明星靚相大分享☆

唔係貪錢藝人

除非 die hard fans，大部分人認識盧巧音都是因為〈好心分手〉。作為流行樂壇的經典，〈好心分手〉橫掃 02年各大頒獎禮至尊歌曲大獎、專輯《品味人間》銷量近 10萬、衍生出多達 17個版本、至今仍然高踞卡拉 OK熱唱榜。無法相信通俗泛濫到令人生厭的 K歌之王，怎麼可能是自命 dreamer的 rock女代表作嗎？盧巧音解釋：「咁多年版稅我冇袋過一毫子，因為佢係雷頌德嘅歌。」
畀我經歷多一次，紅到嗰幾年咁……咪搞！我朋友從來唔多，出嚟玩永遠鐵三角，三個人喺 K房唱王菲同 Beyond。一紅，無啦啦走嚟好多人同我一齊唱 K，大部分都係圈中人。本來唔多熟，行街食飯又無啦啦叫埋你，連出街買嘢，名牌袋、名牌鞋都話覺得啱你，買埋你嗰份……呢啲人跟紅頂白到出面，到唔紅啦……一早走晒。
個個話我耷咗，咪話囉！我個境界已經去到人哋講乜、雜誌寫乜，都唔受影響。睇相佬一早叫我改名，話「盧巧音」有名無利……個名係爸爸起，我做咩要改？再講，我又唔係啲貪錢藝人。
同我一齊出道嘅好多人，豪宅都講緊有幾層，使乜羨慕？人哋付出幾多至得 o架！呢啲係辛苦錢，我唔恨……有廣告都冇人搵我拍啦！我咁多紋身……
細個阿媽已經話我諗嘢不切實際，專鍾意畫畫、唱歌呢啲搵唔到錢嘅興趣。喺專業教育學院讀完 fashion design，明明有得入 poly，我為咗做歌星放棄咗；出碟唔夠使，我喺 TOPPY同 Swank全職設計櫥窗，一個月二、三萬不知幾好景，唱片公司一叫我返去做第二隻碟，二話不說就辭工，最多做完碟再搵工囉……條命生成，好彩屋企人知我性格，從來唔迫我畀家用。

唔好試毒品

父親是小巴司機，在黃竹坑屋邨長大，有一個姐姐一個弟弟，排行第二的盧巧音說，自己童年自閉，青春期反叛，入行以後更是行事飄忽。預期之外的事業高峰過後，重回原本單純、乏味的深閨生活，被閒人誤解成被不良嗜好自毀前程都算，最難過自己親生阿媽都係其中一個。
我明，我瘦，我係 rock友，又成身紋身，就離唔開毒品 o架啦！毒 P人哋請食？發咗達咩？我唔明有嘢點解阿媽唔直接問我，自己匿埋喊。我同佢講，你唔好信出邊嗰啲啦！ touch wood，你個女呢一刻好健康、生活好正常！
我瘦係健康，餐餐自己煮，飯食紅米、永遠少油少鹽。我由細到大都唔蒲，間中只會飲少少甜酒。係有一啲 band友有呢樣嘢（毒品），都有人叫我試吓，我都話：「你哋享受啦，唔使預我。」喺度真係忠告啲小朋友，唔好試，食完又唔會勁啲，作歌又唔會好聽嘅……我最曳唔係呢樣。
之前屋企請咗個外傭，佢偷咗我隻表俾我炒咗。嗰隻 IWC唔係話貴，但好有意義，係當年一班 Sony同事夾份送，其中一個叫 Philip嘅高層，佢 cancer過身好多年。啱啱入行我好反叛，呢樣唔肯嗰樣唔接，郁啲仲要講粗口， Philip有權唔聽我發脾氣爆粗，有權唔再簽我，但佢選擇係聽我鬧完，再同我講道理，似我爸爸，佢係我呢行最敬重嘅一個人。
我以前係咁，郁啲發脾氣，呢行仲有一個人俾我鬧過。好後悔，不過我冇問人攞佢電話同佢 say sorry……兩三年前嘅事，我後悔咗兩三年，亦都心甘命抵，就算呢兩三年由佢嬲我由佢唱我……我抵！有啲錯犯咗，唔係講句 sorry就乜都抵消，有啲嘢係應該要記住，有啲結果應該要承受。

最想做老婆

比起事業，盧巧音在愛情上明顯積極渴求得多。 02年與余文樂分手以後，先後與演員彭敬慈、設計師 Eric So、年幼 10年的紋身師傅拍拖，去年初戀上樂隊 Kolar主音蘇浩材（ Sammy），最近更自爆明年結婚：「我下一個夢想，係做太太同媽媽！」
雖然未求婚，不過大家都覺得係時候，希望出年結婚，等再好啲，就搬間大啲嘅屋、生小朋友。再好啲，唔係我，係佢……我今次出碟唔係對呢行仲有野心，只係為信念。我諗，家嘅盧巧音唔同以前，只係一個小女人，覺得另一半可以更好，只想做另一半背後嘅女人。拍過咁多次拖，第一次遇到一個人既係男朋友，亦係 best friend。