魚與熊掌不可兼得？錯！隨住時代改變，科技進步，貪念有權無限膨脹。想有幾百匹驚人馬力但又唔想架車大食？想有老闆車嘅富貴氣派但又怕太過老氣欠型格？ Lexus旗艦豪房 LS600hL 2010年 facelift版就合晒要求，混能動力本來就不可小看， facelift更大改泵把、頭燈、鬼面罩等設計，賣相「回春」。兼得魚與熊掌再不是貪，而係要求！記者：許維雅攝影：譚盈傑Model： Yu@Puremodels
夜光珠頭燈搶眼
經常聽人講「老闆車」，一啲汽車品牌或型號總會被人界定係老闆級車款，而身價過百萬元、貴為凌志豪華房車車系中嘅頂級版嘅 LS600hL亦係其中之一。呢啲級數非凡嘅旗艦車款大多比較注重內櫳極致豪華嘅包裝，外形上嘅設計一般只要帶出矜貴氣派、穩重形象便可，簡單啲講，即係似畀司機揸。今次全新推出嘅 2010年 facelift版 LS600hL卻帶畀我另一種驚喜，第一眼睇見呢部小改款老闆車嘅感覺，係比之前年輕唔少。最大功勞，莫過於重新設計嘅車頭，將頭泵把位置重心拉低添動感外，橫欄柵磨砂鬼面罩設計亦夠晒簡約舒適。不過講到最搶眼焦點必定係型格十足嘅一對車頭燈，由 HID燈改為 LED燈，三盞如夜光珠嘅圓形白光燈，組合成設計獨特嘅低燈，配合埋整體微微向上揚嘅線條、形態特別嘅霧燈、金屬箭頭形側鏡指揮燈等全新設計，單靠燈經已魅力倍增，淨係組燈嘅價錢都足以顯身價，最優勝之處係年輕有活力嘅外形唔會感覺老，即使老闆自己揸車都唔會俾人話似司機先啦。
放大圖片 
■重新編排尾箱內電池位置，令尾箱空間增加 70公升。
放大圖片 
■尾泵把骨位更明顯，配合埋雙出死氣喉，富豪一點不斯文。
放大圖片 
■全新凌志聲音導航系統兼配高科技智能自動泊車，操控簡易。
放大圖片 
■ 5公升 V8引擎有埋電動馬達協助，馬力足以媲美 6公升房車。
有型錶板徹底年輕 放大圖片 
■新設計半圓錶板夠晒新鮮感，環保狀態顯示燈改設於右邊。保持綠色當然最慳油啦。
內櫳當然亦有改動，全新添置嘅原裝聲音導航系統兼備高科技智能自動泊車功能，無論 S位定 L位都有電腦幫你手，老闆唔泊慣車、唔熟路都唔會頭痕，不過導航系統只限英語旁述。此外，重新編排車尾電池亦係一大進步嘅實用改動，輕輕將電池排位推入，就為車尾箱增加 70L運載量至 370L，與此同時，亦加強電池嘅通風效果，散熱速度快自然更耐用。不過講到最吸引我嘅，始終係一啲令人感覺年輕嘅新設計，好似巨型半圓形液晶體顯示錶板就夠晒有型，創新地將轉數錶及環保指示燈設於兩旁，有關電池等混能資訊於中間，睇得一清二楚，既美觀又實用。稱得上老闆車，之前極盡豪華嘅內櫳設備一概保留，後座氣壓式按摩座椅連 Ottoman電動腳靠、 DVD影視系統、 Mark Levinson環迴音響連 19個喇叭等等豪裝玩極唔厭。有埋全四驅防滑差速設計提升安全保障，而高性能、低油耗及低排放嘅環保引擎則可保荷包平安，難怪近年逐漸躍升成為老闆級車款嘅新寵啦。
最搶 放大圖片 
a. facelift版中最吸引嘅改變首推這個三圓組合 LED頭燈，有型獨特！
放大圖片 
b.霧燈外形亦有改變，不規則更添動感，若加埋電鍍邊會更吸引我。
放大圖片 
c.改良側鏡指揮燈設計除有型之外，亦更清晰。
放大圖片 
d.全新橫欄柵磨砂鬼面罩比之前嘅密集幼間設計更乾淨利落。
規格
引擎： 5,000cc V8及雙高輸出電動馬達馬力： 445PS/6,400rpm（連電動馬達總輸出）扭力： 520Nm/4,000rpm傳動： 8前速自動，四驅售價：$1,790,000（四座長陣版）查詢： 2511 9430（凌志陳列室）*價格已扣除環保車稅務優惠 
留言列表
