暑假就到，又係同陽光玩遊戲嘅時間，最好影埋相記錄低呢段陽光燦爛的日子。
開講有話「藍天白雲」，有齊兩樣嘅相先係最靚，可惜就算遇着一片大藍天，卻撞正萬里無雲的話，始終都爭啲。
好在家只要有iPad加呢個Cloud Spray app，就可以後期加番啲雲落張相，藍天白雲有齊晒，畫面豐富得多！
63款雲key上key Amazing Cloud Spray HD
雖然個app叫Spray，但其實唔喺畀你自己喺相片上噴雲，而係透過佢足足預載咗63款唔同形態嘅白雲圖像，任你key入相片任何一忽，save完仲可以重複再加另一嚿雲，直至填滿成個天空為止。Key嗰時仲可以校大細、扭角度同設定透明度等，想效果突出啲，就要揀嚿勁大嘅雲，兼set到100%不透明；若想自然啲，則可揀細碎嘅細雲，再校低透明度，咁就會好徹底咁融入藍天之中。
搞嘢加工雲
送你一對翼 Abstract Wings HD
若將相片整到個人騰雲駕霧咁款，下一步一定會諗到飛行。所以Cloud Spray嘅開發人仲寫咗個Abstract Wings app，以相同方式幫相中人加添一對翼，兩個iPad app一齊用，人人都能變成喺雲上穿梭嘅天使。 ####
US$2.99
只支援iPad
介面個app冇影相功能，一定要影完張相再load入app。之後篤相中左右兩個大箭嘴揀雲，篤左上角十字掣就移動（不能用手指直接拖嚿雲），右上角3條bar就校大細、角度同透明度。
原相橫度人像相通常影到更大面積嘅藍天，冇雲襯托，構圖其實有啲寡。
完成加番啲雲，畫面真係豐富啲。但由於個app只有直度介面，所以張相加工後，上下會有黑邊，要自己裁走；橫度相解像度亦會降低至768×512，但都夠貼facebook，直度相則保留到1,024×768解像度。
心心相印兩個心心互扣嘅雲形，擺明係假，但勝在浪漫，冧女必用！
飛機煙雲連雲帶飛機，一key即有煙雲效果，但機款係好難造到煙雲嘅民航機，有少少破綻。
追加彩虹 63款雲外，仲特別提供1條彩虹畀人key相，又多樣嘢玩。
US$2.99（限時）只支援iPad
總共有52款翼揀，天使、魔鬼、雀仔、蝴蝶，乜feel都有，可以成對key或左右分開key。介面亦同Cloud Spray差唔多，一樣有得校翼嘅大細、角度同透明度。
完成影相時影個人跳起，再用雲層遮晒地下景物，最後key埋對翼上去，咁就最似天使！
留言列表
