六月中，生完細仔Quintus未修晒身的張栢芝，私自帶大仔Lucas到上海出席星爺的《長江7號愛地球》活動，順道公告天下，兩母子為卡通片合唱主題曲。有傳此舉惹來事前毫不知情的奶奶狄波拉（拉姑）極度不滿，外間更一度封她做「惡奶奶」，搞到她接受商台查小欣訪問澄清，不過內容句句有骨落地。
七月九日，霆鋒出手，約埋拉姑同栢芝在四季稻菊食日本菜擺和頭酒，但飯後兩婆媳前後腳走，即使兩人誓神劈願話相處融洽，似乎都唔多可信！
一早唔妥
○六年，霆鋒無通知拉姑，失驚無神同栢芝在菲律賓小島結婚，令拉姑極之無面，兩婆媳的芥蒂由此而生，但隨着栢芝生完一個又一個，睇在孫仔份上，婆媳關係一度有所改善。
上月栢芝又私自帶Lucas到上海出席電影節及為星爺的《長江7號》卡通片做宣傳，事前同樣毫不知情的拉姑被問及對Lucas入行的睇法時，暗示說：「當年我移民加拿大，就係唔想霆鋒入行，嗰個（Lucas）唔係我個仔，我唔可以話事，我唔係佢阿媽，我係佢阿嫲！」
拉姑發火，栢芝即時做嘢，在傳媒面前賣口乖，澄清拉姑並非惡家婆，企圖為事件降溫。「我真的要替婆婆（拉姑）平反，我是最幸運也最幸福的兒媳，她一直都很尊重我同霆鋒，不會干涉任何事。」
擺和頭酒
早兩個禮拜五（七月九日），霆鋒約埋栢芝同拉姑晚飯，還搵埋婷婷同男友安志杰、栢文以及好友伍允龍做陪客，希望婆媳二人冰釋前嫌。飯後栢芝拖住Lucas先行離開，霆鋒護送妻兒搭電梯返四季apartment，之後再同婷婷折返餐廳，唔夠五分鐘，霆鋒傍實面燶燶的拉姑離開，其間，拉姑當住友人面前「哦」霆鋒，霆鋒不停點頭無駁嘴，阿媽「哦」仔，足足有十分鐘。
句句有骨
對於被指是「惡家婆」，拉姑接受查小欣訪問時雖力撐婆媳關係良好，但言談間，句句有骨。
「Lucas、Quintus出世，人哋問我攞一張相，我話：『對唔住，個孫嚟嘅，唔係個仔，你問我攞謝霆鋒相，我可以俾你，你問我攞謝振軒嘅相，我唔俾得你，因為要問過佢阿媽，咁我就為咗佢兩個（孫），學用電話影相，咁樣就有得睇，無得攞！』」
栢芝讓Lucas拍廣告，拉姑坦言只有知會未有徵詢。「無o架喎，唔使o架，佢（栢芝）有晒專業人士喺身邊，但係佢好好喎，佢一定會知會你一聲，件事搞掂晒，就會話你聽！「我哋講嘢無用o架，總之係配合，佢哋諗唔到，你千祈唔好提議，唔好出聲，因為新派，佢有佢哋，我連我個仔、新抱嘅屋企都唔去o架！你睇唔過眼就會出聲，你睇唔到就唔會出聲！」
唔使問，我話晒事o架！（設計對白）
霆鋒、栢芝暫時放低囝囝，拍拖到金鐘shopping，兩人主攻兒童玩具。
上月中，生完無耐的栢芝私自帶Lucas到上海出席星爺活動，惹來奶奶拉姑不滿。
講住電話的栢文陪栢芝先行離開，Lucas則扭媽咪抱。
霆鋒等人護送栢芝、Lucas去搭[車立]，其間霆鋒揭起T恤，露出當年同王菲共同擁有的情侶紋身。
為加建Quintus BB房，栢芝搬到四季暫住，夾都無咁啱，陳冠希亦回港入住上址。
送完妻兒，霆鋒返頭送媽咪，冇厘表情嘅拉姑，企响餐廳門口「哦」足霆鋒十分鐘。
留言列表
