Alan Wake 揸住電筒就夠照－明星靚相大分享☆

只係一味開槍打喪屍玩得多都悶，憑《Max Payne》響朵嘅Remedy就用咗幾年時間，開發出以驚慄懸疑包裝，兼且加入另類射擊玩法嘅《Alan Wake》，可以體驗到愈玩愈驚心嘅故事推進之外，亦能用唔同光源射低突如其來嘅「黑人」，玩落真係好有新鮮感！

故事講述主角Alan Wake係一個暢銷驚慄小說作家，一心一意諗住帶老婆去旅行搵寫作靈感，點知到達後老婆神秘失蹤，在搵老婆嘅過程中，仲不斷發現自己仍在構思嘅故事「原稿」散落各地，仲一步步走進故事劇情，慢慢變成自己小說中嘅主角。

遊戲中會遇見其他角色，但唔係個個都咁好人。

遊戲畫面做得出色，風景都幾有明信片Feel。

雖然英文發聲，但遊戲介面同字幕全中文化，唔怕睇唔明。

懸疑情節似追劇

跟好多大賣血腥、異常核突場面嘅驚慄遊戲唔同，《Alan Wake》主要以氣氛取勝，連遊戲中由人類被「黑暗魅影」控制而變成嘅怪物，遠睇都只係似個黑影，連樣都見唔到，更唔見爆血、甩頭嘅畫面。除此之外，遊戲劇情同表達手法都幾創新，玩玩吓會轉為Alan嘅內心獨白，又或者經由重讀「原稿」重組番故事嘅面貌，有一種追睇劇集嘅感覺。《Alan Wake》遊戲中分為多個章節，而每一章都會有主題同高潮位，仲有伏線預告下一章嘅內容，鍾意玩完一章抖吓再玩又得，又或者一口氣煲完整套遊戲都得。另外，由於《Alan Wake》本身已經中文化，可以聽住英語發音配上中文字幕，唔怕跟唔切故事嘅發展。

電筒既係武器，亦係搜索時必備嘅工具，好在電池電力長用長有。

玩家可駕駛汽車代步，而且車頭燈更係殺敵好幫手。

遊戲大部分篇幅都發生在夜晚，熄住燈玩都幾心寒。

先照後打見光死

之前都講過《Alan Wake》用上另類射擊玩法，遊戲中最重要嘅武器就係「光」，因為故事中所出現嘅「黑人」都有層黑影護身，要用燈光照走黑影先能夠直接攻擊真身，所以無時無刻都見到主角揸住支電筒周圍走。不過電筒覆蓋範圍細，次次都要先照走黑影再開槍未必掂，所以在特定關卡裏面，可以使用大型射燈提升效率，更要善用閃光彈同訊號彈這兩款「大殺傷力武器」。雖然黑影外表冇喪屍、鬼怪咁核突，不過都一樣難纏，又識得用各式武器同隔空取物，將家具或者汽車當成武器襲擊玩家，勁過明刀明槍揸刀劈。

製作人教路：要帶眼識人

《Alan Wake》遊戲製作人Oskari Hakkinen，日前專誠由芬蘭飛到香港同機迷解畫。Oskari話無論係故事同遊戲引擎都係重新開發，所以要用上5年時間先完成，佢仲提醒玩家遊戲中遇到嘅配角，唔係個個都係好人，記住帶眼識人！