電子狗 Bandai 最新 Smart Pet Phone狗唔咬人　扭計要識－明星靚相大分享☆

電子狗再度進化，這次玩變臉！ Bandai最新 Smart Pet，吃喝玩樂、唱歌跳舞樣樣皆能。插上 iPhone後，就有多達百種表情同動作，生動有趣，而且內置多個「面孔」替換，仲會扭計生病要食藥。電子狗唔使你執便便，但要識佢錫佢呢！

記者：許福合
攝影：潘志恆
Model： Katie@PureModels
查詢： JC Shop（31022783）

跟音樂節奏周圍走

未有 iPhone，其實市面上已出現過 iDog之類嘅小玩意，當然分唇極有限。而最新嘅 Smart Pet，不單有黑、白色小狗畀你揀，襯番自己部 iPhone之餘，仲識得憑聲音、觸摸而跟你互動，好似聞聲前後移動、左右轉等，雖然同真狗難以比擬，不過勝在郁動有節奏感，更可揀鍾意嘅音樂，即使唔「唱歌」，有時小狗唔高興，除了扁嘴外，還會亂跑發洩。不想佢亂動，可將 Smart Pet變成座枱式，這個狀態只會擺動頭部，配合表情，相當可愛。

■將女友個樣擺落狗狗度，畀啲愛心呵護佢。

■先把 iPhone裝上機殼，再組裝入 Smart Pet頭部。

不過要佢動起來，先要替 iPhone裝上《 Smartpet》 App，雖然免費，但暫只得日本 App Store提供下載，想玩就要開多個日本 Account。內附 iPhone殼，將手機套上頭部，再插上頂部音源線， Smart Pet就可以隨住聲音做動作。

■齋噏都可發出命令，不過小狗只識聽日文，卡娃兒呢！

■揮揮手小狗會前後移動，反應好快。

■主要動作方式為前後移動，亦可左右轉。

■可將 USB線加上裝飾用嘅骨頭。

■餓了吧？先吃骨頭。

疏於照顧會生病

小狗同真狗一樣，觸碰鼻子便會打噴嚏，而且還會做出哭、眨眼、笑、嬲等表情，好趣怪。筆者玩了不久，暫時可有四款面孔可選擇，還有四款被鎖着，想再獨特點，可自拍相片製成「狗身人樣」，要嚟戲弄女朋友，諗起都想笑。
目錄內可以搵到骨頭畀小狗吃，作為不合格的主人，筆者曾讓小狗病到五顏六色，最後在道具欄內找到針筒，幫小狗打支針才醫好！要留意，剛開始玩時大部份食物或道具都會在問號狀態，隨住跟小狗互動會陸續解鎖。有時出外，沒法帶上 Smart Pet，亦可抽出 iPhone照顧它。

■打開雷達，有時會收到禮物。