際遇這回事，沒法說得通，也沒法控制得來，尤其放諸於娛樂圈，你可以忽然一夜成名，也可以一覺醒來成為全港的過街老鼠。

這一點，蕭正楠感受至深。

○二年七月甫出道，便挾着「翻版鄭伊健」之名成為「新人王」，○三年橫掃了當年樂壇所有新人大獎後，卻突如其來由天堂跌進地獄，遭到觀眾、樂迷厭惡，最後還要避走內地，轉陣發展，○八年回歸，改為在無綫拍劇從頭開始。

真的是因為一句得獎時所說的「邪不能勝正」，讓他有這樣的結果嗎？其實，對於今天的蕭正楠來說，都沒所謂了，反正一切都事過境遷，反正那幾年「跌進地獄」的日子，他已有所得着，至少學懂了用甚麼心態來面對自己的工作。

「依家公司畀乜嘢我做，我都會做，乜都去試吓，叫我介紹靚屋，主持《更上一層樓》，我唔識呢啲嘢，講一句對白都有好多專業用詞，NG咗廿次，但我都去試，如果唔係，原來我有一啲字咬得唔正；台慶跳阿拉丁？好呀！我都唔識o架，但可能學咗之後，將來又會有用呢！以前初出道，可能畀人沖昏頭腦沖得太勁，覺得一切都係應該！依家我會好明白，唔係所有嘢都係應該！」

說到底，能夠令自己在不同際遇中過得舒服一些，關鍵只在於三個易明難做的字：平常心。

折翼

蕭正楠讀書時期開始當兼職模特兒，○二年，他因為參加「太陽計劃之優質樂壇接班人歌唱比賽」而簽約大國文化唱片公司，正式出道。他不諱言，那個時候，的確可用「平步青雲」來形容，可惜，這段日子只維持了六個月。

我○二年六、七月出道之後，一切都好豐收，啲人叫我「新人王」，得到啲嘢都好正面。我得過最大嘅掌聲，係喺紅館攞新人獎嘅時候，嘩！全個紅館個個都嘩然為你歡呼，場面好震撼！

我嗰陣同一本周刊做過一個專訪，個記者畀咗對天使翼我影相，然後寫：「希望佢唔會折翼啦！」結果，○三年啲頒獎禮後，我嘅人氣就開始急轉直下，哈哈哈哈！（大笑）

做呢行，唔同其他工，唔順嘅時候，你做乜都係衰，愈落力啲人反而愈抗拒你。

初出道時的經理人李進，於他事業低潮時決定安排他到內地另謀發展。

嗰陣我幫人做演唱會嘉賓，同樣係紅館，但我一上台，得到嘅係全場嘅噓聲，個contrast太大啦！好難受、好難受！百般滋味在心頭，真係攞命o架！

我做過代言嘅廣告商呢，喺嗰陣我都聽過有客講：「唉，簽咗個二打六添！」個心乸到呢，好hurt！當時我聽到嘅說話，有咁難聽得咁難聽，一下子啲讚美聲音蕩然無存，冇人解釋得到畀我聽，究竟發生緊乜嘢事，嗰陣我真係好迷惘！

勇氣

○四年，就在蕭正楠人氣下滑的時候，他患上癌症的父親離世。「當時好似一下子乜嘢唔好嘅嘢都嚟晒咁，感覺都真係……」他忽然沉默下來想了想。「我諗我當時應該係有抑鬱症。」

我喺阿爸身上學到嘅，係勇氣！佢有cancer好多年，由鼻咽去到肝，然後又唔知去到邊，一路係咁去醫，但都冇喺我哋面前呻過半句，反而係一直畀你睇住佢點撐個病，佢真係好犀利！我有個咁嘅爸爸，我係好proud of！好OK！

○二年挾着「新人王」之稱出道，跟同期的麥浚龍曾傳過不和，都事過境遷了。

佢做監倉公務員，我哋一家人都係住政府宿舍，佢調去邊，我哋就搬到去邊，大欖、小欖、荔枝角收押所、大嶼山，連赤柱我都住過！哈哈哈！佢雖然賺嘅錢唔多，但乜嘢都會先為我同我妹着想，我哋鍾意食乜就帶我哋去食；想睇戲呀？就帶埋我表弟，四個人坐兩張櫈，當時嘅日子真係好開心！

正因為我阿爸咁錫我哋，所以喺我○三、○四年，事業最唔順利嘅時候，我真係唔想再答記者嘢，我答乜都會畀人寫衰——當阿爸阿媽日日都喺報紙度睇到個仔畀人鬧，佢哋會點諗呢？我冇辦法想像到我身邊嘅人可以點去承受呢啲嘢！

當時我睇住阿爸嘅病愈嚟愈嚴重，我自己又搞成咁，我鑽牛角尖鑽得好犀利，好驚見人，成日匿喺屋企，希望啲衰運快啲走。

○三年初頒獎禮後，蕭正楠人氣大跌，推出的專輯名字，似在透露他當時的心事。

避走

結果，唱片公司眼見他的受歡迎程度兩年來一直每況愈下，惟有安排他避走北京，到內地再謀求發展。

返內地發展，呢個係Franky（當時經理人李進）嘅決定。我當時唔明點解要踢我返內地，好似放逐我咁！但後來諗番起，其實Franky呢個動作，真係救咗我！至少我返去，香港啲傳媒唔會再有point寫我，咁我依家真係匿埋嘞，OK？二來，我要重新面對新環境，都可以話療傷。如果我嗰陣冇去北京，繼續留喺香港，我唔會有重新出發嘅機會，可能會好頹，頹頹吓搵到其他啱嘅機會就會離開呢個圈，或者搵到個啱嘅人結埋婚都唔定，會係另一種生活。

○四至○八年，我一直喺北京居住，總共返嚟香港唔夠一個月。夏天熱到爆炸，冬天又凍到落晒雪——不過我嗰陣每次落雪，我都會攞張櫈仔坐喺個窗邊睇，都係另一種感受。

至於工作，其實嗰幾年我都唔肯定自己會點，五五波，都有內地公司簽我出過唱片，但拍劇嘅工作就唔可以話係好，拍咗啲劇都冇播過，啲人根本一直唔知你搞緊乜，好似當咗你消失咗咁！

《法證III》陳茵媺露bra一幕成為全劇焦點，蕭正楠說：「拍嘅時候，廠啲冷氣太凍，大家只係想快啲完成，畀Aimee着番衫， 結果都差不多一take過搞掂！」

就係咁，喺嗰邊住到後期，我都忍唔住要為自己焦急，所以嗰陣同唱片公司滿咗約，我都冇再續，好彩我做歌手時認識咗何麗全，我哋間中都會互通電話問候吓，當佢知我滿咗約之後，就問我有冇興趣入TVB拍劇，咁我就返咗嚟。

領悟

經過那些「從天堂跌進地獄」的洗禮，再經過那些避走北京的日子，蕭正楠說，○八年回流香港入TVB拍劇時，他對工作的心態已經完全不同了。

我喺北京住嗰幾年，唔可以話冇得着。嗰邊有好多嚟自唔同地方嘅人去尋夢，我識咗好多呢啲人，佢哋啲日子過得好苦，好多時都唔夠錢用，可能打開個銀包，裏面只係得嗰幾十蚊，食埋個飯，都只係夠飲多兩支啤酒就要返屋企，但佢哋依然好努力、好enjoy，只要心裏面團火未熄，都一路去追，一有少少收穫，就會覺得踏出咗人生第一步，好正面！然後我就諗到自己，比起佢哋，我都唔係咁差啫，人哋都可以咁開心，點解我又唔得呢？

○三年，蕭正楠（右二）曾拍《戀愛自由式》，當時他只覺拍劇很辛苦。

返嚟TVB拍劇，我當以前啲嘢冇發生過，一切重新開始。最初我都冇乜機會o架，可以話係公司最少產量嘅一個演員，比起好多同事個個都話一部接一部，仲話排到之後半年期，我成日都冇嘢開，都驚驚地o架！不過好彩我之前喺內地出過唱片，我仲可以靠登台做我主要收入。

而更好彩嘅係，之後我遇到小青姐（監製梅小青），我真係要多謝佢！由《宮心計》、《公主嫁到》、《法證Ⅲ》，然後到《當旺爸爸》，佢都一直畀緊機會我，而且仲一部比一部多戲份！

最近，我仲終於嘗試到一次過要拍兩齣劇嘅滋味，好攰，但我又好享受呢種感覺！希望我之後都係咁平坦，我依家只係想一步一步咁去做，安安穩穩做好自己，始終我今年已經三十四歲，我唔使再爆上去，我已經過咗嗰種心態。

蕭正楠於《公主嫁到》內的大駙馬角色，播出時受到網友激讚。

陳氏密語

訪問期間，蕭正楠坐在我的旁邊，一直以六四或七三面口對着我，我看着看着他說話時的眼神表情，方發覺他的五官長得很標致，加上那些小爆牙，原來樣貌像極了早前因拍《法證Ⅲ》而傳他力追過的陳茵媺（Aimee）！「係o架！有人將我同Aimee個樣拼埋過一齊，都話我哋係孖生公仔！哈哈哈！」

雙陳戀還未承認時，蕭正楠曾被傳跟陳豪爭Aimee。

那是否真的有追過Aimee呢？「佢真係一個好sweet嘅女仔，又鬼鬼地，講嘢又唔正，真係幾cuteo架！其實我同佢之前只係喺公司行開行埋打過招呼嗰啲同事。都係到拍《法證Ⅲ》時，我同佢同埋祥仔因為日日見，開工又一齊，食飯又一齊，我哋先開始熟絡啲，一team人都會好照顧對方，但你話furthermore嘅嘢，我真係冇諗囉！或者，嗰陣因為傳緊阿Mo（陳豪）追佢，啲傳媒見阿Mo好似仲未出手，先搵我嚟催促吓啩！哈哈哈！佢哋最後都喺埋一齊，我覺得呢個緋聞傳得幾開心o架！」

之後跟阿Mo見面沒有尷尬嗎？「冇！點會呀？我同阿Mo拍《公主嫁到》時已經識，依家拍《天梯》仲多咗傾偈，不過話時話，我同Aimee個樣似孖生，唔怪之得阿Mo對我咁好啦！哈哈哈哈！」

哦！明白晒！