盡享齊人之福的譚詠麟，幾乎隔年便開演唱會，而每次大婆莎莉例必臨場打點，更會在後台房間設置一個神壇，為阿倫誦經祈福。為表尊重，多年來阿倫都嚴禁二奶Wendy踏足後台；不過，隨住金笸籮譚曉風日漸長大，今年已屆十四歲，信佛的莎莉，明知阿倫心意，今次開騷，已經御准二奶與愛兒到後台探班。阿倫亦親口承認，兒子有到場睇騷，閉門一家親。
開壇唸經
上週五（七月十六日），譚詠麟一連八場紅館演唱會正式展開，向來有甩歌詞習慣的他，當晚無唱錯歌詞，只在encore部分唱《半夢半醒》時，衰咗甩嘴，他亦自嘲：「我都奇怪，今晚竟然無乜甩（歌詞），終於呢首歌唱出水準（指甩嘴）。」阿倫情緒高漲，唱到十一點五十分才完騷，要俾紅館罰錢。
原來當晚阿倫的寶貝仔譚曉風是座上客，據知二奶Wendy朱詠婷亦有到後台探班，加埋大婆莎莉為阿倫唸經祈福，一家人力撐，難怪演出有水準。
「咁多年嚟，每次開演唱會，莎莉都親自幫阿倫打點，佢仲會喺後台間房set個壇，為阿倫唸經祈福，保佑演出一切順利。」知情者說。
十八年前，阿倫結識二奶Wendy，莎莉一直鬱鬱不歡，阿倫亦深感有負對方，因此將財政大權全交由莎莉揸fit，以示對大婆的重視。現時莎莉手上擁有多個豪宅物業，亦與阿倫聯名持有兩間公司。
「以前阿倫開騷，Wendy都會陪個仔混喺觀眾堆睇騷，阿倫亦因為擔心莎莉唔開心，所以一直唔俾Wendy去後台探班。」
莎莉姨甥得寵
不過，隨住兒子譚曉風長大，Wendy地位亦與日俱增，○六年譚伯過身，阿倫終於公開二奶及兒子名分，同年他更由大婆的寓所搬往跑馬地比華利山，與二奶及兒子同住。
「阿倫見個仔都咁大，唔想佢哋再偷偷摸摸，經莎莉同意，Wendy終於可以去後台探班，依家莎莉唔再執着，阿倫就最開心，話晒佢都想一家人相處融洽。不過佢始終好尊重莎莉，所以平時記者提起個仔，佢都係一句起兩句止，唔想講多咗，避免影響到莎莉！」知情者說。
今次一連八場騷，阿倫除了指定俾組合Mr.做嘉賓，捧到出晒面的仲有由細到大，阿倫都錫到燶的莎莉姨甥女陳嘉慧，今次演唱會歌衫，均由姨甥女設計，「係咪好得先！」阿倫大讚。
「嘉慧學設計，近年仲自己搞咗間設計公司，阿倫好錫佢，以前啲衫係莎莉負責，依家就俾嘉慧做，佢經常同啲圈中人sell嘉慧點好點好！」知情者說。
身家厚
雖然生咗金笸籮譚曉風母憑子貴，但二奶Wendy多年來手上只持有兩個物業，身家始終不及阿倫大婆楊潔薇（莎莉），楊潔薇手執阿倫財政大權，除與阿倫聯名開設公司，手上亦持有過億物業。
終於等到呢日啦！Hee！（設計對白）
近年潛心向佛的莎莉，每次阿倫開show，都戴口罩潛入後台打點，並幫阿倫唸經祈福，低調避開傳媒耳目。
大婆釋懷，阿倫亦開心御准二奶入後台探班。
個唱overrun，唱到十一點五十分的阿倫，仍表現得意猶未盡。
以懷舊金曲作主題，演唱會沒有大量dancers伴舞，但唱得興起，阿倫亦不停跳跳扎。
近兩年開騷，阿倫的歌衫均由莎莉的姨甥女嘉慧（右）一手包辦。
阿倫力捧Mr.，即使後台見記者，亦叫埋一齊做訪問。
首場演唱會沒有太多嘉賓到場，草蜢是其中座上客。
唱唱吓，阿倫忽然雙手托頭，唔通唔記得下一句唱乜？
06年譚伯過身，阿倫正式給二奶及兒子名分。
留言列表
