iPhone 4S 月底冧價 @ 明星靚相大分享☆

上星期五（十四號），iPhone 4S於全球七個國家開售，雖然話新機同iPhone 4簡直一個餅印，但由於是向教主Steve Jobs致敬之作，再加上中國、香港又未知幾時先有行貨，所以先達水貨商都認定是賺錢良機，派員到澳洲、加拿大等地大舉入貨，搶住運返香港飲頭啖湯。結果十四號晚，水貨iPhone 4S已現身先達，16GB無SIM lock版本的售價更一如所料炒過萬，不過想用「合理價」買新機，其實只要等到今個月尾，售價隨時跌到七千。

iPhone 4S開賣當晚，先達全場新機，都是水貨商特別派人由澳洲搭飛機運來，當中G-World Mobile帶回的十部16GB版iPhone 4S，機未到已全被認購，負責人劉志剛表示買家全部均為大陸水貨商，「大陸對iPhone 4S需求大，炒價自然高，首批機隨時炒到萬二蚊人民幣一部都有人買。」當晚真正返到香港的新機不多，雖然翌日大貨抵港，但當中一半亦即時轉往內地，親身到澳洲入貨的i世代電訊店務經理阿悠就話，自己亦帶了七十幾部16GB版返港，「星期六朝早八點幾落機，已即時在機場以每部一萬港幣，將三十多部iPhone 4S賣給預先約好的大陸水貨商，對方都趕住運返大陸，相信每部至少可以賺兩千幾蚊港幣。」

其實不只先達水貨商識賺錢，醒目的香港人累積幾次炒賣產品的經驗，亦有樣學樣在外地搵親友排隊買機，更陸續於本週一寄到香港，令iPhone 4S貨源大增，以至炒價插水，16GB版本的炒價由上星期六最高的HK$13,800，急跌至星期一的HK$8,500。雖然現時首輪發售的國家例如澳洲、英國等地都已賣斷市，iPhone 4S有機會短暫再被炒高，但等到本月廿八日第二輪合共廿二個國家開售iPhone 4S，貨源肯定極多，隨時有機會下試七千元，忍手多兩個禮拜，就可以慳番千零蚊。

舊機爭回收
iPhone 4S機價狂插水，iPhone 4回收價不跌反升，先達全部鋪頭一律貼出高價收iPhone 4標語，而且16GB全新機無論黑白都收HK$5,100（原廠定價為HK$4,688）。回收價高，根據先達消息人士話同國內需求有關，「班大陸客見新機同舊機外形一模一樣，都寧願買番舊款iPhone 4。不過，網上 Store早已停售，得番香港專門店有得賣，先達好多鋪頭都缺貨，唯有高價收機再賣俾大陸客。」他說所以不少炒家上星期都去中環ifc通宵排隊買機，當中更有不少南亞裔人士，「一部機都賺到四、五百蚊，每人限購五部，即是排一晚隊可以賺二千零蚊，所以先吸引到他們去搶購。」

iPhone 4S行情
第一輪開售的七個國家中，由於美國及日本版iPhone 4S都有SIM lock，必須配合當地網絡商的SIM卡先用得，所以香港無人返貨。先達有售的，全部由加拿大、英國、德國、法國及澳洲運返的無鎖版。 ####

i世代電訊店務經理阿悠十五號由澳洲早機返港，已經將手上一半iPhone 4S賣俾大陸水貨客。