Benz 180 60後老爺 Benz　駐顏有術 @ 明星靚相大分享☆

人同車都一樣，幾十歲仲想駐顏有術，真係少啲功夫都唔掂。你睇呢架 Benz 180， 61年出世，漆滑皮靚，連最難搞嘅電鍍位，依然立立令，超巨型鬼面罩加凸起頭燈，喺街度仲搶眼過「 o靚模」辣跑，唔怕大大聲話俾人聽：「我行年 49喇！」記者、攝影：徐影龍　Model： Alia@Pure Models

放大圖片

呢款 1961年生產嘅 Benz 180，全港唔會超過兩部，堪稱老爺車中嘅經典。行年半百，最難得係內外都翻新得好靚，全車部件完好無缺，噴漆光亮如新，連大量銀色 Parts同電鍍飾件，喺太陽底下閃都格外刺眼明亮，唔講仲以為係復刻版新車。望住凸起星章、超巨型鬼面罩同四眼仔頭燈，感覺相當有氣派，難怪當年喺英國做的士時，相當受歡迎。據車行負責人 Tony講，玩古董車最矜貴係乜都要原裝，「一定要原汁原味，由引擎、波箱到軨蓋等，若換轉係雜件亂溝嘅『雞尾車』，收藏價值就會爭好遠喇。」最令人驚訝，係時興嘅一按撻車、防反光倒後鏡等，幾十年前 Benz已應用。「車匙只係啟動電池，再㩒另一個掣就撻車。倒後鏡都有防反光功能，不過就手動式，俾後車大光燈射住，撥下鏡底就可減低光線強度。」

半百老爺有心有力放大圖片
■車頂夠高，令車廂空間更形闊落。

■車頂夠高，令車廂空間更形闊落。

走入車廂，豪華氣派湧現，幼框軚盤同木紋飾邊，令古典味爆晒燈，最正係前後兩張大梳化，無凸起車軸同中央手枕，亦唔似現今車款咁，分開兩、三個位嘅分離式設計，一張過軟綿綿又舒服，腳短啲真係可以當床瞓。難得遇到「 60後」名車，梗要坐番轉扮謝賢。沿天后廟道斜路直上， Benz 180仍然有心有力，車身咁重一樣可以精神奕奕爆住上，副 1.7L直四偈唔輸蝕得過路上大 cc嘅私家車，點睇都唔似得 52匹。「當年周街行『筷子偈』， Benz 180已經採用 Cam帶，副偈到今時今日仲咁精神，維修同保養好重要。」一講保養， Tony語氣溫柔到好似講緊點錫太太咁：「當然要避免好天曬落天淋，閂門、踩油等都要輕手啲，最好每個禮拜出街行一轉，但又唔好太耐，個零鐘就要俾佢唞唞。」

放大圖片
■特大鬼面罩加電鍍邊框，望落好有氣派。