone,連iOS同Android都能夠對應,實行以全球智能手機攻打Wii U。但究竟最終好唔好玩,就睇吓各廠商點樣利用呢個新平台啦!(11月6日推出)

Kinect X Nike 健身進化論
Kinect繼續係XBox重點,除咗有《Dance Central 3》外,仲同Nike合作搞健身game《Nike+Kinect Training》,有關刀賴茄參與,隻game比《Wii Fit》認真好多。唔知又會唔會對應埋iPhone個Nike+,幫你計埋跑步成果呢?

冇新機 有道理遊戲店負責人 電氣文
《電氣良品》總店長文哥,睇game自然有獨到一套,佢認為今年E3冇新機先合理:「嚟緊電視界踏入4K解像度年代,Sony、Microsoft應該等埋超新高清技術嘅電視配套面世,下年公布、2014年賣就啱啱好,否則畫面、性能冇躍進,出嚟都係死。成個E3比較滿意係XBox,新技術SmartGlass擺明借力打力攻Wii U,搞到任記個子芒手掣冇咗獨特性。」

波特老母打救PS3
蝕成幾千億,PlayStation都無謂花錢再搞新硬件啦,踏踏實實做批好遊戲,一樣有出路。今次PS陣營雖然冇一隻好似《Halo 4》講出嚟已經夠嚇鬼嘅鎮場獨家大作,難得係PS3唔使靠人,自家美國studio有好多實力新作,好似《Heavy Rain》、《Uncharted》廠都各自發表全新作品,壓軸仲有哈里波特之母:J.K.羅琳出山,監製體感魔法書《Book of Spells》,雖然女作家本人冇到場,但見到台上班promoter拎住Move手掣扮魔法杖,fing幾fing就喺電視變到條小火龍出嚟,好想即刻玩!

Move變身體感魔法杖
講到打機fing出魔法咒語,NDS隻《二之國》3年前已經玩過,但今次PS3請到J.K.羅琳出山,級數同吸引力自然高幾級!《Book of Spells》係模擬《哈利波特》內入讀霍格華茲嘅必修課本,你可以跟住指示打開電子書配件,再對住PS Eyes視像鏡頭fing魔杖(Move手掣),電視中就會變出相應華麗魔法效果,係咪「哈迷」都想試吓入魔法學校耍幾招啦!(發售日未定)


其實《Book of Spells》只係PS3新玩意《Wonderbook》嘅其中一作,佢係一本書形小配件,每頁都印有AR code,加上move手掣、視像鏡頭、相應軟件,玩家可通過電視把玩各種互動典籍,玩法無限。

The Last of Us
《Uncharted》廠商頑皮犬嘅末日背景動作game《The Last of Us》等咗半年終於有實game試玩,個女主角竟然都好似Ellen Page!(2013年推出)

PS明星大亂鬥
同場呢隻《PlayStation All-Stars Battle Royale》極唔看好,除咗Parapa說唱狗叫得做明星,你認為《胖公主》有幾多人識?(2012年秋季推出)

《Beyond Two Souls》唔係黑馬! 玩家Tomy
玩家Tomy認為PS3新遊戲中以《BTS》最吸引,「我由《Heavy Rain》已經好喜歡QD呢間廠,隻遊戲唔使用體感掣就做到新形式互動解謎,可惜人氣唔夠《Uncharted》嚟,所以人人都關注前者隻《Two of Us》但其實睇完E3《BTS》試玩片,氣氛好、解謎同動作場面都咁靚,我好期待!」(2013年3月推出)

Bio 6領軍 第三廠給力
今年3大主機廠有兩間冇動作,造就一眾軟件廠表現搶鏡,Microsoft發布會用咗好多時間示範CAPCOM《Bio Hazard 6》,就知跨平台大作會係game壇主流。以下用各個獎項品評一眾第三廠表現,順便帶大家睇吓嚟緊一眾必玩大作。

最香港核心價值 Bio Hazard 6 XBox360、PS3/Capcom/2012年10月2日推出
同香港game達人傾偈當日,雖然各自有心水選擇,但一知道《Bio 6》以香港場景殺喪屍,席間人人畀like話要試一試。唔講呢樣「香港核心價值」,《Bio6》本身亦大刀闊斧一洗上集「唔夠Bio」嘅罵名,實game demo試玩後,場內反應係讚佢氣氛似番恐怖片,操作又易用,令到成隻game速度感高咗,邊行邊射、跌落地碌住射擊,似足港產動作片。當然啦,今集香港場景唔係過場幾鏡咁簡單,Chris同Leon兩大男主角外,加埋疑似Wesker親生仔Jake,3個會殺落香港,喺唐樓同大牌檔打喪屍,神秘東方女子Ada Wong仲會以新紅裙look回歸!


「駱駝城五金漆油」、「章無記電器」招牌都好港式地道。有冇人敢搵呢間「爛尾家居」做裝修呢?提一提360版《Dragons Dogma》用家,7月3號記得上XBL下載呢款E3試玩版!

最佳角色獎羅拉 Tomb Raider S3、XBox360/Crystal Dynamics/2013年
《Tomb Raider》2013年重新出擊,唔少人睇淡。不過今年E3展出game play後即刻反底成功。羅拉姐整容成功,整走孖膶厚唇索爆全場,遊戲內容亦令人驚喜,有《Uncharted》風味,睇落唔兒戲。拉姑有火,千祈咪話佢過氣。

睇好未來feel槍game FPS女槍神Kali
「年年E3最留意都係槍game,睇到嚟緊大熱作全部會走未來feel,除咗《Halo 4》,10月隻《Medal of Honor》甚有睇頭,遊戲有十個不同國家嘅兵種選擇,唔使成日淨係得美軍用,武器亦走比較受歡迎嘅近未來風格。槍game之外,Ubisoft《Watch Dog》用手機hack人嘅玩法再加GTA feel,又係好吸引!」

Medal of Honor Warfighter
XBox360、PS3/EA/2012年10月年尾要同《HAL04》、《CoD》新作大戰,Kali稍稍睇好《Medal of Honor》。

最佳進步獎 Ubisoft
提到Ubisoft,好多人只玩佢隻《刺客信條》同《賤兔》,但今年E3飛躍進步獎非佢莫屬,第一讚佢大膽撐新主機,上文提及嘅《Zombie U》係最有誠意嘅Wii U第三廠遊戲。第二讚佢隻「hacker版GTA」《Watch Dog》有創意有話題,主角可以入侵紅綠燈系統搞到交通大亂、高科技犯案,唔只齋靠《刺客3》食老本。

最進步 Assassin CreedⅢ Liberation
PSV/Ubisoft/2012年10月 PS Vita今年慘變配角,芸芸廠商中係得Ubisoft為Vita製作《刺客3》,雖然《刺客3》將會係跨平台作,但PSV版係獨立作品,連主角都轉做女仔。Ubi仲話PSV版得到嘅隱藏道具,將可以share畀PS3版《刺客3》使用,咁即係幫我揀埋家用機買乜版啦!

最新鮮 Watch Dog
PS3、XBox360/Ubisoft/2013年示範片段所見玩法似《GTA》,但就可以用hacker技術,入侵周圍人士嘅手機,盜取目標資料。

最瘋狂 Far Cry3
PS3、XBox360/Ubisoft/2013年另一重頭作《Far Cry3》係一款瘋狂系FPS,宣傳片有女性裸露場面、又有割喉殺人,非常激。

日本廠失望 香港廠參戰
以往E3不乏日本廠表演時間,但今次除咗CAPCOM外,日本廠都只係畀啲不給力續集,反而仲有中國公司參展,令人驚喜。

總評 西方重口味主導市場
今年E3好多人話冇驚喜,其實亦引證咗遊戲界愈趨核心化嘅走勢,好難再靠小品吸引非機迷進場。任天堂為例,出Wii時冇孖寶,Wii U就要《Pikmin》、《Mario》打孖上。PS3、XBox一樣,外國傳媒對Move同Kinect冇興趣,反而一講傳統大作就醒神。未來一兩年都會係大作主導戰,手提機或者體感遊戲都可能會淪為次級戰場。 ####


唔少網友讚Ubisoft《Watch Dog》講hacker夠創新,係E3最佳新作。


孖寶粉絲Koyuki


Koyuki撐Wii U必玩,有《Mario》、《Pikmin》等正統大作撐場。


PS3機王Mandy Mandy鍾意打恐怖game,《Bio6》同《The Last of Us》開正佢嗰瓣。


槍Game高手SK SK認為XBox打FPS最完美,期待《Halo4》同新《COD》。


新主機PSV全球失利,所以Sony更加要谷,賣行主場最大廣告谷新口號「Never Stop Playing」,希望真係keep住有新game畀PSV用家玩啦!


雖然係只供業內人士進場,但一樣爆多人,試新主機分分鐘要排5粒鐘。


E3的model同cosplayer好投入搞氣氛,影親相都畀足甫士。


美國game show冇日本咁多索模畀你影,睇吓兩位試玩dancer咁孔武有力,我估你都唔想見佢前面啦!


黑色版Wii U感覺唔太任天堂,不過多個選擇唔係壞事。(照樣會推出白色版)


同場亦公布另一款新周邊Wii U Pro Controller,用番傳統雙控桿設計,打FPS冇問題。


比如執到新槍,可以即時用tablet查看同整理槍械。如果唔想打打吓波士俾朋友WhatsApp影響,記得開飛航mode啦!


360版美式足球遊戲《Madden》,就可以用tablet轉陣、換人,希望《Winning》同《FIFA》學吓!


除咗遊戲之外,亦對應XBox其他多媒體功能。比如用XBox睇戲,可以即時經tablet check演員資料。


運動日日要做,都冇話有乜新唔新意,最緊要有Nike名氣搭夠,所以一張畫面都未有,我哋都要介紹。


阿奴推介Kinect版《龍珠Z》,終於可以乜嘢手掣都唔使拎,對住個芒擺甫士出龜波氣功!(XBox360/BANDAI 2012年10月推出)


《哈利波特》作者J.K.羅琳


講到體感,Move仲會出一個Racing Wheel軚盤配件,仲可以變形做電單手柄。(推出日未定/約$350)


《Beyond Two Souls》請到《潛行凶間》女星Ellen Page以facial capture扮演兩個世界嘅雙重身份。


Chris、Leon上天台扮《無暗道》,留意背景中文字廣告牌,佢哋似乎冇去ifc,去咗SSP。


估唔到呢個神秘短髮女子會係Ada Wong,冇見咁耐又後生又潮咗。


羅拉新造型個個讚好,個人感覺西方game廠近年好似吸納咗日本女角審美觀。


遊戲簡簡單單叫番做《Tomb Raider》,玩法亦貼近現時嘅第三身射擊,射箭係特點所在。


PSV版女刺客Aveline係西班牙、法國混血兒,擅用彎刀、毒鏢等武器。女性角色體力、體重跟男刺客唔同,玩法大變。


家用版主角仍然係Ezio,佢會跳到1875年,喺美國爆發獨立戰爭期間進行保護同暗殺要人工作。(PS3.XB360/2012年10月)


宣傳片叫《Fist of The North Star: Ken's Rage 2》,成段片見雷奧多過見拳四郎,話定主角換人。


Square Enix示範新遊戲開發引擎Luminous Engine,個阿伯真係精細到出神入化。


內地遊戲公司「遊戲蝸牛」首度參展E3,於會場展出《九陰真經Online》遊戲,都算為華人game界爭光。 

arrow
arrow

    stacylife 發表在 痞客邦 留言(0) 人氣()