小堅現時自組製作公司 PowerAction，與朋友合租觀塘廠廈做辦公室：「短期目標係有能力請人唔使一腳踢，夢想絕對係做導演拍劇、拍電影！」
搜尋氣
《半點收樹》靚抽 導演小堅：喺 TVB做冇前途！
免費電視發牌一拖再拖，呼聲最高嘅香港電視竟然落敗，呢個政府有幾黑箱作業？呢個決定有幾荒謬？週日（ 20日） 12萬黑衣市民自發上街包圍政總，用行動表態得一清二楚。
市民狂怒，曾立志做導演的短片製作人小堅，最近於網上自拍短片《半點收樹》勁抽無綫亞視水，又趁政府發牌獨欠維基時，再炮製「前傳」極速上載 YouTube。曾在 TVB任職初級助導的小堅，直言他的上司，做了 9年都仲係做助導，喺 TVB打工絕對「冇前景兼冇前途。」
《半點收樹》第一集有超過 3萬點擊，就住維基冇牌再添食嘅「前傳」，亦有超過 2萬人睇，小堅（左）都有客串一角做電視台編劇：「我都做過電視台，我知道入面真係咁，編劇、導演零權力，淨係負責照單執藥。」
我大學讀珠海書院，十幾年前開始成為 UMOVIE成員（成員尚有司徒夾帶等），成班有志向喺呢行發展嘅大專院校朋友仔一齊拍短片。當年係 just for fun，𠵱家係為儲客，因為好多搵我嘅客的確係睇過我嘅短片。搵食我靠拍 event、拍婚禮，其實我都有理想，想做導演、偶像係杜琪峯，但係香港真係冇咁嘅機會。
珠海畢業之後我去咗 TVB做 second PA（初級助導），學到好多嘢、喺好短時間之內就了解到電視製作流程，但係前景同前途呢？絕對冇！鬼叫香港得一間電視台（當亞視死），跳槽冇地方去，上邊唔走，下邊就永遠冇位上。一個監製做足 30年、我對上嘅 PA，做咗 9年都係 PA（助導），咁幾時輪到我？以前唔係咁㗎，以前唔係監製話晒事，唔使全部嘢都要跟住一個模式、仲容得下創意，導演見到有嘢唔啱都仲有權出聲。𠵱家導演功能係照單執藥，有問題唔出聲，下邊更加唔敢講嘢，所以咪會有啲千篇一律嘅節目、清朝咪會出現烏龍茶囉！
我想話畀人知，香港嘅電視製作唔應該係咁！香港都有好多人會用腦，係爭個伯樂！我唔係王維基啫、冇錢啫，但係我都唔係得把口，我有去做嘢。政府呢個發牌政策，竟然會否決唯一一個大量開拍電視劇、有望改變現狀嘅王維基，真係令人大失所望。我哋一定要上街、要畀政府壓力！雖然最終結果冇人會知，但係我肯定，唔踏出嗰一步，就一定唔會有結果！
十年前讀珠海新聞系時代與五湖四海學界中人合組 UMOVIE，惡搞過 Cookies〈心急人上〉 MV、《無間道》同《尋找他鄉的故事》，小堅更在安信兄弟廣告中出場。 
一年前小堅曾搵喬寶寶拍《 PA日記》算係另類。小堅話除咗 for fun亦有助拉客：「𠵱家好多客仔都係 UMOVIE年代儲落，我亦因此被大陸客請去做導演拍微電影。」 
撰文：朱小博
攝影：周凱瑩
留言列表
