Beauty Hunt

向師姐出發　許靖韻

每年總有一批批新人湧現，不過突出的買少見少，尤其係女新人。
今年 20歲的英皇新人許靖韻（ Angela），啱啱推出同名新碟《 Angela》，又有份拍由阿 Sa同杜汶澤主演的《超級經理人》；連惡搞《衝上雲霄 II》的微電影《歲月如歌》， Angela都成功揮低師姐泳兒、鍾舒漫，擔正做女主角！校啱時間年尾發功，好有機會掃幾個新人獎返屋企擺吓啦！

 

今年 5月先滿 20歲的 Angela， 10年參加英皇新秀歌唱比賽贏得亞軍（冠軍係譚永浩），同年簽約英皇。本身已經擁有 8級鋼琴資格的 Angela，初中開始不斷參加歌唱比賽，簽約後閉門苦練 3年，其間積極學唱歌跳舞，亦同古巨基拍過 Bonaqua廣告，直至今年先有機會出碟。雖然等足 3年，但 Angela冇失望：「呢 3年入面我學咗好多嘢、亦接觸過唔少新事物，今次呢隻碟都籌備咗兩年幾，雖然未有機會用我作嘅曲，希望下隻碟可以有我自彈自唱嘅歌！𠵱家公司都幫我計劃緊出商場騷唱 live，盡量畀多啲人聽吓我唱歌！」

 

 


早前搞新碟發布會，師姐阿 Sa專程現身撐場。《蘋果日報》圖片 

2010年參加英皇新秀，雖然只得亞軍，但比冠軍譚永浩（左）更早有機會做歌星。 

成龍叫試打

仍然係半工讀的 Angela，現時 full-time在浸大讀緊 finance，好在後生女唔怕辛苦，讀書唱歌宣傳都搞得掂。
「我好想試多啲新嘢，今年《超級經理人》入面嘅角色係做番新人，下次我想拍文藝片，或者動作片，因為有次見到成龍大哥，佢話我可以試吓打，不過一直未有時間學功夫。如果可以的話，我想好似大師姐祖兒咁成功，無論咩類型嘅歌佢都 handle到，而且我好欣賞佢嘅毅力，永遠唔會呻辛苦！」後生女肯捱就有運行啦！


雖然係新人，但 Angela在微電影《歲月如歌》入面先係主角，戲分比師姐泳兒更多，仲唱埋主題曲添！ 

今年英皇春茗， Angela（右）已有機會企埋一班師兄師姐隔籬影大合照，仲有得上台彈琴 solo。 

Profile

許靖韻/ Angela
年齡： 20
身高： 168cm
微博：許靖韻 AngelaChingwan（粉絲人數： 3,922）
Instagram： angelachingwan（粉絲人數： 4,159）
fb專頁： EEG許靖韻-Angela（粉絲人數： 759）


採訪、撰文：湯勵貞　
攝影：范仲良
化妝： Kandy Leung@Beauty Tech
髮型： Alex Chu@hair corner　
形象： Bryan@the Flaming　
服裝： Lily Brown

arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    tvb4life 發表在 痞客邦 留言(0) 人氣()

    E-mail轉寄