明星靚相大分享☆

為咗宣傳新戲《猛鬼愛情故事》，上個禮拜六（十月十五日）周秀娜、浸大咪神Carol（楊梓瑤）以及羅仲謙等，拉隊去鴨脷洲遊船河。出海著短裙高踭鞋，娜姐撳得住條裙唔俾風吹起，又顧唔到頭髮吹到亂晒龍，不過無論點狼狽，都唔及俾記者圍攻佢感情問題。

有傳因為Theresa傅穎介入，搞到同男友Avis感情亮紅燈，一向口齒伶俐嘅娜姐，突然眼濕濕唔知點答，淨係識鬧同場嘅羅仲謙：「都係你，感情唔好拉埋我落水！」雖然冇指名道姓，但娜姐承認Avis冇同佢備案「打底」，自己係聽經理人講，先知出事，又話架車太細，坐多個人好逼，換言之，就係嬲男友上次車Theresa帶隻倉鼠睇醫生冇話佢知啦！感情出問題，娜姐冇晒心情，仲要俾同場嘅浸大咪神Carol搶晒鏡，對方應記者要求剝完又剝，著比堅尼漏奶影相，又同老闆王晶食埋同一碟麵包加橡皮糖，好得寵！嗱，呢啲咪叫內憂外患囉！

浸大咪神Carol好合作，剝衫冇扭擰，話剝就剝，嚇到原本坐佢隔籬嘅羅仲謙即刻彈起身，之後一齊合照，羅仲謙寧願黐實陳嘉桓，好驚咩！

話晒係E神，Carol著住大碼比堅尼都可以滿瀉，難怪深得晶哥歡心，次次開戲一定有佢份。 ####

最衰係你，打女人！（設計對白）我幫你報仇咋！（設計對白）

記者問娜姐，佢同男朋友感情出問題嘅疑似第三者係咪傅穎（圖），娜姐冇答，但走去打傅穎前男友羅仲謙，答案係邊個，大家心照！

呢日好太陽又大風，娜姐出海居然著短裙高踭鞋，頭髮亂晒條裙又吹起，都唔知顧得邊樣。