老字號路旁的星光　德如茶檔－明星靚相大分享☆

灣仔星街，有型有款。
型格店鋪，紛紛進駐。潮男潮女，來回如鯽。
眾多潮爆店鋪中，有一家碩果僅存的鐵皮茶檔，名為德如。
沒理周遭變遷，茶啡多士，炒粉飯麵，故我依然。
她是這區的明星，午市下午茶，不單年輕潮人湧至，就連馮美基、陳寶珠、甘國亮，毛舜筠，也甘願拋頭露面，坐在路旁露天位嘆茶。
能夠成為星街之星，全因老闆兩母子，幾十年來，勤懇踏實，默默付出。
為了奶茶幼滑醇香，自己親手縫茶袋。為了西多熱辣香口，逐塊慢火細煎。
老派的心思，為客人添一口自在與溫暖，也為這蛻變中的小區，錦上添花，燃點起一份新舊和諧的光彩。

一杯奶茶，聲名遠播海外。
午後，下午茶時段。沿皇后大道東拐上進教圍，總會聽到一片嘈雜的聲音。
單程路上，泊滿名車，鐵皮檔旁，人人幕天而坐。西裝筆挺的行政人員，穿着制服的售貨員，一啖茶啡，一口多士，是他們消閒解壓的天地。
只是奇在，鐵皮檔旁明明有個小鋪位，冷氣長開，自成一國，他們偏偏願意擠到沒冷氣的馬路旁。
「氣氛好嘛！」「睇到車嘛！」「食得煙嘛！」「帶得狗嘛！哈哈哈哈！」客人七嘴八舌道出原因。七嘴八舌中，有一把笑聲，特別響亮，來自老闆娘蘇媽媽，八十九歲的她，身體壯健，中氣十足，一頭趣怪的白髮，像個瘋狂博士，天天笑對客人，滿場飛很有趣。
「我係咁㗎，男人性格，鍾意大聲講大聲笑，啲人成日話我粗聲粗氣，哈哈哈哈！冇辦法啦！喺個街度大，係咁㗎啦，改唔到！哈哈哈哈！」她天性樂觀，愛笑，總是逗得客人開懷。

這個茶檔，是她和丈夫蘇德如所創，六十多年前，他倆結婚，子女陸續叩門，開支大，他們覺得茶檔有得做，又有個竇口照顧子女，便向政府申請牌照。後來，政府真的發牌，他們便胼手胝足在這裏做生意。
為了捱大子女，他倆一起奮鬥，蘇媽媽在檔口縫茶袋，蘇德如用幾種不同粗幼的茶葉溝成奶茶膽，由於茶袋的孔很細，沖出來的奶茶，特別香滑。縫袋沖茶溝茶的方法，一直沿用至今，幾沒變過。前年，外國CNN網站便選它為香港四大奶茶，威水到不得了！
「我老公發明㗎嘛！佢好叻㗎！開頭唔識，全部自己慢慢研究慢慢學，沖杯奶茶不知幾好飲呀！嗰時呢度全部都係四層高嘅舊樓，全部都係街坊，日日落嚟飲奶茶，唔可以沖得差㗎！」提起往事，蘇媽媽還是一臉甜絲絲。只是笑聲背後，原來有血有淚。

母當父職，巾幗不讓鬚眉。
德如開業不到十年，蘇德如就因病過身。
留下檔口和蘇媽媽，還有十個仔女，最小的兒子，才九歲。
「政府本來話要收返我個牌㗎，但阿Sir見我一個女人，冇咗老公，仲有咁多個仔女要養，就留返個牌畀我，嗰時啲人係咁㗎，好有人情味，乜都有得商量！」
老公走後，她一個女人，就靠這茶檔養活十口子。為了維生，她晨早六點就開鋪，做到下午，又一個人落斜路，到灣仔街市買貨，自己把食材搬上檔口，一直開到凌晨十二點，強悍如男人。
起初她只懂蕭規曹隨，賣茶啡多士，後來見客人喜歡吃碟頭飯，她就學做。她勝在樂觀不古板，舊款式如揚州炒飯、乾炒牛河，有。又肯試新花款，粒粒豬扒飯，是將豬扒切粒再加菜脯豆角煮成，家鄉炒飯，用她家鄉的客家銀魚仔蝦醬炒，充滿創意。

「唔試新嘢好悶㗎！街坊想食乜，我就去學去做。有時我做得唔好食，佢哋都唔介意㗎！」她說。
其實她與這區的街坊，早已發展出一份非一般的感情。有時她買完餸回來，街坊見她撐斜路辛苦，會主動幫她手。她的曾孫出世，她也會在檔口派薑醋，請街坊熟客食。
「我哋同啲街坊真係好好㗎，梗係！我睇住佢哋大，佢哋又睇住我啲仔女大，好似屋企人一樣囉！」
她對這地方，真的有感情，每逢周二，她會到附近聖雅各福群會當義工。連每月的生果金，也拿去捐了給聖雅各福群會，造福街坊。
「我咁大年紀，行得走得，幫吓人有乜所謂吖！我好知足㗎！政府留返個檔口畀我，街坊可以聚埋一齊，所以我一日仲健健康康，一日都仲想做㗎！」她說。

母子同心，撐起一片新天。
蘇媽媽能做着自己喜歡的事，其實有個幕後功臣。
那是她最細的兒子蘇懷豪，五十歲，媽媽年事已高，德如大小實務，皆他一手包辦。每天六點，他就回來煲湯沖茶切麵包炆牛腩煮咖央醬，鋪面多人，他又彈出來幫手落單傳菜收銀，忙到一頭煙，幾乎連說話都沒時間。
「好多嘢做㗎！湯又要自己煲，麵包又要自己切！」他說。
他切麵包，分多士和三文治兩種，多士厚切，烘來外脆內軟。三文治薄切，餡汁滲進包身，特別好吃。難怪網上食評也大讚他們夠懷舊，守着舊時茶檔的味道。
「懷乜嘢舊吖！我哋呢啲叫形勢所迫！我哋開喺斜路上面，下面灣仔大把好嘢食啦，唔做好啲，邊個上嚟呀！」阿豪粗聲粗氣地說。
他說話大大聲，言談間，總是嘮嘮叨叨，對這大牌檔，彷彿甚為不滿。
「啲人成日話嚟大牌檔好過癮，又拎啲相機嚟影，我就唔覺得過癮啦！畀我揀，我寧願喺鋪頭入面做呀！企喺個檔口沖茶，夏天又焗又熱，真係成四十幾度㗎！冬天啲牛油凍到好似石頭咁，啲手腳凍到硬晒，赤赤痛㗎！有得返轉頭，我寧願去對面啲壽司鋪度做呀！」
人家天天來蒲的天堂，對他來說原來是個地獄。
其實，他一直都沒想過要來老媽的檔口工作。
他在家中排最細，備受九個哥姐和蘇媽媽愛護，從不讓他在檔口幫手。他唯一的工作，就是讀好一點書。偏偏他無心向學，愛在街上蹓躂，十多歲就出來工作。
「我嗰時成日諗，世界咁大，無論點都要出去睇吓！」他說。
他到處去碰，十多年間，轉過幾份工。做過電影公司燈光，又做過廚房炒鑊，同是做飲食業，就是不肯回德如幫手。他本來一直沒有回巢之意，但現實的發展，卻令他不得不回來。

浪子回頭，肩負一家責任。
那是廿多年前，那時候，蘇媽媽已近七十，體力開始下降，兄姊們又在外各有發展，店鋪靠老人家一個死撐。阿豪看在眼裏，口中雖怨，心卻不忍，最後還是死死地氣回來幫手。
「阿媽冇叫我返嚟㗎，不過我知佢實死頂！咁你話忍唔忍心先！阿哥家姊個個讀到書，得我最冇用，我唔返嚟邊個返嚟喎！」他說。
阿豪雖然口硬，但心底裏還是孝順的，廿多年來，他每天呻但還是每天做，目的就是讓媽媽安樂。五十歲的他，今天還是跟蘇媽媽同住，就是怕她身體有事，希望在她身旁，凡事都有照應。
「阿媽鍾意做咪做囉！早幾年呢度起樓，建築公司斟過我哋，話補幾十萬叫我哋放棄個牌，冇大牌檔地方乾淨啲，可以賣貴啲嘛！不過最後阿媽話想做，咁咪做囉！」他說。
蘇媽媽堅持繼續做，其實除了這地方滿載他們一家的回憶外，更重要的，是她自覺對阿豪有所虧欠，時刻想替他留個後着，好照顧生計。「阿豪出世後，我成日都要喺檔口工作，從小到大，都沒好好照顧過佢……」蘇媽媽說。
蘇媽媽一心為兒子籌謀，奈何現實不如她所料。
她早前已接到通知，如果持牌人過身，大牌檔的牌照，已不能轉給兒子。儘管她們早已租下茶檔旁邊的鋪位，但鐵皮檔一拆，特色消失，生意能否維持，還是未知之數。對於這不明朗的明天，母子倆已沒能力想得太遠。
「做得幾耐得幾耐啦！我淨係希望阿媽身體好，健健康康，第日仲做唔做就第日嘅事！」阿豪說。
星街一直在變，沒人知，明天會變成怎樣。只知道，今日還有一家大牌檔，一對母子，天天默默沖茶烘多士，勤勤懇懇的，把整個社區，點綴得更有型有格，更有層次。

德如茶檔
地址：灣仔光明街2號
電話：2528 0713 ####