明星靚相大分享☆

下星期五喺紅館開騷嘅詹瑞文，之前改編完劉德華首歌，大唱《 I Don't Wanna Say仆街》後，最近又有新搞作，就係惡搞紅爆網絡嘅台灣電音天后謝金燕嘅歌《嗶嗶嗶》，重新填詞變做《嘟嘟嘟—嫁入豪門版》，唔知佢係咪講緊嫁入豪門嘅徐子淇同幫李澤楷生仔嘅梁洛施呢？

放大圖片

台灣電音天后謝金燕紅爆網絡，連阿詹都話會請佢嚟睇騷。資料圖片

噚日阿詹喺九龍灣化身「詹金燕」綵排，着住低胸裙嘅佢同班舞蹈員大跳勁舞，舞步學足謝金燕，搞笑到痹。佢話隻歌排咗四個鐘，啱啱錄好，今次係畀大家先睹為快，佢話《 I Don't Wanna Say仆街》首歌放喺 Youtube，瀏覽次數已破咗 134萬，嚟緊紅館個騷都有得再睇喎。

睇 50次 MV 放大圖片

詹瑞文舞步生鬼，令人笑破肚皮。

阿詹話為學謝金燕，睇咗首 MV 50次，因為要學佢廣東話唔正。佢又讚謝金燕條腿最吸引，自己都盡量剃腳毛，但係偷懶，上面嗰啲剃唔晒。問阿詹想唔想見謝金燕真人？佢話：「好呀，可以請佢嚟睇騷。」佢透露會請郭富城同黃秋生睇騷，咁會唔會請徒弟梁洛施？佢話係個好提議。阿詹幫無綫拍節目《詹 Sir踩過界》，佢話收視有 27點，係當日最高，但就因為太忙，所以暫時都唔諗添食。


詹瑞文着住低胸裙，聯同成班舞蹈員惡搞謝金燕嘅《嗶嗶嗶》。