明星靚相大分享☆

添食 13集的《荃加福祿壽》踩行油趕拍，王祖藍扮女人愈扮愈紅，下月仲會喺伊館開《咪咁扮嘢王祖藍演嘢會》，當紅程度拍得住「亞太區最受歡迎男歌手」林峯。

拖成個月

王祖藍期表密麻麻，據知月前，一向愛用祖藍嘅大快活，趁勢搵佢拍厚切豬扒電視廣告，點知無綫卻遲遲度唔到期，搞到大快活個廣告遲咗成個月先出街，打亂晒成個宣傳計劃。為免歷史重演，有傳大快活新一輯廣告，諗住搵番之前合作開嘅杜汶澤幫手，一度打算飛起祖藍。大快活公關部發言人上週四則對本刊回應：「你哋喺邊度聽番嚟 o架？總之冇咁嘅事啦！（咁係咪會照樣用番祖藍？）呢啲係商業秘密，唔可以透露！」

《人間喜劇》拍好成年，嚟緊終於會喺 7月 8日上，咁啱係世界盃休戰。睇吓到時有冇佢哋兩個嘅大快活新廣告啦！

「一日瞓得 3個鐘」

至於杜汶澤乘機搶食，經理人 Mani表示：「唔係飛起祖藍，而係祖藍加杜汶澤一齊拍，配合佢哋套新戲《人間喜劇》一齊出。」而王祖藍就堅稱冇被飛，不過自己就真係忙到死：「每晚拍完（《荃》）我哋即晚睇 playback，我哋三個會跟埋剪接、錄音、混音，第日再度橋，基本上一日瞓得 3個鐘。不過我記得我應該仲有三輯廣告同佢哋拍喎！」你咁紅，點敢飛你呀！