日本天后濱崎步上週旋風式襲港，展開四日三夜的奢華購物團。今次抵港，步姐男友一直陪住，男友陪度假，步姐此行買得特別爽手，四日行程，單是購物，已豪花近二百萬港元。
卅幾度戴冷帽
為免男友曝光，步姐相當小心，每次都與男友前後腳抵達目的地，香港三十幾度高溫下，步姐男友竟日日戴住冷帽，打扮鬼祟。
「步姐嚟香港係有少少嘢做，不過主要目的都係玩同shopping。以前佢嚟親香港，夜晚都會出去蒲，但今次同男友嚟，佢夜晚好早就返酒店休息。」
步姐連日來瘋狂shopping，加上買嘢唔使睇價錢，每間名店都瘋狂掃貨幾十萬才捨得離開，戰利品最後要動用貨車運至機場！
「步姐係購物狂，今次淨係買嘢，都使咗差唔多二百萬港紙，但佢買衫、買鞋有時連試都唔試就買，有好多買咗返去都唔啱著唔到。相反，佢男友就唔係好鍾意shopping，純粹陪佢。」
上週一（六月廿八日），步姐一落機就直踩去尖沙咀Joyce，豪花五十多萬入貨，其間因為落雨，步姐公主病發，要保鏢抱她落車。
接連血拼了多間名店，豪使過百萬後，步姐先肯收手，傍晚偕男友相約林建岳到中環中國會歎水魚餐。
為日本隊打氣
翌日傍晚六時，步姐再度出擊。第一站是金鐘太古廣場，逗留不足一小時，埋單已經要三十萬，燒銀紙速度驚人。校啱時間，步姐的男友已先行抵達金鐘港麗酒店等女友晚飯，二人撐枱腳一小時，步姐便陪男友返回下榻的酒店睇世界盃，為祖國日本隊打氣。
行程第三日，步姐近傍晚七時才露面，先到尖沙咀茶莊掃茶葉，之後再與男友及工作人員到深灣遊艇會登船出海，睇住維港夜景醫肚。經過三日吃喝玩樂後，步姐於週四（七月一日）下午打道返日本，滿載而歸！
連日來都被追訪，有俊男伴遊的步姐心情依然超靚。
日元咁高，嚟香港買嘢抵好多嘅呢！（設計對白）
男友在三十度高溫下日日帶住冷帽，一見記者拍照，更火速拉低冷帽遮面，相當鬼祟。
28/6
抵港第一日遇正大雨，步姐馬上公主病發，為怕整濕長裙，要保鏢抱她落車，十足十太后駕到。
29/6
上週二（二十九日），步姐離開酒店到金鐘連卡佛掃鞋，更不時拿起心頭好徵詢同行人員意見。
30/6
身穿豹紋露肩裝的步姐，到尖沙咀金馬倫道的英記茶莊試飲中國茶，最後掃了大量茶葉離開。
1/ 7
步姐在港大玩親民，每次步出酒店都主動跟在場fans簽名合照，其間更不經意露出事業線。
步姐離港當日，過百fans蜂擁而至，要出動保安及助手築起人肉圍牆，護送步姐入閘。
一連幾日瘋狂掃貨，收穫豐富的步姐要租用貨車搬運戰利品到機場。 
留言列表
