兩年前與衞詩同遊日本，因藏毒被當地警方拘留的關楚耀（Kelvin），形象一度急插水，跟患難情人衞詩亦宣布玩完。禍不單行的Kelvin，花了兩年時間洗底，歌唱事業重新出發的同時，與拍拖一年的圈外女友Megan感情亦穩定，為儲定老婆本，Kelvin在女友的協助下，稍後會到台灣發展皮革生意，撈多一瓣為將來打算。
拒扮純情
○九年，Kelvin與當時的女友衞詩（Jill）拍拖遊日本因藏毒被捕，落難鴛鴦賠上事業與戀情，Jill被A Music放棄，無緣重返幕前，近年信主四處傳福音，幸在教會搵到現任男友Tim，未致一無所有；至於Kelvin，得環球唱片力撐，有機會去亞視拍劇繼續出唱片，現積極留鬚練大隻轉換新形象，「公司同Kelvin有共識，唔使佢再扮乖仔，做返自己好過，唔想太造作。」唱片公司人員說。有公司撐，Kelvin落足心機籌備十一月推出的新唱片，據知，主打歌《別再躲》，由契爺譚詠麟落order點名要唱，「阿倫好錫Kelvin仔，首歌本來係佢自己唱，阿倫聽完demo之後就話要留俾Kelvin仔唱，仲親自搵林敏聰填詞，Kelvin最初覺得首歌唔啱feel，但睇埋歌詞後，就知道契爺為咗鼓勵佢，所以佢好俾心機唱。」事業有起色，感情亦有着落，據了解，Kelvin與圈外女友Megan拍拖一年，感情相當穩定，「佢哋响common friend度認識，拍咗成年拖仲好糖黐豆，Megan令男友變得定性，連Kelvin仔嘅父母都好鍾意佢，當正係未來新抱。」知情者說。
女友幫手
據知，在紐西蘭讀書的Megan是位高材生，大學畢業後回港，任職設計師，Kelvin已視她為結婚的對象：「Megan讀書叻，見識多，而家Kelvin仔準備喺台灣搞皮革生意，多得Megan幫手，落手落腳幫佢搞設計，十足十夫唱婦隨。陳冠希、羅志祥個個都有自己品牌，Kelvin都想似佢哋咁殺一條血路，開頭諗住寄賣先，之後就會開鋪，一步一步嚟。」Kelvin即將會在台灣推出自家設計的皮革品牌「Made」，產品會以飾物為主，希望安排多一條出路，儲定老婆本。
冧爆行超市
早前（十月四日）Kelvin在丁子高的邀請下出席尖沙咀商場活動，完騷後便登上保母車到中環，接載剛下班的Megan，然後再到金鐘太古廣場行超級市場。穿上吊帶黑色長裙的Megan，樣子清秀，與Kelvin手拖手購物，其間聽到男友講笑話，Megan即笑不攏嘴，表現恩愛，儼如一對新婚小夫妻。記者致電Kelvin，問他有關女友的事，他大方晒幸福：「係呀，我哋好鍾意行超市買餸返屋企煮飯仔，佢煮嘢好叻㗎！近排佢成日話我啲鬚㓤親佢，但我要改形象嘛，我諗緊寫首歌送俾佢，不過未搞好，要等吓。」 ####
在超市買餸，Kelvin邊行邊氹女友，令Megan開心不已！
Megan知道Kelvin愛飲啤酒，所以細心地為男友揀啤酒。
Kelvin成個住家男人一樣，陪女友一齊揀鑊。
買完餸，兩人恩愛地返屋企煮飯仔，甜蜜又溫馨。
契爺譚詠麟對Kelvin疼愛有加，就算他犯錯，也會在旁扶持他走回事業的軌道上。
09年與衞詩在日本因藏毒被捕後，二人的感情告吹，這兩年來都沒有再見面。
Kelvin出道時得到多個電台的新人獎，前途曾經一片光明。可惜後來因藏毒，令他事業這兩年原地踏步。
在活方廣場的活動上，Kelvin遇到不少朋友，但因要趕住接女友放工，寒暄幾句便急急離開。
Kelvin以兩年時間洗底，做探訪拍亞視電視劇集，重新建立形象，出席活動有女歌迷要求合照，表現親民。
留言列表
