容祖兒封楊受成為Superman
單親家庭長大的容祖兒坦言為了感激老闆楊受成對她「義本無言」，所以她對工作義無反顧，努力付出。與對方相處愈長久，愈享受聽對方講人生道理。漸漸發現在楊受成身上感受到自小缺乏的父愛，視對方為Superman，每次感到驚慌和迷失，希望得到對方安慰和關心。
祖兒感激楊受成「一意孤行」力捧。
霆鋒賓主情無聲仿有聲
謝霆鋒初出道時曾被惡意攻擊，在喝倒采聲中成長，楊受成透露已故巨星張國榮當年曾為此親自致電他向霆鋒打氣，憶述此事觸動他深處，感動得熱淚盈眶。雖然是楊受成口口聲聲指霆鋒是他的「頂心杉」，但他從不計較，霆鋒亦深知對方愛錫自己，去年他主動續約，雙方有鞏固的信任和感情，結果這宗涉及三億元的合約，火速成事。霆鋒更坦言，萬一楊受成因事不能掌舵英皇娛樂，他第一時間會拉埋容祖兒延續下去，楊受成聞言非常感動。
霆鋒與祖兒視楊受成為「父親」。
祖兒愈唱愈強 為楊受成爭氣
「老闆，唔好咁感觸。」容祖兒在旁安慰道。眾人屏息靜氣，霆鋒伸手拍拍老闆膊頭，盡在不言中。
很難想像，左擁謝霆鋒、右抱容祖兒，在商場馳騁多年，地位舉足輕重的娛樂圈大亨楊受成如此感性，眼泛淚光……
英皇集團主席楊受成十八年前因緣際會涉足娛樂圈，力排眾議力捧霆鋒祖兒，雙龍出海。羅馬非一天建成，要成為具影響力的影帝天后，還需這位伯樂背後的支持。
今日，見霆鋒爭氣，所以回首他出道時被噓，記憶猶新，五味雜陳。
今日，也見祖兒爭氣，如女歌手金獎非她囊中物，楊受成會拋出一句：「我同你死過！」如此豪言壯語，只因他曾度過狗臉的歲月，深明爭氣向上，才可理直氣壯！
楊：楊受成 容：容祖兒 謝：謝霆鋒 記：記者
我認為佢靚過王菲
誰都知道容祖兒是楊受成的掌上明珠，看祖兒待楊受成，花言巧語欠奉，反而傻頭傻腦常逗對方不時搖頭苦笑。當年楊受成堅持力捧，成就今日天后地位。難怪缺乏父愛的祖兒視對方為父親，是她不二的Superman。
記：點解當年簽祖兒？據聞好多人唔睇好。
楊：唉！當時祖兒冇人要，最早期係黃柏高簽咗佢，但覺得佢唔靚，同佢解約。之後祖兒轉簽佳音唱片，但間公司後來喺香港冇做，有人介紹祖兒畀我哋，我叫佢去駿景聽佢唱歌，當日我認為佢靚過王菲。（說時邊笑邊瞄向默不作聲但笑瞇瞇的霆鋒。）祖兒一入間房，嚇到佢暈，譚詠麟、周星馳同成龍全部喺度，但佢好淡定。只係叫佢唱張惠妹、關淑怡，當時王菲唔係好紅啫！（又一次整蠱霆鋒）
謝：吓……（一臉尷尬。）
容：（取笑霆鋒）佢好少男o架！
楊：初初冇人理祖兒，個個飲酒猜枚，之後發現佢真係唱得好好。佢出唱片都好坎坷，有高層反對，話佢唔夠靚好難做，最後我拍心口話要出，結果佢首《未知》爆咗出嚟！祖兒踏入歌壇有兩個人要多謝，就係羅文同王傑。羅文咁紅，都願意拖祖兒出嚟合唱，而王傑開個唱，公司本來安排另一位女歌手合唱，係我堅持用祖兒，雖然公司反對，但王傑同意。
容：我工作最大動力，係令錫我嘅人開心，咁就會覺得自己好叻。多謝老闆嘅堅持，令我今日成績變得有價值。記得老闆講過義本無言呢四個字，佢話幫咗人唔使講出口。有個人為我付出咁多，係好講緣分，令我好感激。
記：眾所周知，楊受成好錫祖兒，怕唔怕其他藝人呷醋？點樣平衡？
楊：我咁錫祖兒霆鋒，因為佢哋爭氣，邊個話得我呢？我公司有七千個員工，每年出花紅都億億聲。同埋，要有公信性，我同好多電台、電視台講，對我順水行舟就夠，我今日唔能夠話要洪卓立攞男歌手金獎㗎嘛，咁樣係逆水行舟！但你話女歌手金獎唔畀容祖兒，我就同你死過！就係霆鋒祖兒咁爭氣，所以佢哋同我要求嘅嘢一定Yes！因為佢哋有分數。
視老闆為Superman
容：我哋唔過分o架！哈哈！佢係睇表現，唔會無緣無故去錫你。每次同老闆飯敍，佢會好似爸爸教小朋友咁叮囑我，可能我比較缺乏父愛，所以好享受同老闆傾偈，佢講過：「你每條羽毛唔係咁輕易長成。」所以我會事事小心同戒備，曾經同老闆講：「你係我生命中最後一道防線。」老闆係我Superman。
楊：本自傳第一章主題就係「義本無言」，我喺上海街出世，呢個三教九流嘅地方，差佬、黑社會乜都有，親眼睇住好多人拜完關帝但轉過頭就出賣人！所以我認為對一個人好，唔需要講出口，講出口嘅，就係假。
記：祖兒言行不拘小節，有冇試過激親你？
楊：（笑笑口）你用字真係客氣，唔係不拘小節，係成日講錯嘢！祖兒係唔經大腦，亂講一通，霆鋒係最難搞，但佢個心係好到不得了。霆鋒係好忠心嘅朋友、伙記，佢相信你，就乜都得，佢唔鍾意同人飲酒套交情。
容：我都好樂於做小朋友被照顧，例如工作上，好少問做咩、收幾多錢，因為相信公司安排最好嘅畀我。我由咩都唔識，到今日已經賺咗好多。
楊：係呀，容祖兒依家好有錢o架！（說罷拍拍祖兒膊頭哈哈笑）
容：唔係，我可以再有錢啲o架！哈哈！我成日戴埋啲豆泥手鏈，老闆就話：「我送畀你嗰啲唔戴？」太大粒喇，驚畀人搶！
楊：唉！（作激氣狀）送粒梨形、五六卡嘅石畀佢……（霆鋒插嘴：「送畀我啦喂！」）粒石依家升到二、三百萬！買時大約一百萬，你走去戴啲五十份鑽石，我送畀你嗰粒大十倍！啲嘢唔用邊有價值？唔戴出嚟鬼知咩！
容：擺咗喺保險箱。今日都想戴出嚟，但我媽唔喺度，開唔到保險箱，哈哈！
搞唔掂霆鋒
還差15分鐘才到訪問時間，楊受成在一班人簇擁下現身，隨後到的謝霆鋒第一句便叫：「老闆！」兩人來個擁抱，開始說個不停，待容祖兒出現，楊受成指揮她坐中間，說女士坐在兩個男人中間才像樣。未有安排坐身邊，但心繫霆鋒所言非虛，每每講到他，楊受成便直着腰板說得七情上面。
記：當年點樣同謝霆鋒結緣？
楊：廿一歲識謝賢，當時佢係大明星兼係我偶像！當日謝賢喺亞皆老街賭緊排九，佢玩完牌，好有禮貌同我握手，跟住做咗朋友。四哥冇機心，但唔識溝女。呢點同霆鋒一樣，外間以為霆鋒靚仔花弗，查實佢真係好少女人。
93年，喺北京搞英皇金融盃歌唱比賽，四哥拉姑同霆鋒都有去，當時陳伯（已故御用風水師陳朗）一見霆鋒，叫我一定要簽佢，話佢嘅成就係四哥十倍，會成為天王巨星，當時霆鋒只係十三歲。
霆鋒十六歲返香港，喺張耀榮先生間公司嘅魯班先師誕晚宴唱歌驚為天人，好多唱片公司都話簽佢，同我爭得最激烈係黃柏高。雖然外間以為我玩玩吓搞娛樂公司，但四哥拉姑知我份人爭氣唔輸得，所以將霆鋒交畀我，真係好感激，當年我冇呢方面嘅業績畀人睇，只係因為飛圖嘅葉志銘冇錢還畀我，所以將飛圖作為抵債。
記：霆鋒出道被指反叛，曾經出走返加拿大，表演又掟結他掟咪，點樣馴服佢？
楊：係我畀佢馴服咗！冇樣嘢搞得佢掂！查實係我就佢！（邊擰擰頭邊笑）佢企硬，我讓佢；我企硬，佢讓我。
謝：我要再三講，我從來冇掟過咪！其實當年同老闆有好多原則上嘅爭拗，返加拿大之後，每隔幾日葉崇仁（已故飛圖高層）打畀我：「老闆好錫你，你唔好咁硬頸！」之後我諗，要做番場好戲畀人睇，所以打畀老闆，想嘗試再合作。
無條件付出
跌蕩間，才看出人情冷暖。楊受成說起霆鋒被噓往事，竟淚滿盈眶，一度暫停訪問。
謝：當時返港後大家都冇信心，一出嚟就畀人噓，粗口呀、水樽呀……噓到連續四年冇一次聽到自己唱咩，每次都要咬實牙關唱埋落去，但冇諗過放棄，好多次跌倒，係老闆秤番我上嚟。
楊：霆鋒條路好辛苦，一出道畀人噓，佢難受，我更難受。最記得當時張國榮打畀我：「我都係喺噓聲長大，你同霆鋒講，叫佢努力，唔好放棄，我支持佢。」霆鋒係唔應該畀人噓，真係唔知點解，佢靚仔，父母係明星，冇得罪人，唔明點解對佢咁唔公道。
記：霆鋒，你覺得邊次跌得最慘？
謝：（搖搖頭嘆氣）數之不盡，直接啲講，係02年頂包案。我啱啱喺蒙地卡羅攞咗全世界最暢銷華人男歌手獎，隔兩個月就要我坐半個月監，對一個廿二歲嘅小朋友嚟講，呢個崩潰係冇得再大，有邊個老闆仲會畀機會我？
記：老闆咁撐你，係咪你續約英皇嘅原因？
謝：唔止。每次有困難，老闆係無條件幫我。今日我有間大公司（PO），但都係11年９月底先還晒所有錢畀老闆，係佢默默實現我夢想，呢啲係冇人知。
楊：平時我同霆鋒一句起兩句止。佢同我傾續約，都係三句講晒；佢話咁樣，我還佢一句，跟住大家話冇問題就握手！之後我畀Mani鬧到趴喺度。
謝：（笑）當時傾續約，我諗定三個方案，點知講完第一個，老闆就即刻答應。
楊：第一個梗係對佢最有利，點知我話制，哈哈哈！
謝：傾完老闆親自同我去Legal部門搞份約，全部人聽到呆咗，老闆仲話：「有咩事就搵我楊受成！」我真係估唔到！其實，老闆同我都好重感情。當年葉崇仁死，陳伯叫我唔好去（喪禮），否則衰五年，但我一定要去，陳伯就畀封利是叫我喺門口燒。
記：霆鋒依家開咗公司，有咩意見畀佢？
楊：佢用二百萬請伙記去旅行，你話佢幾有錢？遲啲佢有錢過我！哈哈！佢跟我咁多年，知道做老闆嘅態度同胸襟，佢係有。
發奮向上 緣於自卑
多次強調做人要爭氣的楊受成，對爭氣一詞身同感受，意義深邃。《爭氣》作為楊生自傳之名，亦是愛將祖兒的金曲，祖兒笑指老闆的電話接駁鈴聲一直都是《爭氣》。楊生小時雖是鐘錶店的太子爺，但實則有苦自己知。「老竇唔係打好江山畀我做皇帝，查實我日日跑山撲水。老竇不擅理財，只係鍾意娶老婆同生仔，我有十個妹，五個細佬，你話一間舖頭仔點養得起咁多人？試過一星期去五六次當舖，由細至大都係underdog，所以我謙卑有禮唔係做出嚟。」
緣於自卑，受盡白眼，所以楊受成直言常有四、五萬元現金不離身。「由細到大都係好窮，冇大舊錢喺袋會好冇安全感。」
延續英皇精神
問楊受成口中的「頂心杉」霆鋒如何看英皇大家庭，祖兒插嘴：「好疏離！」連霆鋒都不好意思，直認經常激嬲老闆：「有年老闆預祝我生日，但我都頂到佢要即時走人。事後Mani話老闆預備咗份過百萬嘅禮物畀我，我竟然搞到佢咁唔開心走咗去！但呢兩三年會諗，老闆都一把年紀，如果有日唔再支持英皇娛樂，Touchwood講有咩病痛，第一個我會打畀祖兒。」眾人一臉驚訝，祖兒問：「你頂住？」
楊受成說：「我諗因為佢反省過，知道激咗我咁多年，我嚟緊唔係好長日子，再激死我就冇人激。」祖兒緊張：「啋啋啋！如果有呢個機會，我想承接落去。」霆鋒接着說：「係攜手將英皇娛樂嘅精神延續落去。除咗父母，有邊個係喺你有問題時，會諗起？老闆係我哋首選。如果老闆有咩頭暈身慶，我哋唔打落去？正×街仔啦！十一年前，老闆講過只錫兩種人，一種係有料同爭氣，另一種係忠心。有啲人係叻極有限，但忠心幫公司都係抵錫！」楊受成聞言即拍掌：「係！呢句中！佢哋真係好好，有本事、有本心，我真係好開心。」
後記：心思細密
訪問中楊受成充分表現其心思細密，除了清楚記得祖兒和霆鋒何年何月發生的軼事外，為令訪問圖片構圖更為美觀，拍攝時茶几上應放紅酒或咖啡這樣的小節也兼顧到。
君子坦蕩蕩，楊受成、霆鋒、祖兒事前冇夾過，無所不談，就連楊受成都不禁說一句：「同佢哋好少好似今日咁傾偈。」
教祖兒買樓 霆鋒呷醋
祖兒和霆鋒為圈中吸金王，但楊受成即場向祖兒興師問罪，指她揀Job做！霆鋒則大爆老闆只向祖兒介紹豪宅筍盤，爭寵爭出面！
楊：我唔使靠佢兩個搵飯食，叫做有小小成就，好富裕，佢哋同我搵幾多錢都好，我十倍畀番佢都冇所謂。霆鋒祖兒共通優點係唔怕蝕底，祖兒從未試過問做呢單有幾錢、做幾耐。最近有單Job酬勞三十萬，但佢話辛苦唔做！嘩！佢依家真係有錢！
容：吓？我幾時講過？
謝：老闆話雖然初初聽到覺得怪怪哋，但其實係開心。
楊：啱！唔通想啲伙記日日跑山借錢？聽到霆鋒買樓買舖祖兒掃豪宅，我都開心！如果話佢阿媽要借錢交租，你話做老闆幾冇癮？
所以我叫旗下藝人都要買樓，人最緊要有個殼，有間屋個心會定，先買樓住，跟住買樓收租，霆鋒最叻買好多，買咗擺花街成條街咁滯，係擺花街王！
容：我渣啲！記得《我的驕傲》未出前，老闆話有好盤想介紹我。
謝：（肉緊）你打畀我嘛！老闆唔會話我知呢啲嘢！已經話你知幾次，我就一次都冇，佢唔錫我！
楊：霆鋒有專人同佢搵樓，佢真係好多錢，如果佢再有錢啲、爬我頭點算？我不知幾驚！（語畢三人笑作一團）
容：（高聲詐嬌瞄向霆鋒）你咁醒，我咁蠢！老闆話個盤好好，但我擔心咗七日最後冇買到！因為我當時又肥，個人未係好得……
謝：（陰陰嘴笑寸祖兒）即係依家不得了喇係咪？
容：好少少啦！當時真係好擔心，個盤喺舂坎角獨立屋花園洋房，講緊係二千幾萬。
楊：係我公司起。我話如果你冇錢可以借畀你，送裝修畀你。
容：我如果失聲點算？咁就乜都冇！所以最後唔制！
楊：依家間屋起碼值兩三億，祖兒本來話扑錘，但開心咗兩晚，之後五晚又擔心到瞓唔着，最後推咗我！不過都好，如果佢買咗，依家好有錢，就唔會做嘢！
容：又唔係喎！人嘅本性係唔會變。做嘢係以工作性質為大前提，唔係為錢。老闆笑我啫，佢明嘅！
留言列表
