旅行旅遊馬來西亞怡保霹靂洞拜滿天神佛　百年車震旅館 @ 明星靚相大分享☆

「求神！求神！誠心禮佛來求靈神……」由細到大阿媽教落，力不到不為財，人不到不誠心，拜神必定要親力親為，越遠越難到的地方就顯得越有心。好！今個新年就去馬來西亞的怡保，深入霹靂洞拜個滿天神佛。記者、攝影：蕭漢祥鳴謝：馬來西亞旅遊促進局（香港分局）、馬航假期、恆利旅運、 The Banjaran Hotsprings Retreat

超級霹靂平價睇相

被譽為佛教聖地的怡保霹靂洞，位於市中心以北約 6公里的地方。怡保市一般都可以見到矮小的民房，但霹靂洞位於小山之中，環境地靈人傑，真係啱晒善信到來參拜吸靈氣。進入洞之前，見到牆上和廊柱都刻滿華人作家的題辭，好似有藝術教育家馬壽華先生所題的「雲山拱佛堂」等。穿過洞前的樓閣，就見到天然而成的山洞，不論係牆上或小洞穴，都遍佈佛像、觀音像、菩薩，以至各式各樣的佛教壁畫。參拜完之後，如果大家有興趣考吓腳力，洞內有段樓梯往上走，大約 10分鐘就能到達霹靂洞之巔，周邊地區的面貌一覽無遺。作為最八卦的小記，不論聽同行的行家之說，又或在網上網友的評論，都話來到霹靂洞最重要的任務，就係在洞內「睇相」。在山洞的一旁，除了有售賣香燭的店舖，還有一位張小姐幫遊客睇「三世書」算命，有朋友以「爆準」來形容。好奇的小記當然要親身嘗試，簡單地以姓名和出生時辰向師傅查詢，大致內容當然唔會話畀大家知，但其結果的確滿意，最抵就係十五分鐘的查詢，師傅只收$50，價錢超抵！真係一睇無妨。

放大圖片

放大圖片
■不論朋友或網友都話，在霹靂洞內必要「睇相」，準唔準見仁見智，但$50真係幾抵睇。

■不論朋友或網友都話，在霹靂洞內必要「睇相」，準唔準見仁見智，但$50真係幾抵睇。

放大圖片
■蔣中正的墨寶都有，充滿文化氣息。

■蔣中正的墨寶都有，充滿文化氣息。

放大圖片
■霹靂洞與大自然融為一體，好有氣勢。

■霹靂洞與大自然融為一體，好有氣勢。

怡保醫院變車站

綜觀各大旅行社，到馬來西亞旅遊都係飲食為主，有幾何會搞拜神團，所以如果係自遊行，又想去到怡保拜訪遠近馳名的霹靂洞，前往方法除乘坐大巴之外，較為容易的就係坐電氣化火車（ Electric Train Service）。論速度，從吉隆坡車站到怡保車站，當中有 9個中途站，至於停多少個站就視乎你係坐快線定慢線。一般來說，車程不足兩小時，比巴士快半個鐘多啲；如果論價錢，火車票價約$75，貴過坐巴士好多。但由於較為舒適快捷，好多旅客都會選擇乘搭火車。唔講唔知，其實由到達怡保，步出火車的一刻，就已經係景點處處，皆因這一座融和了摩爾及維多利亞的建築設計風格，早於 1900年前為一所醫院，直至 1917年才改建成火車站，但當時由於第一次世界大戰，物資短缺和物價高昂，令這個火車站大樓要延遲三年才能完工。到 2000年，有關方面將車站關閉，進行火車電氣化工程，以及將來往怡保至 Rewang的路段改為雙軌行車， 07年先至重開。由於這裏由醫院至火車站，經歷過百年歷史，所以當地政府將車站列為古蹟之一。

放大圖片
■大樓由英國設計師設計，內裏的擺設充滿古舊英式風格。

■大樓由英國設計師設計，內裏的擺設充滿古舊英式風格。

放大圖片
■ 2000年改建之後，怡保與 Rewang之間路段改為雙軌行車，安全好多！

■ 2000年改建之後，怡保與 Rewang之間路段改為雙軌行車，安全好多！

放大圖片
■火車班次唔似香港咁密，全日只得六班車通行，所以乘客都坐在大堂等車。

■火車班次唔似香港咁密，全日只得六班車通行，所以乘客都坐在大堂等車。

放大圖片

Electric Train Services票價：$75（來往吉隆坡至怡保）網址：http://www.ets-train.com.my

至「索」車站旅館放大圖片
■旅館酒店在怡保車站的上層。

■旅館酒店在怡保車站的上層。

正當大家在車站月台影吓相、逛幾逛以為就可以走得之時，無聊的小記突然忽發奇想，如果可以好似流浪一樣，瞓吓車站都幾過癮。但原來這個想法係可以實現的，因為這裏不單止係一個車站，它還有另一個功能——車站旅館。相信這個名詞好耐都無聽過，好似有啲遠古 feel。的確，車站旅館起源於上一兩個世紀，由於當時交通不發達，往往火車到達已是晚上，需要在車站旅館休息，第二日再轉乘車輛往其他地方。對於現代人嚟講，當然唔需要這個功能，但不少來自歐美的旅客，依然好喜歡入住這座古蹟，喜歡它悠久歷史的味道……究竟這味道是甚麼味？哈，走進房內自然「索」到。無錯！單睇以上幾個字，相信大家都意會到我的意思，簡單來說大樓的「外在美」勝於「內在美」，明晒！這小小半座的旅館酒店，就能夠提供 100間房間，分別有雙人房、三人房及家庭房間。小記參觀的是家庭房間，一進門就已經是兩張大床，房內旁邊的第二房間，內裏仲有三張大床，真係足以容納十個人住宿；而其餘的空間，就只有小小的洗手間及梳妝枱。雖然設備較為簡陋，但部份房間從窗戶外望，可以看到車站的月台和路軌，不但好多離別依依的場面可以睇得一清二楚，就連火車埋站的震動都 feel到，這個「車震」的效果一般酒店都搵唔到。　

放大圖片
■家庭房至少可容納十人住宿。

■家庭房至少可容納十人住宿。

放大圖片
■職員話普通房長期爆滿，好受歡迎。

■職員話普通房長期爆滿，好受歡迎。

The Majestic Station Hotel地址： Bangunan Stesen Keretapi, Jalan Panglima Bukit Gantang Wahab 30000 Ipoh房價：雙人房$220晚/三人房$295晚/家庭房$345晚網址：http://www.majesticstationhotel.com

$3.3嘆新鮮白咖啡

除了聽媽媽話，新年去霹靂洞拜佛求支好籤，仲要幫爸爸買大馬咖啡。吓！其實佢飲開的白咖啡，香港各大超市都有得賣，仲使咩咁遠運入境呀！不過難得到訪，都要親身去到舊街場白咖啡發源地之一的南香茶餐室，品嚐新鮮的白咖啡。白咖啡在怡保的地位，就好比香港的鴛鴦、絲襪奶茶等咁重要。在廚房密密冲咖啡的陳先生，係這間茶餐室的第三代傳人，他非常大方的讓小記在廚房任影唔嬲，皆因現代的咖啡全由機器冲配，只要調好咖啡、水、牛奶花奶、糖等份量便可，哪有偷師偷橋可言。不過當初舊街場白咖啡出名還有一個玄機，張先生說：「以往試過在其他地方開店，但當地不能調配跟怡保同一的味道，關鍵原來在於水質。」現時陳先生主力打理茶餐室，每日冲過百杯咖啡，而在各地銷售發行的包裝白咖啡，就由哥哥負責。不過最開心係，香港茶餐廳飲一杯咖啡都要十幾蚊，但在南香嘆一杯新鮮冲的白咖啡，都只係$3.3，好抵飲！

放大圖片
■坐在廚房旁的陳先生友人都笑言，他日日拉到手軟。

■坐在廚房旁的陳先生友人都笑言，他日日拉到手軟。

放大圖片
■嘆埋個蛋撻，係怡保最嘆的下午茶組合。

■嘆埋個蛋撻，係怡保最嘆的下午茶組合。

放大圖片
■陳先生話最初父親反對咖啡冲調機器化，但味道控制表現佳，最後都全面改革。

■陳先生話最初父親反對咖啡冲調機器化，但味道控制表現佳，最後都全面改革。

放大圖片
■熱咖啡$3.3/凍咖啡$3.8

■熱咖啡$3.3/凍咖啡$3.8

南香茶餐室地址： No.2, Jalan Bandar Timah, 30000 Ipoh, Perak

滑溜地下水豆腐花

同樣受惠於水質靚的行業，還有怡保的豆腐花。店員同樣若無其事咁表示，其實無咩特別製作秘方，但由於來貨好，兼且用來製作豆腐花最關鍵的元素——「地下水」都特別靚，令豆腐花、豆漿都特別香特別滑。為食的傳媒團嚟到門口，睇見檔口非常細小，跟旺角賣珍珠奶茶的無分別，店內亦只提供豆腐花、豆漿、凉粉冰和白咖啡四款產品，但就憑呢幾招足以令街坊在門外排長龍，坐在門外嘆豆腐花，就連馬路上都排了兩層車龍，原來都係食客們的私伙流動餐桌，駛到門口大叫店員就可以落 order，非常方便。但計我話，豆腐花賣到人龍加車龍，不單止因為好味，仲要好抵食，一碗暖笠笠、滑滑溜的豆腐花都只係賣$2港幣一碗，難怪同行的傳媒朋友搏命食，皆因香港無可能食到咁平咁高水準的豆腐花。

放大圖片