明星靚相大分享☆

整cheap晒！（設計對白）

五年冇開騷，專心做李師奶嘅王菲，復出巡迴演唱會首站，十月將會响北京舉行。
收得650萬人民幣一場歌酬，王菲演唱會票價當然破晒紀錄，最平要300人仔，最貴VIP飛高見2,500，話到明只唱九十分鐘，無加時安歌，明買明賣願者上鈎。
天后重出江湖，外界預期會有恐慌性撲飛熱潮出現，但聽聞歌迷反應唔算踴躍，八珍去淘寶網站睇過，黃牛黨見勢色唔對路，大多數人都唔敢加價，部分更出現蝕讓潮，例如1,000賣900、1,500賣1,100，務求輸少當贏。
炒飛炒唔起，反而一位聲稱忠實菲迷嘅網上賣家，設計多款王菲演唱會T恤放上淘寶網賣，反應相當熱烈，由最平39蚊一件短袖T恤，到88蚊一件厚身衞衣任君選擇，勝在夠平夠時款夠錢俾。

王菲開騷，食腦商人乘機搵錢，可以度身訂做王菲上個月出席演唱會記者會所著嘅紅黑古董裙，乜size都做到，價錢只需280蚊人仔，人人都可以扮王菲！（《蘋果日報》圖片）

無錢買飛睇騷，可以幫襯買演唱會T恤，由39蚊到88蚊人仔不等，其中一個設計，更印有王菲個唱最新造型照。

淘寶網黃牛黨減價速銷王菲北京站門票，仲有「先看後付款」服務，保證唔會買錯假飛！

有人保證買到上海站頭三行VIP 2,500人仔門票，於是開天索價賣貴一倍要5,000蚊，可惜反應冷淡。