HTC Aria 幫陳法拉譯劇本 @ 明星靚相大分享☆

陳法拉呢排紅到爆，《蒲松齡》播完冇耐，嚟緊仲有《公主嫁到》同《巾幗2》接住上。但訪問先知，原來呢位竹升妹其實中文麻麻，讀劇本時遇到艱澀詞語都會頭痕。不過佢話自從用咗新出嘅HTC Aria手機後，透過內置嘅《Dr.Eye》翻譯軟件，就可中英互譯兼學埋發音，以後唔使靠人都能熟讀劇本啦！

講軟件，Android Market一定唔及App Store咁多，但HTC可愛之處在於會自家開發及外購軟件，以這部HTC Aria為例，內置Friend Stream及Footprint等工具不在講，還免費提供翻譯軟件，咁賣大包法，無怪乎在最新手機市佔率調查中，HTC可打進全球五強之列。

除注音、拼音、筆劃及倉頡外，還提供中英文手寫輸入法，啱晒法拉呢啲竹升妹。

支援英漢雙語翻譯，唔識讀仲可按右上角「喇叭」Icon聽真人發聲。

預載了大量Google服務，當中包括「Goggles」，手機可透過影像識別技術，自動搵出拍攝景物的相關資料。

資深翻譯軟件

手機查字典方法有很多，無論Yahoo!或Google都有網上翻譯服務，只不過以上方法都要線上查詢，翻譯效率不但受制於網絡速度，仲分分鐘要支付高昂的數據費。今次這部HTC Aria最大賣點就係跟老牌翻譯軟件《Dr.Eye》合作，免費提供英漢、漢英雙向翻譯服務，所有字庫已預先儲存在記憶卡內，就算唔上網都可照查生字。除文字解釋外，佢還提供真人發音，遇到難明字仲可以用生字簿記低，方便日後問人，功能媲美唔少翻譯機。

經數碼通X-Power，就可上mytv睇番尋晚嗰集《女人最痛》，而且畫面清晰流暢，出街都可照煲電視劇。

對應人臉對焦，對焦框會跟隨人臉移動，就算Model四圍郁都影得清楚。

抄足Legend轉用光學感應器，靈敏度比以前好，但較容易誤觸。

影相直掟社交網

講番機身設計，Aria可謂HD mini嘅倒模，同樣採用3.2吋屏幕、拋光黑色外殼及鮮黃色內籠，若不是芒底多了一個光學感應器，驟眼看還以為是舊機翻新。而且跟mini一樣，Aria同樣是為女士而設，因此厚度僅11.7mm，而重量亦只得115g，以智能手機來說絕對「身輕如燕」。至於鏡頭方面，500萬像素兼冇補光燈，規格唔算高，但就對應人臉及篤芒對焦，加埋影完相可直接掟上Facebook、Flicker同Twitter，至啱女生自拍後極速分享。

機背的四顆螺絲並非裝飾品，其實係畀用戶篤住嚟開蓋，設計獨特。

拍埋Desire（右）一比，可見Aria明顯細一截，更適合女生使用。

採用拋光全黑機背，而且鏡頭模組及四角螺絲都鍍成銀色，感覺專業。

喪煲Flash短片

系統方面，Aria仲未升呢上Android 2.2，因此睇Flash還要依賴Flash Lite，搞到好多網絡短片都睇唔到。然而，若用戶透過獨家網絡商數碼通出機，就可利用X-Power把短片轉換成手機格式；實測所見，唔單止睇到晒ontv嘅新聞短片，還可以駁上mytv重溫TVB劇集，流暢又唔窒，真係去到邊都可以喪煲法拉新劇。另外，一如HTC其他機種，Aria亦內置大量Widget小工具，未計必備嘅Friend Stream同Footprint，其他Widget亦多達30款，就算主頁有成7版都放唔晒！