明星靚相大分享☆

Kurt的公司本身做開傳統手機遊戲，於 08年見 iPhone冒起，寫了 2隻 iPhone game《過橋抽板》及《火燭車》試市場反應，很快便榮登最受歡迎 Free apps下載遊戲頭幾位；而《過橋抽板》更上過第一位。
當時他見免費 apps反應好，便計劃設計一些收費 apps，「講起 iPhone熱 08年未係最勁，到咗 09年出咗 iPhone3GS，明顯多咗好多人用，下載 apps數量多出 3、 4倍。自從推出咗收費嘅 iPhone遊戲後，但相比免費嘅，反應差好遠， 10個下載免費 apps嘅，只有 1個會下載收費；所以最後決定主攻免費 apps下載，靠食廣告費。」

地道 game最受歡迎

近年妙格娛樂推出的大多是棋藝及麻雀遊戲， Kurt解釋香港人生活節奏急速，花時間玩 iPhone遊戲多會是上班途中、等車搭車時，太複雜難玩反而不適合這個市場。「 iPhone apps遊戲市場好大，但競爭同樣大，由於由 Apple統一渠道發放，亦即係話你要同日本、美國寫 apps嘅公司競爭，相比佢哋我哋間公司規模細好多，要突圍，我哋就主攻一啲 localize嘅設計，例如三國誌鋤大 D，個 game勝在夠親民又易玩。」
說起競爭，香港亦有不少寫 apps的對手，有些是 freelance形式，屬一人公司，「呢個現象就好似當初啲人一窩蜂去寫傳統手機遊戲，好多係 one man band，冇嘢 support，其實咁樣好唔健康，好快就汰弱留強；而且要成功唔係就咁掉個 game出嚟就得，要有成套嘢 support，點樣可以發揮到最大效用，先會賺到錢，好似可以利用呢啲 mini game幫商品或者公司宣傳，喺 09年我哋開始着手喺呢方面發展，做埋 digital marketing嘅服務。」

配合推廣效益更大

妙格娛樂先後和信用咭、商場、體育用品、隱形眼鏡公司合作，利用 iPhone apps和其他媒介，如社交網、 road show互相配合來做宣傳，互動性更強。可能從前寫 apps只賺一萬幾千，現在推出成套服務，每次可賺 5至 30萬元。利用 iPhone apps做宣傳，他們試過有好多新的嘗試，例如尖沙咀 K11商場，集藝術、購物於一身，他們利用 iPhone apps來介紹商場，再把 QR code（即本刊睇片的壹斑碼）放在商場展品旁，顧客利用 iPhone影下 QR code即時獲得更多展品相關的資料。
另一個較特別的是幫 master card寫 iPhone許願 game，原理好似拋寶牒，搖一搖個 iPhone，畫面就呈現寶牒掛到樹上某個位置，而結果會顯示在 facebook內。「加入埋 facebook呢啲社交網作跨媒體宣傳，全因為 iPhone只係自己同自己玩，想加強曝光率，就要加入埋網絡，互聯網係無界限，好似喺 facebook上 click個 share button，隨即你所有朋友睇完，再 click傳開去，一傳十，十傳百，好快傳遞開去。」

iPad商機無限大

今年 4月蘋果推出 iPad，部機未到手時， Kurt和好多人反應一樣，覺得只不過是一部放大版的 iPod touch，但在美國訂回來，看到實物感覺截然不同，有好多零感在腦海中閃過。「攞上手，就知掂，係一個好好嘅 marketing tools，大畫面、有聲音又夠輕巧，最緊要係夠型，可以做到好多互動性嘅嘢，我哋就同博士倫隱形眼鏡搞咗個 promotion，寫咗個 iPad apps遊戲，畀班 promotor女仔攞住個 iPad畀途人玩，成件事 upgrade晒，比起傳統白紙黑字嘅問卷做法有趣好多，啲人見到可以玩吓部 iPad都興趣大增，我哋會將呢個測驗眼睛敏感度嘅 game及心理測驗同時放喺網上及編製成 iPhone apps。」
在 Kurt的辦公室內，見到有成 10部 iPad，記者笑言他好似水貨佬，他說這些是託人在美國買再速遞回香港，比起香港買水貨平好多，為方便客戶，有時要提供 iPad，實行一條龍服務。 7月 iPad在港正式發售， Kurt預期不少公司也會用它作為新的宣傳工具。