身邊多嘴靚女朋友知道我將要訪問天氣小花黃婉曼時，用抱怨的語氣問我：「你可唔可以訪問啲紅啲嘅人o架？」

黃婉曼也不算紅？跳出香港那個啊！縱使她已沒有再主持天氣報告，毫無疑問，她仍是天氣女郎中最紅那位。廿六歲的她不抗拒知名度提升，但抗拒「天氣小花」稱號。她在網誌中寫道：「原來我已經廿六歲。應該算是中女了吧，何以還叫小花？」原來她的中女分水嶺在廿五歲。「我係潮州人，廿四、五歲已經唔後生o架喇。」

天氣中女黃婉曼，原名粘冰冰，藝名是她父親一位有豐富文學造詣的朋友起的，她覺得很瓊瑤。早前她跳出電視框，這邊廂跳到中國移動旗下雜誌《12580尚悠》當總編輯，那邊廂又跳返無綫主持世界盃節目，更到apm擔任世界盃球評員，一般市民可和她近距離接觸。

「想人哋信你，要做好嗰樣嘢。人哋叫我嚟唔係要性感，我係嚟講波，唔係賣身材，咁我係咪要學好啲足球吖？」

她說話速度甚快，間中達至「脷」程度，腦筋轉得快的人多數如此。會考2A6B，高考3A1C，加上豐滿身材、甜美樣子，不是她的男友，也有愛上她的理由。

隨口變秘笈

「『跳出香港』係隨口噏，當時話唔好死固固咁話『之後去世界各地城市睇吓天氣』，我都冇意識到原來『跳出香港』係我講o架，咁啱我跳吖嘛。有啲嘢係唔使度，人生有太多未知，你畀心機做好自己嘢，就會有其他嘢嚟。」

無綫新聞部出身，黃婉曼卻沒有予人「懶」認真的感覺，真人就如她的金句「跳出香港」般跳跳紮。從她的說話速度估計，她未說畢一句，下一句想說的已在腦海出現，嘴巴追趕腦袋，終於愈說愈快。「我係好心急嘅人，頭先化妝師同髮型師都話我講嘢太快就嚟聽唔到。」

這種人是我聽訪問錄音時的大敵，我在鍵盤上的手，怎也追不到她的口。「你可以唔使聽番，你打嚟問番我咪得囉！」真搞笑，那我為何要出來跟你做訪問？本沒打算取她電話號碼，也得改變主意。

黃婉曼應apm邀請擔任「開心球評員」，她說：「我鍾意卡卡，唔係因為佢靚仔，係因為佢乖仔，冇咁多緋聞。」

「大家見我跳跳紮，其實我都冇諗過要行咩可愛路線，同埋行呢條路線一定唔長久，講靚，大把靚過我好多啦！只不過我突然間出嚟第一下，大家會覺得特別囉。香港社會唔好變到咁，我唔贊成咁樣，我好怕自己成為先例，你出嚟靠樣靠身材，跳跳紮，人哋會睇唔起你。」

大學未畢業，無綫已聘她加入《新聞透視》。打滾數年，晚間新聞改革，才以秘密武器身份報告天氣。

「我都曾經覺得《新聞透視》係一份絕世好工，《新聞透視》啲記者都係四十幾歲，做十幾廿年都唔會走，唔會請啲咁新嘅人，難得嗰時請我，我都覺得係終極目標。」

做半小時的《新聞透視》無聲無息，做兩分半鐘的天氣報告反令她人氣爆燈。

「都幾灰o架，如果我企遠啲睇，我有付出唔講，你見到一個人喺度笑、跳跳紮一、兩分鐘，純粹因為咁而鍾意你，我覺得唔順氣。

「《新聞透視》嗰一類節目好多人做緊好多嘢，半個鐘嘅節目一啲都唔容易，要好努力寫稿、約人、摷料，個啲辛苦係冇人睇到。」

簡單變複雜

腦筋轉得快，卻拼命要過慢生活；生活多姿多采，又喜歡放假呆在家中，喝杯咖啡靜靜過一天。黃婉曼來港前，其實在汕頭過着很簡單的生活。

「朝早五點半起身，六點半打羽毛球，跟住返學，中午返屋企食飯，食完飯瞓個晏覺，跟住返學，四、五點放學，六點返到屋企，睇電視新聞、食飯做功課，做到十點一定要瞓。

「阿爸不嬲喺香港做生意，當時屋企人都反對我嚟。我喺大陸讀啲叻學校，各方面都好好，無謂轉。我呢廿幾年就係不斷轉，我小學、中學都轉過好多學校，都唔知點解，總之就轉轉轉。一時返屋企住，一時又去阿嫲屋企住，轉得好緊要。

「以前喺大陸讀書係一般叻，嚟到香港忽然考全級第一、做班長，香港畀好多機會我，我參加好多課外活動：朗誦、唱歌、書法、古箏、話劇、辯論……星期六日都喺學校度過。

「我想好安定，朝九晚五，朝頭早一家人食飯，跟住返工返學，夜晚一齊食飯一齊睇電視傾吓今日發生咩事，好穩定嗰啲生活，但有啲嘢唔到你諗囉！」

事實的確如此，她近來凌晨三、四時才睡，翌早又要起來，每天去多個地方，沒有一刻停下來。

黃婉曼的網誌叫《曼‧生活》，她很努力更新。因為世界盃，她出席了很多活動和接受訪問，但似乎不合她的生活節奏，當事人謂「食得鹹魚抵得渴」。

不是明星

當黃婉曼登上了娛樂版，有狗仔隊主動跟蹤，又出席商場活動，大家已當她明星般看待。

「你覺得我係明星，我又覺得我唔係喎，明星係唱歌拍劇個啲吖嘛！只不過呢一刻大家好奇， 一個新聞人突然上咗娛樂版喎，想知道呢個人究竟係點，有一刻覺得好似明星咁咋嘛。我警覺性好低，我都唔覺得有狗仔隊跟我。啲人都會提我，要小心去街，唔好篤魚蛋呀，要化『行』妝，我都唔會，都係素顏，我都係返工放工返屋企，最多食吓糖水，所以我冇嘢囉！朋友話我要買太陽眼鏡戴喇，我心諗你唔戴咪冇人認得你囉，一戴就全世界都知，點解一定要做啲嘢去標榜『哎吔我好明星呀！你會認得我呀！』咁樣？

「以前一件衫着幾次都冇所謂，我開始覺得做明星一啲都唔好玩，次次都要唔同衫！」

她玲瓏浮凸的身材，也給寫到報章標題上作賣點。

「呢啲唔係讚美嚟咩？哈哈哈！冇嘢o架，傳媒做嘢一定係咁，你都想搵最吸引人嘅嘢去寫，唔通個標題寫『黃婉曼讀書好叻好靚女』？好多人傳短訊叫我唔好唔開心，其實我冇喎！都冇傷害到我啲乜嘢！」

去年二月，黃婉曼成為天氣女郎，為沉悶的節目添上一點姿采。她的辭職，造就了多位後起之秀，如張文采、李偉詩，而後者亦深得小弟歡心。

最緊要靚

「讀書好叻好靚女」的黃婉曼，自然不乏裙下之臣，而和現任男友已拍拖兩年。

「相處OK，性格係夾。以前有諗過大學畢業就結婚，潮州好傳統觀念，覺得好細個就要結婚，後尾都冇喇，人生好多嘢唔係你想要咁就咁，我話我鍾意安定，原來我要不斷換不斷跑不斷適應。呢個世界啲嘢變得太快喇！」

當事人自稱大學期間沒有拍拖，但在中學時卻深得異性青睞。

「同一時間會有幾個人追，但係好奇怪，唔知人哋鍾意我啲咩，中學更加唔係靚嗰啲，但我唔容易鍾意人。「愛情嘅嘢，冇話認定咗就OK，你自己都要做得好。唔好不斷咁要求人哋，你係咪咁好先？你係咪識得洗衫煮飯、出得廳堂、靚靚咁，又好溫柔體貼先？」

不論跑新聞，還是當愛人，也該全力以赴，做到最好。對待戀人，不該是是但但，而要事事關心。

黃婉曼的男朋友是任職攝影師的曾志釗，為甚麼電視新聞記者或主播總會戀上攝影師？我是否該問問方健儀？

約我食飯

訪問完畢，黃婉曼約我食飯。

我答：「吓？」

「我都同跟我嗰啲狗仔隊食飯嘅！」

「吓——？」

約人食飯，她有一套哲學。

「我鍾意用啲錢同身邊朋友分享，請啲朋友食一餐好勁，食好貴，幾千蚊我唔介意，因為呢啲嘢培養緊人嘅感情。呢一刻經歷或者呢一刻感情，係重要過呢一刻你有十萬八萬。我成日覺得錢使晒，自然會有錢再嚟。我窮到乜工都冇，我做麥當勞都有錢啩？你一定過到活o架！你啲朋友都會畀碗飯你食啩？」

數年後，如果她成為金牌司儀，甚或金像影后，希望她也有胸襟和時間約我食飯。

我收拾行裝準備離開，她再三提醒。

「喂食飯喎，真係o架！叫埋你女朋友吖！第時結婚請埋我喎！」

「都好吖，請你做司儀！」

「唔係呀，我嚟食嘢咋！」

冇你咁好氣。但我開始認真地想和她食餐飯，或許因為我也當過狗仔隊。