o靚仔時睇親超人特攝片，總幻想自己係主角，威風八面地教訓壞人，人越大越現實，無晒童真！ Lotus代理就搞搞新意，將架 Europa S改裝成超人座駕，天寒地凍望住佢，仍有股熱血自丹田湧起，童年回憶即時 Call番晒出嚟！記者：徐影龍攝影：譚盈傑Model：曾劍波、 Hahel@GME Models服裝提供：麥迪奧（ 2575 8311）
其他副刊影片 超人拉花夠熱血
蓮花代理不嬲創意多籮籮，久不久就搞架特別版， Keep住品牌新鮮感。繼冰山雪蓮、哈囉喂版後，又整咗架「鹹蛋超人」版出嚟。以 Europa S作基本改裝，超低矮車身加誇張流線車形，本身已夠搶眼，全車噴上閃銀底油，再由頭至尾拉上如閃電般嘅鮮橙色拉花，每條拉花再綑上顯眼黑邊，望落勁有卡通風味，十足十《恐龍戰隊》之類嘅主角座駕，科幻感十足，泊喺學校門口，班學生仔肯定開心過見到周秀娜！若然你着埋企領外套、綁多條絲巾喺頸，叉晒腰企喺度食風，嗰份正義境界真係有三四樓咁高。唔只噴漆同拉花，超人版仲喺車身四邊加入黑色「導風板」，增添多幾分型仔度之外，仲有增加下壓力嘅實際用途，對車身極輕嘅 Europa S嚟講，絕對起到穩定作用。
放大圖片 
a.尾翼、泵把鐵網位、雙出喉，一整個戰鬥格。
放大圖片 
b.原廠 17吋蓮花軨，已勁貼近沙板位，毋須貪心再換巨軨。
放大圖片 
c.經典車款 40年後重生，向下打孖凸出燈框，相當型仔。
放大圖片 
d.全車頭唇、裙腳下方，均裝上黑色導風板，靚過普通版 Europa S。
放大圖片 
e.銀底車漆、灰色拉花，再加鮮橙色戰紋，視覺上極具層次感。
放大圖片 
擴闊車廂 靚女唔走光 放大圖片 
蓮花惡揸惡坐，已經唔係銀河唯一的秘密，超人未變身前只係平民一個，幸好 Europa S有別過往 Lotus，定位走向玩豪華舒服，唔似舊款咁齋到連冷氣都無，兼顧性能之餘，仲有朱紅色靚皮櫳同軟熟皮 Seat，車身再矮，都唔怕扽到斷氣。最重要係需練習 100次，先可純熟上落嘅超高門檻，嚟到 Europa S，已改低 12mm，車廂頂架亦有所增高，大大加闊「出入口」空間，着裙靚女上落終於可以「免走光、益街坊」。Lotus跑車定位特殊，兩類人最 Buy，第一係幾十萬買到十足收視率，就算唔拉花一樣咁搶眼；第二係 Performance，鋁合金車架及一堆偷輕部件，令車重僅為 995kg，配埋 2.0直四 Turbo偈，馬力有成 200匹，達到車輕偈勁嘅跑車最高境界，唔怪得 Lotus算係賽車場熱門常客之一。同代理傾番，原來銀底拉花及加護風翼，係一套改裝 Service，你鍾意嘅大可搵佢哋加落其他車款度，夠膽就將拉利、平治、拗花全部統一做車隊，肯定全港至威係你呀！
放大圖片 
f. 朱紅色皮櫳同皮椅，駕駛感比舊款進化得更舒適。
放大圖片 
g. 錶板框及幾個位置，均鋪設麖皮，跑味更高。
放大圖片 
h. MR格局跑車， Europa S差不多屬最抵玩一款。
放大圖片 
i. 門檻改低、車頂增高，上落車令人輕鬆不少。
Lotus Europa S
引擎： 2,000cc直四 Turbo馬力： 200hp/5,400rpm扭力： 272Nm/2,000rpm傳動：六速手動波箱售價：$649,000起查詢： 2877 0810（ Richburg Lotus） 
留言列表
