密睇生仔聖手 45歲吳君如博慈菇椗 face 週刊 169期－明星靚相大分享☆

吳君如雖然唔回應有冇 BB，但就爽快直認多次向名醫何永超求診。以何國手一向冇叫眾女星失望，吳君如應該好快有好消息公布。

我成日都去睇佢 o架！（真實對白）"
標尾會
密睇生仔聖手　 45歲吳君如博慈菇椗
2010年08月18日
05年先得償所願， 40歲高齡產下愛女陳是知的吳君如，雖然話個女兒得意到「想食佢落肚」，但據知恨生仔嘅三姑，一直冇鬆懈做人。
眼見好姊妹邱淑貞 42歲都仲可以追番件，君如實行盡力博一博，近期頻頻約見生殖科聖手何永超醫生諗計生仔，君如亦直認：「我成日都去睇佢 o架！」
有心唔怕遲， 45歲仲係生仔時呀！
日前有報道指吳君如與陳小春於吳彥祖婚宴上開拖駁火，搞到三姑話要懸紅搵證據澄清，查實佢可能最恨要生仔秘方至真﹗
一路博

《壹週刊》圖片

吳君如自從 06年替男友陳可辛生咗女兒陳是知後，二人一直不設防博再叫糊，吳於訪問中亦直認：「我一路都有搞，冇停止過。」不過陳可辛現於內地籌備由甄子丹主演的新片《武俠》，難怪君如又補飛話：「大家又忙，一個月咪得嗰兩日。」
心急追仔
據知情人士說：「三姑平時個樣癲喪，其實佢不知幾傳統。雖然佢同長毛（陳可辛）冇註冊結婚，但係佢始終想幫長毛追番個仔，而且佢兩公婆成日都鬼咁忙，三姑都驚個女冇人陪會悶，所以趁自己仲有得生想快啲追多個！」
45歲高齡追仔梗係搵高手打救，據知君如亦頻頻搵有生殖科聖手之稱、專幫高齡女士懷孕的何永超醫生做檢查及接受療程。知情人士續說：「話晒何醫生出名係生仔聖手，上次都可以搞掂，三姑當然信晒佢啦，如果唔係都唔敢介紹畀姊妹劉嘉玲啦！」
不過事隔幾年先再開工，三姑再做高齡產婦亦有難度。去年她在訪問中坦然想再追，但心知年紀大冇得強求：「醫生話我呢個年紀，要有 BB機會率只係得百分之五， 45歲已經係極限。」「大限」將至，難怪三姑密搵何醫生求診，實行夠鐘前標尾會。上週二（ 10日），三姑出席電影節開幕活動，對生仔一事答得好小心。

F：《 FACE》　吳：吳君如
F：係咪想追番個仔呀？
吳：唔……點解咁問嘅？
F：成日見你去搵何永超醫生喎？
吳：哦，我成日都去睇佢 o架！
F：咁係咪有咗 BB呀？
吳：呢個問題唔答喇。
有高手背後相助，君如應該好快又有喜！

中女互吻
吳君如和周慧敏於許鞍華新戲《得閒炒飯》中飾演雙性戀人，兩個中女仲攬埋一嚿係咁錫，扮 TB都考佢唔起。

着鬆身衫
近日吳君如替《得閒炒飯》宣傳時着住件鬆身裙上陣，掩蓋發福身形。《蘋果日報》圖片

星級生仔國手
生殖醫學科技專科醫生何永超，曾任香港生殖醫學會會長，堪稱行內權威。城中不少高齡女星如吳君如、劉嘉玲、李嘉欣、邱淑貞等向佢求診，最近就替黎姿執刀接生孖女。貴為星級醫生，除熟客介紹，何醫生目前已甚少接新症，客人需預約最少半年至一年，每次診金基本過千、一般產前檢查收 1萬、開刀接生費則過 6萬，而體外授孕手術如胚胎植入等手術，則起碼收 6至 7萬一次。對於吳君如求診一事，何醫生只透過護士回應：「唔會再答有關問題。」

何醫生位於中環太子大廈嘅診所，經常獲圈中女星上門求診，生意應接不暇。何醫生曾表示：「我唔會收已懷孕嘅新症，只係幫啲年紀大同生 BB有困難嘅人。」《忽然 1周》圖片

高齡生仔 5招
1.隔日行房，集中喺女性排卵周。
2.人工授精（將精液用導管引入陰道）
3.用排卵針藥增加女性排卵次數
4.男士戒煙，因尼古丁會令精子變弱。
5.體外授孕（用手術抽出卵子，和精子放在試管內受精後，再植入母體。）
阿媽幾多歲？
政府統計處最新數字顯示，女性首次生育年齡中位數已經去到 29.8歲，唔少圈中女星喺呢個歲數仲搏殺緊，好難生到仔，搞到班阿姐焗做高齡產婦，到仔女 18歲成年，佢哋都已經係老太婆咯！
60大壽　邱淑貞
42歲嘅邱淑貞懷有第 3胎， BB到 18歲時，邱已經變 60歲婆婆，啱啱可以擺大壽。

65富婆　林青霞
01年林青霞以超高齡 47歲生下二女邢言愛，到言愛 18歲時，林已屆 65歲，乖女想請佢去遊埠都未必行得郁。

59甘草　關詠荷
45歲關詠荷為專心湊女兒 Brittany而推劇，到 Brittany 18歲時，關詠荷已變成 59歲「甘草級」資深女優啦！

57靚媽　黎姿
39歲嘅黎姿剛替 53歲嘅馬廷強產下孖女，女兒長大成人時，兩老嘅年齡分別是 57和 71。