6月23日就係端午節，又到咗睇龍舟嘅日子……換着早幾年，我寫稿用呢句做開頭，實俾人笑我小學雞作節日文。但其實家划龍舟已再唔係老餅過節活動，好多人視佢為一種正式運動，一年到晚都玩得，更有好多公司組隊去玩嚟培養團隊精神，成件事好young！就連90後嘅大學生都鍾意玩，一於睇吓即將參加國際龍舟邀請賽嘅「科大龍」備戰實況。
由冇目標到有目標
家陣好多人心目中嘅大學生形象都係hea、走堂、爛蒲爛玩，但訪問當日我眼前出現嘅十幾位「科大龍」成員，畀我嘅感覺係好認真同拼搏。科大龍舟會已成立16年，每年都會報名參加唔同賽事，2011年就喺國際龍舟邀請賽大專組中奪得標準龍冠軍。
咁到底有乜原因，可令班大學生唔去蒲，而加入龍舟隊？有人話貪龍舟夠特別，有人話因為科大龍舟隊好出名，所以想入隊，至於主席Hugo就好簡單話：「我見啲人練到好大隻！」佢初時亦冇乜目標，「入隊後先發覺成個團隊嘅訓練好有系統，令人有信心做到好成績，成team人又會互相鼓勵。」龍舟就係咁畀咗佢目標，入隊3年嘅佢，今年會帶領隊員再戰龍舟邀請賽。
真正成功需苦幹
正當呢排好多大學生日以繼夜打《Diablo 3》之際，Hugo同佢嘅隊友一星期反而要入西貢練足4日，每次3粒鐘；就算冇比賽，都至少練兩日，莫講話打機，想唞都未必有時間。Hugo話玩龍舟令佢team人學到要為目標付出，一直堅持先會有成果，「想要好成績，就必須刻苦去做一啲唔舒服嘅訓練！」聽落好熱血，似足日本運動漫畫。不過都唔係人人咁捱得，訪問嗰朝就因出席人數唔夠標準嘅20人，搞到教練大發雷霆，足足訓話十幾分鐘，畀我見識到大學生少見嘅紀律。改善晒經常俾人批評嘅90後缺點，相信呢樣都係玩龍舟嘅最大得着。
科大千人玩
我哋每年都會招收學生入龍舟會，好多人Year 1就入會，今年全會有幾十人。經過訓練後見到能力比較強嘅，就會安排佢加入正式嘅出賽隊伍，合共有廿幾人。好多同學畢業後都會轉去舊生隊繼續玩，咁多年夾埋有成千人！
男女混合戰
睇端午節傳統龍舟競渡，會見到分大、中、小龍，但國際龍舟邀請賽等運動賽事，就只分標準龍（即中龍）同小龍，船身構造要依足大會規格，參加人數亦有規定（如以下所列）。呢啲賽事除咗全男班嘅普通比賽外，通常都有埋女子組同男女混合賽，女仔就算湊唔夠一隊，都可以拍男仔參賽。而就算係全女班出賽，近年多數照樣划龍舟，已甚少有端午節見到嘅鳳艇（船身結構一樣，頭尾裝飾由龍轉鳳）。
舟身解構
體能姿勢不可缺
划龍舟，科大教練阿Roy話最首要一定係體能，所以唔落水訓練時，都會捉班隊員做運動操fit。其次就係落槳姿勢，划嗰陣一定要腰、背、膊同時用力抽槳同落槳，再配合埋呼吸節奏，先至可以有效率咁不斷划。最後仲要全舟人合拍，隻艇至會快。至於各隊員坐咩位，阿Roy話舟中間比較闊，通常畀大份嘅人坐；而舟前方會划得辛苦啲，所以會安排體能較好嘅人坐，較弱或女仔就坐最後。
科大隊員點講
個人團體有得學
唔係人人讀緊大學，可以join校隊玩龍舟，不過坊間都有唔少團體開辦龍舟班，無論個人定公司組隊，都可以報名上堂，學費按人頭計。成隊人練到一定水平，就能好似科大龍咁，經香港龍舟協會報名參加國際龍舟邀請賽等賽事，一試身手。 機構：香港龍舟協會課程：龍舟初級證書班資格：12歲或以上，能穿着衣服游50米。內容：理論課程、下水訓練地點：沙田石門龍舟訓練中心、沙田石門安景街51E地段時間：每年4月至12月費用：$120（共1節，約8小時。）查詢：2504 8332 網址：http://www.hkdba.com.hk
奴COMMENT
大家都要參加喇！近兩年我哋商台都組咗龍舟隊參加國際龍舟邀請賽，由大家開頭柴娃娃，到家取得唔錯成績，除咗有專業教練指導外，仲需要每個星期抽時間練習。唔好以為只係用力就可以快，背後仲有好多學問！齊心、落水角度、鼓手都好重要！近年龍舟邀請賽都有好多朋友支持，一來有得參加呢種少接觸嘅運動；二來能增加團隊士氣，仲可以盡情打扮添，好玩呀！如果有機會，大家都要參加喇！ ####
過去幾年科大龍去過上海、廣洲、澳門等地同當地大學生比賽；上年亦喺香港參加過多項賽事，大專組同公開組計晒，共得到14個獎！
科大龍隊員個個就算唔係勁大隻，肌肉都相當紮實，的確係練龍舟嘅好處。
划龍舟要成船人落槳齊先會快，所以未練速度前，先要喺岸邊練習落槳，我見佢哋比同場練習嘅其他隊齊好多。
正式划時落槳嗰下需要勁大力，個個都划到咬牙切齒，練完3粒鐘，成隊人都散晒！
科大龍陳教練（橙衫）無論對隊員紀律同技術，要求都好嚴格，練習時划得唔好，更鬧到隊員頭耷耷。
練習用嘅龍舟比較簡單，船身冇乜畫花紋同裝飾，更冇龍頭同龍尾。
Hugo（主席）入隊年數：3年
標準龍參賽人數：16至20個划手+1個鼓手+1個舵手最多龍舟隊參加嘅項目，賽程由200米到2,000米不等。
小龍人數：8至10個划手+1個鼓手+1個舵手多數女子組比賽都係划小龍，通常賽程分為200米同500米。
大龍 46至55個划手+1個鼓手+1個舵手國際標準賽冇呢個類別，只得端午節比賽先睇到，賽程由500米至2,000米。
香港多數賽事所用嘅龍舟都係由大會提供，為尊重傳統，比賽時裝上龍頭龍尾裝飾。
國際賽例對槳嘅每部分尺寸都有規定，龍舟隊自備槳參賽前，需經過大會驗證。啲槳清一色用木造，差唔多有1kg重，用佢划艇都咪話唔攰！
鼓手作用係幫全船人打拍子划槳，咁樣行舟先會快，但8人賽可以不設鼓手。而鼓則由大會提供，鼓棍亦有長度規定。
舵手負責幫龍舟保持直線向前，不可缺少，而舵槳尺寸同樣有規定。
科大龍舟教練Roy 阿Roy喺科大教咗18年，睇住歷代學生成長，訓練時又嚴厲，唔怪得我見班科大仔開口埋口都尊稱佢做陳教練。
香港每年約有10個龍舟比賽，由唔同團體舉辦，好多科大學生都有參加，所以除咗冬天外，其餘時間都會操練。
準備落槳時，上半身要微微轉向內，外面隻手水平伸直，將槳推到最前。
落槳時支槳不能太橫，要盡量保持垂直貼住舟邊落，槳板約45度插入水，先至可用最少氣力令支槳入得深水。
槳板應插到俾水淹蓋晒嘅深度，咁至最有力推到龍舟行。
落槳後背脊要保持挺直，雙膊水平，直至抽槳先至再轉身向內，做番準備落槳嘅動作。
阿謙入隊年數：2年龍舟真係好講體能，我本身都有玩開運動，但初初划時都覺好吃力。之後仲覺得佢唔似打波，唔係一、兩個人勁就得，要20個人齊心！
Mollee 入隊年數：2年我本身好鍾意玩水上運動，所以加入龍舟隊，但女仔肌肉始終冇男仔咁發達，而且佢哋都冇特別就我，所以我都擔心會跟唔齊，惟有努力啲啦！
香港龍舟協會亦係訓練香港代表隊嘅官方機構，自問技術高超的話，可以隨時報名入會，等佢哋每年選拔精英入代表隊集訓，到時就有機會為港出賽。
留言列表
