Vianna
重 7磅"
娛樂頂點
8人醫護團助產 徐淑敏豪花 20萬
2010年03月19日
去年 25歲的徐淑敏（ Suki）奉旨成婚嫁給 37歲的飲食才俊黃浩（ Kenny），本周一（ 15日） Suki更順利誕下 7磅愛女 Vianna。 Vianna比預產期早咗一星期出世，老公 Kenny見到愛女更感動到喊。
由於 Suki臨急生女， Kenny為保 BB平安，除了搵著名婦產科醫生李福謙幫老婆開刀外，剖腹時更有 8人醫護團助產，產後更入住養和全新裝修的頂級病房。 Suki今次生女花費 20萬，真係夠晒豪。
互動片段
老公 Kenny陪徐淑敏入養和生女
溫馨全家福
Suki本周一（ 15日）晚上剖腹產女，非常高興，之後 Suki更抱住愛女和老公 Kenny影全家福。本來楊天命幫 BB擇咗 3月 16日吉時出世，話可以嫁個有錢人，依家早咗一日，佢話 B女日後可做女強人， Kenny笑說：「冇得嫁有錢人，做女強人都好吖！」
個個都話我對眼似爸爸，嘴仔鼻仔似媽咪。（設計對白）
Vianna出世後， Suki與 Kenny的各方好友紛紛送來禮物，放在病房中的當眼位置。
醫院為 Vianna炮製咗一本精美相簿，送俾 Kenny同 Suki留念。
徐淑敏的預產期本來是在 3月 23日，但上周日（ 14日） Suki突然有作動跡象，老公 Kenny即致電主診的李福謙醫生，商量後決定於本周一（ 15日）安排 Suki入院剖腹產女。當日下午 4時許，本刊記者目擊 Kenny與 Suki先到跑馬地便利店買雜誌，之後便入院待產。
直擊養和產女
3月 15日 4:30pm入院前買雜誌
入院前 Kenny怕老婆住醫院會悶，所以叫司機車佢哋去跑馬地便利店，買咗一大堆八卦雜誌才入醫院。
5pm輕鬆落車
近日天氣回暖， Suki穿上吊帶長裙入養和，落車時 Kenny一人拎三大袋行李， Suki就輕鬆落車，一啲都唔似臨盆在即嘅大肚婆。
兒科名醫助陣
Suki今次入住的病房 Deluxe Corner Suite是養和醫院產房大樓內面積最大的豪華套房，剛於日前裝修完畢， Suki是第一位入住的產婦，每晚房租一萬元。第一次做爸爸的 Kenny，對 Suki及囡囡非常緊張，除了病房住得豪外，亦請了名醫負責開刀。 Kenny本周三（ 17日）接受訪問時說：「因為 BB早咗出世，為怕有突發事件發生，主診醫生李福謙仲請咗出名嘅兒科醫生梁平教授在場預備，加埋助手、麻醉師同護士共有 8人。」
親友探 B
身為 Kenny好友的楊天命，除咗為好友囡囡擇吉時出世外，仲親身去醫院探 BB。
本周一晚上 9時許， Suki的家姐（左）及父母離開醫院， Suki爸爸仲同記者講會幫手湊 BB。
Suki話想囡囡 Vianna多啲人錫，所以已經幫佢契咗 4個契媽，長腳蟹呂慧儀係其中一個。
生完女有實在感
在 8人醫護團助產下，約 15分鐘 B女已順利出世，記者問 Suki首次見愛女的感覺，她搞笑地說：「囡囡出世後護士即抱俾我哋影相，我第一個感覺係『好血呀！想佢即刻沖涼！』之後我就好攰瞓咗。」而 Kenny坦言抱着 BB時非常感動，「護士話通常啱啱出世嘅 BB要幾個鐘先開眼，但我第一次抱佢，佢忽然擘大眼望住我，當時我感動到喊。」之後 Kenny爸爸、家姐和 Suki父母都被 Kenny感染，相繼感動落淚，此時 Suki醒來，看見此情此景，也嚇了一跳。
Suki憶述：「我睇見 Kenny、老爺、同埋我爸爸媽媽都圍住囡囡眼濕濕，唔知發生咩事，原來佢哋感動到喊！（依家感覺點呀？） BB好健康，我由大肚到依家都好順利，一啲都唔辛苦。囡囡出咗世令我覺得好實在，我覺得自己好幸福！」 Kenny說囡囡一出世，醫生李福謙已大讚好靚女，將來可以學媽咪選港姐。記者問 Suki將來會否支持愛女加入娛圈，她卻顯得猶豫：「一半半啦！如果 Vianna第時真係想做都會俾佢做。不過娛樂圈始終比較複雜。」
Suki產後開始餵囡囡食人奶，因此要不停飲魚湯谷奶， Kenny即笑老婆生完囡囡變 G cup， Suki話：「依家媽咪同奶奶日日煲魚湯俾我飲，我今朝已經飲咗 4碗，奶奶仲煲咗紅棗杞子炒米水俾我當水飲，可以補血驅風。醫生話我開刀要等 9個月先可以再生下一胎，我都想趁有 mood快啲再生。」
住養和頂級靚房
養和醫院被稱為「富豪醫院」，好多有錢人如林青霞、鄭詩韻及范姜都鍾意揀養和生仔。
呢次 Suki入住的 Deluxe Corner Suite位於養和醫院大樓 28樓，是婦產科房中面積最大的一間，套房面積約 800呎，屬開放式設計，有廚房、廁所及客廳，廁所更可觀看馬場景，房內配套齊備，仲有兩部 50吋高清電視，非常豪華。
Suki入住的 Deluxe Corner Suite面積約 800呎，非常寬敞， Kenny仲加定牀陪老婆過夜。
套房的廁所裝修摩登，極似酒店房。
6日 5夜費用
Deluxe Corner Suite豪華套房（ 6日 5夜） 6萬
李福謙醫生費 6萬
兒科醫生梁平及麻醉師費用 2萬
其他醫院雜費 6萬
合共 20萬
留言列表
