一言最近跟一些商舖投資者荼敍，席間有人擔心，話最低工資快將推出，小本經營嘅茶樓好慘情，事關呢啲酒家好多時係以低成本作為競爭條件，其中一環係盡量壓低員工薪金，死慳爛慳下先得以經營。

但最低工資實施後，隨時頂唔順，或者利潤微薄到食之無味，意興闌珊下，隨時唔玩。不過，過往經驗，啲茶樓老闆好精，好多時會等到過咗農曆年後，做埋春茗酒席，攞咗錢後至突然結業。

班舖位投資者都做好心理準備，佢哋話作為商舖或商場業主，遇到咁嘅情況都好無奈，只好事先準備定，開始物色租戶，一旦事情發生，隨時有租戶頂上，唔使白白幾個月無租收。

其實唔單止啲炒家有咁嘅預算，就連屋邨同屋苑嘅業主都睇到，聽聞領匯（0823）都開始察覺到，依家都密切注意，特別佢哋旗下咁多商場仔，街坊茶樓又特別多，絕對唔可以掉以輕心。

此商譽不同彼商譽

講開最低工資，大家樂（0341）近期成為眾矢之的，市場都批評佢表面加時薪，同時卻扣減員工食飯時間，結果員工薪金不加反減。一言跟會計師朋友傾開，佢話有位著名主播就住件事寫文批評，竟然鬧出笑話，成為會計界中取笑對象。

事緣主播喺文內提及，大家樂年報顯示，去年度集團商譽增加一千八百萬，而嗰段時間剛好是最低工資爭拗得如火如荼時候，大家樂商譽非但唔受影響，反而仲更加亮麗。然後主播又話，現時全城要罷吃大家樂，對集團今年商譽有多大影響，要看新的業績才知道。

會計朋友講，主播搞錯咗年報中嘅商譽，會計界所謂的商譽，英文係Goodwill，意思通常指集團進行收購後，若作價並非等同被收購項目的資產淨值，高出的部分就被稱為商譽。相反，主播就以為商譽係企業的聲譽，查實係兩碼子之事，真係擺咗個好大嘅烏龍。

大家樂年報入面都清楚解釋商譽意思，圖下為集團主席陳裕光。

最低工資加上租金上升，隨時掀起酒樓仔結業潮。

神父唔係大晒

香港仇富心態確實有點走火入魔，就連天主教神父都要罵埋一份，羅國輝神父喺萬聖節諷刺長實（0001）主席李嘉誠係魔鬼，之後長實旗下職員馬勵志以私人身份去信教區副主教，話對羅神父的言論感到失望及無奈。

件事曝光後，更加引起爭論，另一位神父陳滿鴻竟然公開講，話鬧人魔鬼好普通，既唔係粗口，又唔下流，佢仲舉例話魔鬼身材或者魔鬼蛋糕等，都係好溫和。

一言唔係教徒，都聽過好多聖經故事，喺聖經入面，魔鬼撒旦係一個大壞蛋，經常引誘人類做壞事，例如叫亞當夏娃食禁果，結果令到兩人被神逐出伊甸園，人類因而世世代代有原罪。再講，天主教或者基督教唔係成日話，唔信上帝要落地獄，而魔鬼就住喺地獄，你話魔鬼仲唔係十惡不赦之徒。

陳滿鴻神父竟然狡辯，引用唔知乜嘢理論，實在令人失望。再者，一言可以講，若陳神父向女性講，話對方有魔鬼身材，怕且佢隨時畀人告性騷擾。作為神父，唔應該亂講嘢。

陳滿鴻如果向女性講話佢有魔鬼身材，隨時構成性騷擾。

伍冠流夜宿凶宅

提到魔鬼，近期炒凶宅好出名嗰位炒家伍冠流，膽子真係十分大，話說有次伍生將個銀禧花園凶宅放盤，有個準買家話買冇問題，但要求伍生喺凶宅內過一晚先肯交易，伍冠流認為冇有怕，於是接受挑戰。

當晚佢單人匹馬帶咗張薄墊褥同幾本書就入咗間凶宅，仲遵守準買家開出唔可以鎖門嘅要求。當睇書睇到約十二點，佢就倒頭大睡，半夜矇矓間聽到有人走動的聲音，但因為太睏，話之你，繼續瞓。到清晨，佢又感到有人喺背後輕輕推自己，一轉身就望見嗰位準買家。

原來，位準買家半夜三點偷入間屋，睇吓伍生是否清醒，如果冇瞓到，佢唔會買間屋。之但係準買家竟然見到伍冠流瞓到扯晒鼻鼾，於是放心晒，天光即刻拉伍生簽約。

伍冠流膽子大，夠膽喺銀禧凶宅瞓一晚。