新牌仔出車難免心雄，要快又要型，最好實用、慳油兼而有之，仲有……Stop！做人實際啲好，手車都未練好，送部400hp跑車畀你，咪盞害咗你！豐田（Toyota）Ractis就Fit晒新牌仔需要，既經濟，又易揸，最緊要係車廂空間大到你估唔到，夠你載埋三五知己周圍去，如果有心儀對象，仲唔成為追女好拍檔！
新牌仔出車，最緊要易揸，否則好易撞板。Ractis就絕對User Friendly，首先車身較短，又係揭背車，冇尾箱頂住，睇位都容易得多，就算女仔揸都好易Handle，倒車、泊位就唔使驚啦！而且A柱位夠晒幼、大大消除盲點，連前面左右位都清楚埋，窄位轉彎都唔使手騰腳震，唔會失禮人。 出咗車，載埋朋友四圍去，確係夠威，車廂自然唔細得，如果朋友堆裏面仲有你嘅女神存在嘅話，就更加唔可以失禮。咪睇Ractis係1.3車仔，車廂就會好失禮，錯晒！睇真啲車身側面，就會發現設計師已經將四個車輪盡量移向角落位，為車廂騰出唔少空間，而且廠方仲為Ractis起咗「Headroom For Your Style」呢句Slogan，表明車廂夠晒高，男仔坐都唔怕頂頭，何況係女仔；既然架車夠闊落、舒服，相信好多女仔都唔介意你繼續做柴可夫啩！ 除咗駕駛技術，一般新牌仔都另有不足之處，咪就係錢囉！唔只留意車價，仲要計較油費，小數怕長計嘛！好彩Ractis嘅定位相當入門級，新車價只係$159,840起，更重要係廠方嘅耗油數字都只係18.6km/L。早前筆者做過Ractis嘅四日測試，得出嚟嘅結果係$0.9/km，慳過大部分日本1.5車，咁講法，晚晚做柴可夫，載埋「女神」遊車河都唔怕肉赤啦！ 車 型： 五門五座位揭背車 引 擎： 直四 容 積： 1,298c.c. 最大馬力： 87ps/6,000rpm 最大扭力： 11.8kgm/4,000rpm 驅 動： 前置引擎、前輪驅動 傳 動： CVT 懸 掛： （前）麥花臣 （後）扭力桿 制 動： （前）通風碟 （後）制動鼓 車身體積： 3,955×1,695× 1,640mm （長×闊×高） 售 價：$159,840起 查 詢：2305 4555 （皇冠車行）
前、後排都有唔錯嘅空間感，尤其是頭頂闊落過唔少同級車。
A柱夠晒幼，前方左右位都更易睇清楚。
尾箱空間都算係咁，放平埋後排嘅話，仲可以放大型行李。
車廂闊落無頂頭
揭背車易Handle，倒車、泊位都易得多。
車廂布局以實用為先，勝在整齊簡潔。
呢副1.3直四偈幾識慳家，試車做到$0.9/km。
好大呀……個車廂！（設計對白）
遊車河唔肉赤
車檔案
睇真啲，Ractis個Look確係In，至襯後生仔。
留言列表
