明星靚相大分享☆

09年開始放片上網，洋名叫 Leo嘅陳宇峰，因為覺得 hip hop王 Eminem個名有型，所以將自己英文名合併，化名 Eminleo，憑《希特拉都取消唔到有線合約》引起共鳴，緊接嘅《爆笑字幕版足球小將》系列，到家連載中《九唔搭八》、《懷舊小學雞》等系列，總點擊率超過 600萬人次。 Eminleo解釋片中例必爆粗都只係表達自己：「我只係想引起大家討論。片中講粗口只係隨意，用嚟發洩，唔係攻擊人。」
Eminleo在 F.4時往英國讀書，現於英國倫敦大學（ Royal Holloway）讀管理系 Yr.3。佢話因為屋企人炒樓發達，先可以元朗仔進駐九龍塘畢架山 3,000萬豪宅。

唔認電車

Eminleo除咗成日上網，又會玩電車仔最愛《寵物小精靈》 game，名副其實富貴宅男。「我一瞓醒就開電腦，到瞓覺先熄，平時都會用三、四個鐘頭打機嘅，其實都鍾意打《 Final Fantasy》 o架，我都有約舊同學踢波，唔覺自己係電車男。」
Eminleo唔認自己電車，又話自己唔鍾意睇 o靚模：「 o靚模令到書展變晒質，勉強要揀就係動漫 Maggie囉！」現有一國產女友嘅 Eminleo仲力撐電車最憎嘅貪錢港女：「叻嘅女仔追求有錢嘅男人好正常啫！我都歡迎啲貪錢港女埋身 o架，俾女圍梗係開心。如果個女仔貪錢嘅，睇吓去到咩程度，又有冇本事令我放水啦。」 Eminleo有女有米又大方，葡萄死一班高登爸打毒男。

撐港女 Ruby

Eminleo一向都撐港女，今年 4月尾會考港女 Ruby萬人圍插嘅時候， Eminleo都拍咗段片講 Ruby：「佢又係一個好似我咁樣戇××對住 cam講低能嘢嘅人……大家鬧還鬧，就唔好人身攻擊。」喺片尾， Eminleo就扮番 Ruby個經典「 Ruby Close」，撐到 Ruby行。

孖女歐遊

Eminleo和女友啱啱喺 5月頭去西班牙旅遊，仲參觀咗巴塞主場嘅魯營球場，恨死一班波牛。 Eminleo仲話將成個歐洲玩到七七八八，就更加恨死大班港人。