千嬅應無綫要求穿上日本女性結婚和服，單是紅色外袍便重達廿多磅，內裡還有幾層打底，加埋42嵖高溫，絕不輕鬆。
已經決定12月20日在香港補擺喜酒的丁太楊千嬅，除了忙於籌備10月紅館個唱，早前更拉隊到日本為無綫拍攝音樂特輯，無綫更超級揼本，派出廿多人攝製隊，咁重手，原因不外是想出身自華星新秀的千嬅，答應將12月婚宴場內實況，獨家俾娘家無綫直播。
限定歸期
雖然做咗丁太，但楊千嬅事業行先，為了應付十月的紅館演唱會，做gym兩個多月已瘦超過十磅，唔理為生仔而調理身體的大計，keep住按營養餐單進行節食。
「佢好忍得口，就算約朋友食飯，千嬅都只係齋睇無偷食，佢見自己fit咗都好滿意！」千嬅身邊人說。
做唔停，上月底千嬅到日本一星期，替無綫拍攝音樂特輯，走遍新宿、涉谷、六本木、箱根、輕井澤、富士山中湖多處地方取景，由於行程緊迫，大隊book了兩架大型crew車，每天單是車程便要花六、七個小時。
「喺日本一星期，每日拍十幾粒鐘，搭車都搭咗幾粒鐘，加上七月底日本啱啱係大暑，日日都接近四十度高溫，但千嬅仲著住一層又一層嘅日本和服婚紗拍外景，又熱又焗，所以佢要不停飲水降溫，又熱又曬，食嘢胃口都無晒！」一位工作人員說。
今次度期到日本拍特輯，千嬅事先聲明要趕在七月三十一日前返港，因為當天是老公丁子高生日，千嬅對跟老公慶祝婚後第一個生日，十分重視。丁太趕返港陪過生日，丁生生日當天於微博晒幸福：「最重要當然是累透了，剛從外地到步的老婆大人"Love U All"。」
娘家關係好
「新秀」出身的楊千嬅入行多年一直跟無綫關係良好，95年，楊千嬅參加當時仍是由無綫主辦的「新秀」奪得季軍。入行不久，便接下兩套劇集包括《外父唔怕做》及《美味情緣》。02年，千嬅更首次於無綫《勁歌頒獎禮》中奪得最受歡迎女歌星獎，其後於08、09年合共三次奪得此獎。
拋磚引玉
無綫近年主張開源節流，出外製作大型音樂特輯買少見少，千嬅獲特別看待，不外是拋磚引玉。
「千嬅一向同無綫關係密切，之前無綫飛起謝安琪，換千嬅同林峯拍電影《抱抱俏佳人》，佢都即刻度期，十分配合，而千嬅十月嘅演唱會，無綫亦係主辦單位之一！」知情者說。
楊千嬅十二月擺喜酒，無綫亦開聲要求爭取進入婚宴場內，獨家拍攝現場情況。
「千嬅點都會俾面無綫嘅！佢靠新秀大賽入行，覺得冇無綫佢都冇今日。」
要全面為演唱會備戰，加上有廣告傾洽中，有關婚宴籌劃，千嬅全權交給老公丁子高負責。
「婚宴由丁子高嘅IPS公關公司負責，公司搞慣大型function有經驗，加上丁生仲入埋股做老闆，公司員工都收到order，要將千嬅個婚宴當大project做！」
穿和服，最大特色是將腰帶綁到實一實 ，著唔慣，隨時抖唔到氣。
專人服侍穿著和服，但千嬅自言她的嫁衣首選是潮州裙褂。
拍攝爭分奪秒，千嬅一落機，便趕到涉谷一間髮型屋駁髮 ，搞到凌晨三點才完成長髮新形象。
千嬅細心揀選假長髮， 又是她最愛的紫色。
拍足七日，千嬅每日只睡三小時，加上熱到冇胃口食嘢，日本之旅，全無增磅。
03年1月，千嬅首度奪得無綫最受歡迎女歌星獎。
千嬅夫婦婚後首個專訪，亦交給娘家無綫。
因為行程緊逼，幾乎日日便當，呢餐咁豐富，其實是劇情需要。
攝影隊合共22人，每次拍攝都十分大陣仗。
四十幾度高溫曝曬，千嬅膊頭亦曬到甩晒皮。
千嬅請好友林夕到日本任特輯嘉賓，林夕更大爆千嬅秘密。
留言列表
