已經三年無開騷，將於今年十二月舉行個人演唱會的劉德華，自從去年八月爆出瞞婚事件，大話冚大話令形象大跌watt後，今非昔比，為確保演唱會一開即爆，劉華近日便透過歌迷會，搵歌迷做問卷調查，測試訂飛反應，才決定演唱會場數。大話天王，已經再輸唔起！
信心動搖
瞞婚講大話，劉德華無懈可擊的健康形象瓦解，令他一度變得龜縮，面對傳媒更收起天王風騷架勢，寧願少說話，怕愈講愈錯。
事隔大半年，變得低調的劉華亦蠢蠢欲動，計劃今年年底舉行跨年演唱會，並已訂了廿多日檔期，希望開到二十場；不過，天王自信，依然處於低水。
「嗰次佢外父過身，為守住已婚秘密，劉華無送外父最後一程，搞到俾外界鬧爆，係佢前所未有嘅一大打擊，咪睇佢出嚟好似無嘢咁，其實個心不知幾怯，不過，佢連搵人傾訴都唔敢，對住公司員工，絕口不提，只係偶然有機會同最熟嘅朋友講吓。」知情者說。
內部統計
今年大部分時間留在國內拍戲的劉華，現正在北京拍攝新片《我知女人心》，有指女主角胡靜，是其妻朱麗倩的親戚。雖然人不在港，但劉華仍秘密為演唱會做嘢。
「其實華仔每個月都會同歌迷會幹事開會，佢決定開演唱會之後，就搵歌迷會幫手，試吓反應。以前開騷，佢從來冇擔心啲飛會賣唔晒，只會擔心啲飛分唔勻，但而家佢已經再無咁自信，所以咪搵歌迷做內部問卷調查，預先衡量吓內部訂飛情況，測試行情，再決定首輪賣飛會公布開幾多場。」
因為唔衰得，劉華仍未扑槌，究竟先開十場還是十五場。「以前佢就算一開十五場，一日內就爆晒，不過，佢始終係劉天王，如果啲飛去得慢，對成個聲勢都有影響，所以預先做問卷調查，都係穩陣計啫！」知情者說。
大話天王
去年8月，朱麗倩父親朱金城去世，劉德華親身飛往大馬奔喪，但一直龜縮的他，惹來各方抨擊，形象大插水，由萬人迷變成「大話天王」。
8月18日：劉德華外父在大馬病逝，他與朱麗倩鬼祟飛往大馬奔喪。
8月24日：劉德華未有現身喪禮，更故布疑陣，搵保安員穿著他的波鞋魚目混珠，此舉惹來各方抨擊。
8月25日：為平息風波，劉德華在機場與朱麗倩上演一幕「世紀拖手」，但仍然否認已婚。
8月29日：被踢爆08年6月23日，在美國賭城與朱麗倩結婚，講嘢無句真，劉華被封為「大話天王」。
劉華在北京趕拍《我知女人心》，面對內地傳媒探班，華仔表現友善。
問卷曝光
歌迷會進行問卷調查，要歌迷清楚填上買多少張飛，但強調只作參考，不會作實。
劉華與朱麗倩上映「世紀拖手」一幕，令一早守候機場的記者更加混亂，嚇得老婆不斷捉着華仔的手臂。（《忽然1周》圖片）
今年大部分時間在國內拍戲，之前便與霆鋒拍《新少林寺》，二人更傳不和。（《蘋果日報》圖片）
《未來警察》票房滑鐵盧，只收三百多萬。
○八年一月，朱麗倩低調睇劉華尾場演唱會，當時朱仍未正式做劉太。
為避過傳媒追訪，外父出殯當日，劉華無影，反而在「頭七」被記者拍得低調到墳場拜祭，行為閃縮。
幾乎每三年開一次演唱會的劉德華，今年開騷計劃沒變，但經過「大話天王」一役，劉華變得更加緊張，希望能重建天王地位。
留言列表
