Optimus LTE II 2GB RAM 多工暢快－明星靚相大分享☆

Optimus LTE II 2GB RAM多工暢快

都市人乜都講快，各位睇吓身邊同事，個個一邊打字、一邊上網兼聽歌，務求將時間用到盡。唔知韓國係咪都興起呢種風氣，早前LG於當地推出了Optimus LTE II，規格嚟個大突破，配備當今手機市場最多的2GB RAM，加上1.5GHz雙核心處理器，不但開Apps夠流暢，仲令多工處理效能大幅提升，狂開10隻Apps都唔怕窒，任你點多心佢都應付得到。

售價：$4,380
狂開10隻Apps

Android手機嘅規格愈出愈勁，近期大家開口埋口都話四核心，不過今次新機嘅着眼點唔係處理器，反而係大家平時唔太留意嘅記憶體（RAM）。一般旗艦級智能手機都只會配備1GB RAM，一般文書、上網、打機都搞得掂，不過有時開多幾個大食Apps，Lag機總係走唔甩。因此Optimus LTE II特別加入2GB RAM，配合Qualcomm 1.5GHz雙核心處理器，多工處理能力即時超班；小記測試時狂開Flash短片、睇YouTube、玩《Smurfs' Village》等10隻大食Apps之下，操作仍然保持順暢，程式顯示可用記憶體仲有782MB，簡直游刃有餘！加上現時大部分Apps暫未為四核心處理器進行優化，2GB RAM搭雙核運算嘅優勢更加明顯！

微調Android 4.0

正所謂軟硬兼施，要將新機嘅機能盡情發揮，單靠硬件當然唔夠。所以新機預載咗最新Android 4.0系統，最重要嘅新功能當然係Recent Apps介面，長按Home鍵便會彈出運行中嘅應用程式，左右橫掃仲可以Kill Task，Multi-tasking更就手！除了Data Usage、人面解鎖等功能外，LG特意為介面進行優化，包括換頁3D效果、狀態欄快捷鍵等；其中最實用一定要數《Memo》，只要同時按加減音量鍵，便可即時在畫面上Jot Note兼畫畫，啱晒小記呢類成日要記事嘅人。

拍埋張microSD卡就見到8.9mm機身唔算好厚。

熱插拔式記憶卡，惟採用microSIM卡設計。

電池容量微增至2,150mAh，比一般手機長氣。
IPS亮麗大芒

外形方面，全黑長方形機身配合機背的防滑細紋，與早前的Optimus L7有幾分相似，第一眼睇落都幾Grand。不同的是，Optimus LTE II機頂右側備有一條可伸縮的天線，供韓國當地LTE上網、收看類比電視及玩專屬《LG U+》程式，可惜這些功能來到香港後都用唔到，淨係可支援3G上網。好在新機仲有個4.7吋大芒，採用高質素的IPS屏幕，色準自然；加上備有550nit亮度及720p解像度，用來煲劇、睇相冇得彈！可能廠商都預計到大芒特別耗電，所以為新機配置容量較大的2,150mAh電池，自然可以玩耐啲啦！

Memo介面可以寫字、畫畫，仲可以轉換顏色添！

長按Home鍵便會彈出多工介面，好易用。

試行10隻大食Apps，顯示竟然仲有782MB可用記憶體！

背殼用上近似橡膠的物料，並加上菱形細紋。

試片區
IPS芒出名高質素，用來睇YouTube HQ短片正到爆！

試相區
800萬像素鏡頭表現合格，拍攝樹葉時，連細紋都清晰可見。
規格表