我冇拍拖！真實對白
再狼咀
Bosco 08年尾想狼咀多倫多華姐冠軍倪晨曦，咀唔到本來都冇所謂，可惜女方將相放咗上自家 facebook，家陣科技先進，偷食好難抹得乾乾淨淨嘅！"
風流手尾
背住胡囧扮單身 黃宗澤狼吞華姐
2010年03月17日
黃宗澤（ Bosco） 29歲仔，把口 過油溝女一向冇難度。 6年前與胡杏兒拍拖後，表面修心養性玩專一，但查實溝女癮仲未搣甩。
本刊更發現 08年尾， Bosco背住胡囧，到加拿大登台時發力狂追 05年多倫多華裔小姐冠軍倪晨曦（ Elva）。據知黃宗澤為溝女狂讚對方靚女之餘，仲講大話自稱單身冇拍拖，飲大兩杯影合照時仲嘟嘴狼吻，小生變餓狼。
與 30歲女友胡杏兒拍拖 6年的黃宗澤，本刊發現在'05多倫多華裔小姐冠軍倪晨曦（ 06年國際華姐 5甲，現簽約寰宇）的 facebook內，發現 Bosco一張狼吻照，男方疑似「偷食」。
先攬攬
開頭 Bosco都只係搭膊頭影吓相，睇吓佢個笑容，由心而發 o架！
未夠喉
兩張相衣着髮型都唔同，好明顯唔係同日影，相同嘅係 Bosco隻手一樣攬到 Elva實一實。
狂讚靚
識 Elva第 2日， Bosco就進行密集式攻勢，狂讚人靚女不特止，仲叫人返香港發展，實行近水樓台快飲頭啖湯。
認單身
之後 Bosco為溝女喺成圍枱嘅人面前自稱單身冇拍拖，全世界都知你同胡囧拍拖，搵鬼信咩，俾胡囧聽到實激死！
踢開胡囧
04年由熒幕情侶到蒲面拍拖，不過由 07年開始胡杏兒由肥杏變胡囧一路未停過被人踩， Bosco堂堂靚仔，出到去又好難唔扮冇女嘅！
多倫多 4天遊
08年 11月， Bosco除咗去多倫多做華姐嘉賓同溝華姐外，仲搞埋個人簽唱會，一連四日做完嘢都搵華姐倪晨曦做伴遊，辛苦晒喎！
33C、 24、 33嘅倪晨曦， 05年多倫多華姐冠軍， 06年來港參選國際華姐時打入總決賽 5甲，同屆冠軍係南非代表呂怡慧，當年倪仲得到「完美體態」獎，係男人都嗒糖啦！
自稱單身
據知該輯相攝於 08年底，當時， Bosco被邀請往多倫多擔任華裔小姐表演嘉賓，同場司儀就係華姐倪晨曦（ Elva），當年 Elva廿歲女卜卜脆， Bosco一見 Elva已經狂讚佢靚女。目擊者透露：「 Bosco第一日見到 Elva已經望住人眼甘甘，除咗主動走去狂讚佢靚女兼個樣好 cute外，第二日又問 Elva攞電話，之後 Bosco連續 4日喺多倫多做完嘢都黐實 Elva，又叫人帶佢周圍去玩，話唔係想溝人都好難信囉！」
一連出擊幾日嘅 Bosco見 Elva都冇乜反應，就喺其後一個慶功活動內兩杯到肚表心迹，趁住席間有人問佢同胡杏兒拍拖有乜進展，黃宗澤特登當住 Elva面前好快咁話：「我單身 o架喎，邊有拍拖呀？」連隨就要求同 Elva嘟嘴合照，臨離開加拿大都仲要補多句：「如果你返香港一定要搵我呀！我介紹你入行啦，你得 o架喇！」留定條後路。
花底有前科
04年時黃宗澤被前度女友吳小姐數臭他一腳踏兩船，吳小姐更大鬧佢做賤男，之後更向傳媒公開 Bosco瞓覺私相簿，好彩唔係慾照啫！《忽然 1周》圖片
而另一前女友 Freeze嘅甄穎珊亦曾狂數 Bosco係軟飯王。
見相驚青
本週一（ 15日）記者到深水埗找正在拍新劇《讀心神探》外景的 Bosco，佢一睇自己同華姐的合照已經好驚青，一時又話唔識人、一時又話 Elva係多倫多酒樓老闆個女，亂晒龍。
而華姐 Elva就透過經理人說：「佢哋係識嘅，之前一齊喺加拿大做嘢，去街呢啲私人嘢就唔想講嘞。」 Bosco咁緊張，驚俾胡杏兒扭耳仔？
本週一 Bosco回應有關與華姐倪晨曦照片內容。
黃：黃宗澤 F：《 FACE》
F：你認唔認得呢個女仔呀？（ Bosco望一望張相）
黃：邊個嚟 o架？哦……係嗰邊（多倫多）酒樓老闆個女！
F：佢係華姐 Elva喎！你仲問過佢攞電話。
黃：冇啲咁嘅事，我唔識佢，影張相好普通啫！
F：你仲話佢返香港發展記住搵你，你會幫佢喎！
黃：冇（開始想走）！
F：你仲同佢講你係單身喎？
黃：癡線（加速走人）。
唔想提
吓……佢嘅事唔係好方便回應喎！真實對白
記者向 Bosco求證偷食事件的同時，致電身在外地拍外景嘅女友胡杏兒，聽到記者話 Bosco喺加拿大追女仔，淡定嘅胡囧都呆咗兩秒：「吓（停兩秒）……佢（黃宗澤）嘅事，我唔係好方便回應。」隨即將電話交畀助手費事講。
出埠易亂性
平時無綫班靚仔小生蒲親都被成群狗仔隊到實冇啖好食，所以難得出埠輕鬆啲，撞啱悶悶哋，自然想搵人傾吓心事，不過出埠偷食經常有手尾跟， Bosco都唔係第一個出事啦！
吳卓羲溝芝加哥公關
今年 1月，有傳吳卓羲去美國芝加哥登台，吳乘機狂溝當地美籍華人女公關 Nicole Song，又話兩人離群秘密約會酒店房內短聚兩個鐘，估唔到事後 Nicole將兩人的親密照放上 facebook，事後吳卓羲就好得戚話：「我唔係乜都要 o架！」
林峯冧內地助手
《忽然 1周》圖片
出埠要速食，喺內地拍劇就下下幾個月流流長，所以 06年有傳林峯於上海拍攝無綫劇《太極》時，以高價每月 2,000長包一名女助手服侍，仲被雜誌發現女助手連續兩晚入林峯房短聚，但林峯話：「佢幫我執房，冇嘢嘅！」
留言列表
