明星靚相大分享☆

Fans做咗個「靚仔」燈牌支持偶像，林峯好得戚，不過當見到高大「假林峯」（箭嘴）行埋嚟同佢合照，就即刻燶面扁嘴，小器！

由「亞太男」林峯領銜主演嘅新戲《翡翠明珠》，上畫十一日，截至八月十五日，香港票房唔夠三百萬。
上個禮拜四（八月十二日），林峯同容Joey去廣州做宣傳，話晒華南地區自己友多，林峯決定握手合照落力為人民服務，希望打親民牌，谷起國內票房。

 
現場林峯fans比容Joey多一大截，人多勢眾，林峯笑到下巴兜晒，不過當佢見到大會安排嘅「假林峯」，上台行嚟行去做歡樂先生派禮物，正版當場藐晒嘴，唔多高興。
其實「假林峯」就算去整鼻隆下巴，點都唔及正版咁靚仔，但勝在生得高大，矮一截嘅林峯，合照期間直頭攞背脊「得」住對方，免得眼冤。
之後林峯再轉場去另一間戲院謝票，見到哨牙踢拖嘅戲院經理，個樣有九成似《美女廚房》嘅周中師傅，林峯當堂笑到甩下巴，仲捉住Joey咬耳仔，陰陰笑講人是非。高大又嫌，哨牙又笑，咁多不滿，林峯小心變成近排熱爆facebook嘅「陰功男」喎！

得戚笑

宣傳工作重任落响林峯、Joey身上，上廣州只係做陪襯嘅高鈞賢，全程心不在焉眼都撐唔大，雙眼皮仲離奇浮腫泛紅，點解呢呵？

見到哨牙經理同大廚周中師傅似到似失散兄弟，林峯即刻捉住Joey陰笑吱吱噚。

打完手印，有關方面叫Joey同林峯著住對鞋打腳印，咁騎呢，兩個扮聽唔到即閃。